Navoiy va Bobur merosi — qalblarda mangu

Bugun gʻazal mulkining sultoni, soʻzdan saroy qurgan, maʼrifatdan yoʻl ochgan ulugʻ zot — hazrat Alisher Navoiyning tavallud ayyomi. U zotning qalamida muhabbat ham, hikmat ham birdek jilolanadi. Navoiy asarlari asrlar osha soʻnmaydigan maʼnaviy chiroqdir. Shu sababli ham Navoiy bobomizning ijodi insonni ezgulikka yetaklaydi.

Shu bilan bir qatorda, yana bir buyuk mutafakkir — Zahiriddin Muhammad Boburning ham tavallud kuni yaqinlashmoqda. Bobur nafaqat shoh, balki nozik qalbli shoir ham edi. U qilich bilan yurtni, qalam bilan esa qalblarni zabt etgan ulugʻ siymodir. Uning “Boburnoma” asari tarix, hayot va haqiqat oynasidir.

Ayni kunlarda respublikamizning barcha taʼlim muassasalari va bilim dargohlarida buyuk bobokalonlarimiz xotirasiga bagʻishlangan adabiy kechalar oʻtkazilmoqda. Jumladan, tumanimizdagi 1-sonli maktabda 9-fevral kuni “Navoiy va Bobur merosi qalblarda mangu” shiori ostida badiiy kecha hamda davra suhbati koʻtarinki ruhda tashkil etildi.

Badiiy kechada 5-“B” va 9-“A” sinf oʻquvchilari ishtirokida “Bosh va qilich” mavzusi asosida sahna koʻrinishi namoyish etildi. Maktabning oʻquv zalida ona tili va adabiyot oʻqituvchilari, shuningdek kutubxona mudirasi Allaniyazova Iroda opa ishtirokida davra suhbati oʻtkazildi. Suhbatni ona tili va adabiyot fanlari uslub birlashmasi raisi Xalillayeva Muborak opa ochib berdi.

Davra suhbatida 6-sinf oʻquvchilari Navoiy bobomizning “Qilgʻil”, “Junun vodiysigʻa”, “Qizil, sariq, yashil” gʻazallarini ifodali oʻqib, tinglovchilar qalbini shod etdilar. 7-sinf oʻquvchilari esa “Navoiy ijodini kim mukammal tasvirlaydi?” mavzusida chiqish qilib, buyuk mutafakkirning ijodiy merosini kengroq yoritishga harakat qildilar.

Tanlov yakunlariga koʻra, Madrahimova Oltinoy “Gʻaroyib us-sigʻar” devoniga kiruvchi “Junun vodiysigʻa” gʻazalini mazmunli va ifodali aytgani uchun 1-oʻrinni egalladi. 7-sinf oʻquvchilari orasidan esa 7-“V” sinf oʻquvchilari Toʻraboyeva Muhabbat va Ibragimova Shaydo Alisher Navoiy ijodini mukammal tarzda tasvirlab bergani uchun gʻolib deb topildi. Gʻoliblarga esdalik sovgʻalari topshirildi.

Inobat Odilboyeva, 1-sonli maktabning ona tili va adabiyot fani oʻqituvchisi.