Навоий ва Бобур мероси — қалбларда мангу

Бугун ғазал мулкининг султони, сўздан сарой қурган, маърифатдан йўл очган улуғ зот — ҳазрат Алишер Навоийнинг таваллуд айёми. У зотнинг қаламида муҳаббат ҳам, ҳикмат ҳам бирдек жилоланади. Навоий асарлари асрлар оша сўнмайдиган маънавий чироқдир. Шу сабабли ҳам Навоий бобомизнинг ижоди инсонни эзгуликка етаклайди.

Шу билан бир қаторда, яна бир буюк мутафаккир — Заҳириддин Муҳаммад Бобурнинг ҳам таваллуд куни яқинлашмоқда. Бобур нафақат шоҳ, балки нозик қалбли шоир ҳам эди. У қилич билан юртни, қалам билан эса қалбларни забт этган улуғ сиймодир. Унинг “Бобурнома” асари тарих, ҳаёт ва ҳақиқат ойнасидир.

Айни кунларда республикамизнинг барча таълим муассасалари ва билим даргоҳларида буюк бобокалонларимиз хотирасига бағишланган адабий кечалар ўтказилмоқда. Жумладан, туманимиздаги 1-сонли мактабда 9 февраль куни “Навоий ва Бобур мероси қалбларда мангу” шиори остида бадиий кеча ҳамда давра суҳбати кўтаринки руҳда ташкил этилди.

Бадиий кечада 5-“Б” ва 9-“А” синф ўқувчилари иштирокида “Бош ва қилич” мавзуси асосида саҳна кўриниши намойиш этилди. Мактабнинг ўқув залида она тили ва адабиёт ўқитувчилари, шунингдек кутубхона мудираси Алланиязова Ирода опа иштирокида давра суҳбати ўтказилди. Суҳбатни она тили ва адабиёт фанлари услуб бирлашмаси раиси Халиллаева Муборак опа очиб берди.

Давра суҳбатида 6-синф ўқувчилари Навоий бобомизнинг “Қилғил”, “Жунун водийсиға”, “Қизил, сариқ, яшил” ғазалларини ифодали ўқиб, тингловчилар қалбини шод этдилар. 7-синф ўқувчилари эса “Навоий ижодини ким мукаммал тасвирлайди?” мавзусида чиқиш қилиб, буюк мутафаккирнинг ижодий меросини кенгроқ ёритишга ҳаракат қилдилар.

Танлов якунларига кўра, Мадраҳимова Олтиной “Ғаройиб ус-сиғар” девонига кирувчи “Жунун водийсиға” ғазалини мазмунли ва ифодали айтгани учун 1-ўринни эгаллади. 7-синф ўқувчилари орасидан эса 7-“В” синф ўқувчилари Тўрабоева Муҳаббат ва Ибрагимова Шайдо Алишер Навоий ижодини мукаммал тарзда тасвирлаб бергани учун ғолиб деб топилди. Ғолибларга эсдалик совғалари топширилди.

Инобат Одилбоева, 1-сонли мактабнинг она тили ва адабиёт фани ўқитувчиси.