Mustaqillikning 35-yilligi oldidan Bobur nomli ovulda hashar oʻtkazildi

Shu kunlarda butun mamlakatimiz boʻylab Oʻzbekiston Respublikasi davlat mustaqilligining 35-yilligini munosib kutib olish va keng nishonlashga katta tayyorgarlik koʻrilmoqda. Davlatimiz rahbarining 2026-yil 1-apreldagi «Oʻzbekiston Respublikasi davlat mustaqilligining 35-yilligini keng nishonlashga tayyorgarlik koʻrish va uni oʻtkazish toʻgʻrisida»gi qarori bu borada muhim dasturilamal boʻlib xizmat qilmoqda. Mazkur hujjatda ushbu qutlugʻ ayyomni Yangi Oʻzbekistonning bugungi ulkan salohiyati hamda jahon maydonidagi tobora oshib borayotgan nufuziga muvofiq tarzda, yuksak saviyada oʻtkazish boʻyicha qator ustuvor vazifalar va aniq topshiriqlar belgilab berilgan. Bu ezgu maqsadlar yoʻlida yurtimizning har bir goʻshasidagi mahalla va ovullarda bayram shukuhi erta boshlandi.

Amudaryo tumanining ovul va mahallalarida ham ushbu eng ulugʻ, eng aziz bayramimizga bagʻishlangan tayyorgarlik ishlari allaqachon qizgʻin pallaga kirgan. Azal-azaldan xalqimiz har qanday toʻy va tantanani, qutlugʻ bayramni eng avvalo oʻz atrofini, mahalla-koʻyni tozalash, obodonlashtirish va koʻkalamzorlashtirish ishlaridan boshlagan. Bu goʻzal anʼana bugungi kunda ham oʻz ahamiyatini yoʻqotmasdan, jamiyat jipsligini taʼminlovchi muhim omil boʻlib kelmoqda.

Ana shunday ezgu maqsadlarni oʻzida mujassam etgan holda, tumandagi Bobur nomli ovul fuqarolar yigʻinida mustaqilligimizning 35-yilligi oldidan hashar tashkil qilindi. Ovul fuqarolar yigʻini raisi Davron Shukurlayev tashabbusi bilan oʻtgan mazkur ekologik tadbirda ovul aholisi va mahallaning eng faol fuqarolari uyushqoqlik bilan ishtirok etishdi.

Hashar doirasida hudud qiyofasini tubdan yaxshilash va yashil maydonlarni kengaytirishga alohida eʼtibor qaratildi. Xususan, ovulga kirish yoʻlida, aniqroq qilib aytganda, Jumurtov yoʻlidan boshlab to ovul fuqarolar yigʻini maʼmuriy binosi yonigacha boʻlgan masofada yoʻlning bir tomoniga manzarali archa koʻchatlari ekildi.

Bu xayrli ishda jamoatchilik vakillarining oʻzaro hamjihatligi yaqqol koʻzga tashlandi. Jumladan, tuman bosh imom-xatibi Abdurahmon hoji Matsapayev mazkur savobli ishga oʻz hissasini qoʻshib, homiylik asosida 90 tup archa koʻchatlari hamda ularning baquvvat oʻsishini taʼminlovchi biogumus oʻgʻitlarini taqdim etdi.

Shu kuni ilgarigi hasharlar vaqtida ekilgan, ammo turli sabablarga koʻra tutib ketmagan va rivojlanmay qolgan archa koʻchatlarining oʻrniga yangi nihollar oʻtqazildi. Shu bilan birgalikda, ayni vaqtda yoʻl boʻyida yashnab oʻsib turgan 90 tup archaga shakl berilib, ularning koʻrinishi yanada koʻrkamlashtirildi.

Bobur nomli ovulda amalga oshirilgan bunday obodonlashtirish ishlari yurtimizda olib borilayotgan bunyodkorlik siyosatining joylardagi amaliy ifodasidir. Birgina mahalla misolida koʻzga tashlanayotgan bunday ahillik, yaratuvchanlik va tabiatga boʻlgan mehr-eʼtibor, albatta, yaqinlashib kelayotgan Oʻzbekiston Respublikasi davlat mustaqilligining 35-yillik shodiyonalariga munosib tuhfa boʻladi. Zero, ozod va obod Vatanni birgalikda barpo etish, uning har bir qarich yerini koʻz qorachigʻidek asrab-avaylash hamda kelajak avlodga yashil va toza tabiat qoldirish barchamizning umumiy burchimiz ekanini shu kabi amaliy harakatlar, uyushqoqlik bilan oʻtkazilayotgan obodonlashtirish ishlari yana bir bor isbotlamoqda. Bu kabi xayrli tashabbuslar bayram kunlariga qadar yurtimizning barcha hududlarida izchil davom etadi.