Huquqni muhofaza qiluvchi idoralarning kengaytirilgan yigʻilishi oʻtkazildi

Mamlakatimizda inson qadrini ulugʻlash, aholining tinch va osoyishta hayotini taʼminlash hamda qonuniylikni mustahkamlash masalasi davlat siyosatining ustuvor yoʻnalishlaridan biri hisoblanadi. Bu borada huquqni muhofaza qiluvchi organlarning oʻzaro hamkorligi va uygʻunlashgan faoliyati muhim ahamiyat kasb etadi. Amudaryo tumani prokurori – huquqni muhofaza qiluvchi idoralarning Muvofiqlashtiruvchi Kengashi raisi Bahrom Masharipov raisligida boʻlib oʻtgan kengaytirilgan idoralararo yigʻilish ham ayni shu maqsadlarga, yaʼni hududda qonuniylikni mustahkamlash, fuqarolarning huquq va erkinliklarini ishonchli muhofaza qilish, jinoyatchilik va huquqbuzarliklarning barvaqt oldini olish borasidagi faoliyat tahliliga bagʻishlandi. Tanqidiy va tahliliy ruhda oʻtgan mazkur yigʻilishda tuman hokimi Sobir Xoʻjametov, hokim oʻrinbosarlari, tuman prokuraturasi masʼullari, Ichki ishlar boʻlimi, Milliy gvardiya, Favqulodda vaziyatlar boʻlimi rahbarlari hamda tumandagi boshqa mutasaddi tashkilot va muassasalar rahbarlari ishtirok etdilar.

Kun tartibidagi asosiy masala sifatida oʻtgan 2025-yil davomida tumanda jinoyatchilikka qarshi kurashish, huquqbuzarliklar profilaktikasi va jamoat xavfsizligini taʼminlash, shuningdek, ijtimoiy-iqtisodiy sohalarda yoʻl qoʻyilgan kamchiliklar va mavjud muammolar chuqur tahlil qilindi. Tuman prokurori Bahrom Masharipov yigʻilishni ochar ekan, oʻz maʼruzasida oʻtgan davr mobaynida amalga oshirilgan ishlar va yoʻl qoʻyilgan xatolarga alohida toʻxtalib oʻtdi. Taʼkidlanganidek, 2025-yil davomida qonunlar ijrosi yuzasidan oʻtkazilgan yuzga yaqin nazorat tadbirlari natijasida 1200 ta qonun buzilish holatlari aniqlangan. Ushbu holatlarni bartaraf etish va qonuniylikni tiklash maqsadida 314 ta prokuror nazorati hujjatlari qoʻllanilgan. Bu raqamlar ortida nafaqat nazorat faoliyati, balki jamiyatda qonun ustuvorligini taʼminlash yoʻlidagi qatʼiy harakatlar yotibdi.

Shuningdek, aholi bilan bevosita muloqot qilish, ularning dardu tashvishlarini tinglash va muammolariga yechim topish masalasi ham prokuratura organlarining diqqat markazida boʻldi. Hisobot davrida kelib tushgan jami mingdan ortiq murojaatlarning 825 tasi bevosita prokuraturada koʻrib chiqilgan boʻlsa, shundan 392 tasi qanoatlantirilib, fuqarolarning buzilgan huquqlari tiklandi. “Inson qadri uchun” tamoyili asosida tashkil etilgan 27 ta sayyor qabulda 300 ga yaqin jismoniy va yuridik shaxslar vakillarining murojaatlari tinglanib, ularning ijobiy yechimi boʻyicha tegishli choralar koʻrildi. Bundan tashqari, jamiyatda huquqiy ong va huquqiy madaniyatni yuksaltirish, qonunbuzarliklarning oldini olish maqsadida 500 ga yaqin targʻibot tadbirlari oʻtkazilgani ham profilaktik ishlarning koʻlamidan dalolat beradi.

Biroq, yigʻilishda erishilgan natijalar bilan birga, yoʻl qoʻyilgan jiddiy kamchiliklar ham roʻy-rost aytib oʻtildi. Xususan, aniqlangan qonun buzilishi holatlarining kelib chiqish sabablari tahlil qilinib, bunga asosan ayrim idora va tashkilotlar rahbarlari hamda masʼul shaxslarining oʻz xizmat vazifalarini lozim darajada bilmasligi, ularda kasbga sadoqat ruhi shakllanmaganligi sabab boʻlayotgani keskin tanqid ostiga olindi. Shuningdek, ishlarni toʻgʻri tashkil etmaslik, sohada tizimli xato va kamchiliklarga yoʻl qoʻyish, eng yomoni — mavjud muammolarni oʻz vaqtida bartaraf etish borasida shaxsiy tashabbusning yoʻqligi asosiy omillar sifatida koʻrsatildi. Prokuror oʻz soʻzida xizmat vazifasiga yuzaki va masʼuliyatsizlik bilan qarab, qonunbuzilishi holatlariga yoʻl qoʻygan xodimlarga nisbatan bundan buyon qatʼiy choralar koʻrilishi lozimligini alohida taʼkidladi.

Tadbir davomida kun tartibidagi masalalar yuzasidan huquqni muhofaza qiluvchi organlar va boshqa aloqador idoralar rahbarlarining hisobotlari va yoʻl qoʻyilgan kamchiliklar yuzasidan izohlari tinglandi. Muhokamalar yakunida Muvofiqlashtiruvchi Kengashning tegishli qarori qabul qilindi. Unga koʻra, Amudaryo tumanida kriminogen vaziyat barqarorligini taʼminlash, jinoyatchilikka qarshi kurashish samaradorligini oshirish maqsadida huquqni muhofaza qiluvchi organlar, hokimlik, idora va tashkilotlar oʻrtasidagi hamkorlikni yanada kuchaytirish boʻyicha aniq chora-tadbirlar belgilandi. Belgilangan vazifalarning ijrosi qatʼiy nazoratga olindi. Zero, qonun ustuvor va jazo muqarrar boʻlgan yurtdagina taraqqiyot va farovonlik hukm suradi.