Ҳуқуқни муҳофаза қилувчи идораларнинг кенгайтирилган йиғилиши ўтказилди

Мамлакатимизда инсон қадрини улуғлаш, аҳолининг тинч ва осойишта ҳаётини таъминлаш ҳамда қонунийликни мустаҳкамлаш масаласи давлат сиёсатининг устувор йўналишларидан бири ҳисобланади. Бу борада ҳуқуқни муҳофаза қилувчи органларнинг ўзаро ҳамкорлиги ва уйғунлашган фаолияти муҳим аҳамият касб этади. Амударё тумани прокурори – ҳуқуқни муҳофаза қилувчи идораларнинг Мувофиқлаштирувчи Кенгаши раиси Баҳром Машарипов раислигида бўлиб ўтган кенгайтирилган идоралараро йиғилиш ҳам айни шу мақсадларга, яъни ҳудудда қонунийликни мустаҳкамлаш, фуқароларнинг ҳуқуқ ва эркинликларини ишончли муҳофаза қилиш, жиноятчилик ва ҳуқуқбузарликларнинг барвақт олдини олиш борасидаги фаолият таҳлилига бағишланди. Танқидий ва таҳлилий руҳда ўтган мазкур йиғилишда туман ҳокими Собир Хўжаметов, ҳоким ўринбосарлари, туман прокуратураси масъуллари, Ички ишлар бўлими, Миллий гвардия, Фавқулодда вазиятлар бўлими раҳбарлари ҳамда тумандаги бошқа мутасадди ташкилот ва муассасалар раҳбарлари иштирок этдилар.

Кун тартибидаги асосий масала сифатида ўтган 2025 йил давомида туманда жиноятчиликка қарши курашиш, ҳуқуқбузарликлар профилактикаси ва жамоат хавфсизлигини таъминлаш, шунингдек, ижтимоий-иқтисодий соҳаларда йўл қўйилган камчиликлар ва мавжуд муаммолар чуқур таҳлил қилинди. Туман прокурори Баҳром Машарипов йиғилишни очар экан, ўз маърузасида ўтган давр мобайнида амалга оширилган ишлар ва йўл қўйилган хатоларга алоҳида тўхталиб ўтди. Таъкидланганидек, 2025 йил давомида қонунлар ижроси юзасидан ўтказилган юзга яқин назорат тадбирлари натижасида 1200 та қонун бузилиш ҳолатлари аниқланган. Ушбу ҳолатларни бартараф этиш ва қонунийликни тиклаш мақсадида 314 та прокурор назорати ҳужжатлари қўлланилган. Бу рақамлар ортида нафақат назорат фаолияти, балки жамиятда қонун устуворлигини таъминлаш йўлидаги қатъий ҳаракатлар ётибди.

Шунингдек, аҳоли билан бевосита мулоқот қилиш, уларнинг дарду ташвишларини тинглаш ва муаммоларига ечим топиш масаласи ҳам прокуратура органларининг диққат марказида бўлди. Ҳисобот даврида келиб тушган жами мингдан ортиқ мурожаатларнинг 825 таси бевосита прокуратурада кўриб чиқилган бўлса, шундан 392 таси қаноатлантирилиб, фуқароларнинг бузилган ҳуқуқлари тикланди. “Инсон қадри учун” тамойили асосида ташкил этилган 27 та сайёр қабулда 300 га яқин жисмоний ва юридик шахслар вакилларининг мурожаатлари тингланиб, уларнинг ижобий ечими бўйича тегишли чоралар кўрилди. Бундан ташқари, жамиятда ҳуқуқий онг ва ҳуқуқий маданиятни юксалтириш, қонунбузарликларнинг олдини олиш мақсадида 500 га яқин тарғибот тадбирлари ўтказилгани ҳам профилактик ишларнинг кўламидан далолат беради.

Бироқ, йиғилишда эришилган натижалар билан бирга, йўл қўйилган жиддий камчиликлар ҳам рўй-рост айтиб ўтилди. Хусусан, аниқланган қонун бузилиши ҳолатларининг келиб чиқиш сабаблари таҳлил қилиниб, бунга асосан айрим идора ва ташкилотлар раҳбарлари ҳамда масъул шахсларининг ўз хизмат вазифаларини лозим даражада билмаслиги, уларда касбга садоқат руҳи шаклланмаганлиги сабаб бўлаётгани кескин танқид остига олинди. Шунингдек, ишларни тўғри ташкил этмаслик, соҳада тизимли хато ва камчиликларга йўл қўйиш, энг ёмони — мавжуд муаммоларни ўз вақтида бартараф этиш борасида шахсий ташаббуснинг йўқлиги асосий омиллар сифатида кўрсатилди. Прокурор ўз сўзида хизмат вазифасига юзаки ва масъулиятсизлик билан қараб, қонунбузилиши ҳолатларига йўл қўйган ходимларга нисбатан бундан буён қатъий чоралар кўрилиши лозимлигини алоҳида таъкидлади.

Тадбир давомида кун тартибидаги масалалар юзасидан ҳуқуқни муҳофаза қилувчи органлар ва бошқа алоқадор идоралар раҳбарларининг ҳисоботлари ва йўл қўйилган камчиликлар юзасидан изоҳлари тингланди. Муҳокамалар якунида Мувофиқлаштирувчи Кенгашнинг тегишли қарори қабул қилинди. Унга кўра, Амударё туманида криминоген вазият барқарорлигини таъминлаш, жиноятчиликка қарши курашиш самарадорлигини ошириш мақсадида ҳуқуқни муҳофаза қилувчи органлар, ҳокимлик, идора ва ташкилотлар ўртасидаги ҳамкорликни янада кучайтириш бўйича аниқ чора-тадбирлар белгиланди. Белгиланган вазифаларнинг ижроси қатъий назоратга олинди. Зеро, қонун устувор ва жазо муқаррар бўлган юртдагина тараққиёт ва фаровонлик ҳукм суради.