ИЧИМЛИК СУВИДАН НОҚОНУНИЙ ФОЙДАЛАНИШ ҲОЛАТЛАРИГА ЧЕК ҚЎЙИЛМОҚДА

Ичимлик суви — нафақат ҳаёт манбаи, балки асраб-авайланиши лозим бўлган стратегик ресурсдир. Айниқса, иқлим ўзгариши ва сув танқислиги кучайиб бораётган бугунги шароитда ҳар бир томчи сувнинг қадри ошиб бормоқда. Шу боис сув ресурсларидан оқилона ва тежамкорлик билан фойдаланиш, тизимга ўзбошимчалик билан уланишларнинг олдини олиш ҳамда соҳада қонун устуворлигини таъминлаш давлат сиёсатининг устувор йўналишларидан бирига айланган.

Ичимлик сувидан қонунга хилоф равишда фойдаланишнинг олдини олиш мақсадида Қорақалпоғистон Республикаси Қурилиш ва уй-жой коммунал хўжалиги соҳасида ҳудудий назорат қилиш инспекцияси, “Қорақалпоқ сув таъминоти” акциядорлик жамияти ҳамда Қорақалпоғистон Республикаси Прокуратурасининг қўшма қарори қабул қилинган. Айни кунларда мазкур қўшма қарор ижросини таъминлаш мақсадида жойларда тизимли ишлар амалга оширилмоқда. Ушбу ҳамкорлик сув таъминоти тизимини муҳофаза қилиш, тармоқлардаги йўқотишларни камайтириш ва аҳолига барқарор хизмат кўрсатишни таъминлашга қаратилган.

Мазкур тадбирлар доирасида Амударё туманининг чекка ҳудудларида ичимлик суви таъминоти тизимларидан фойдаланиш маданиятини ошириш, тармоққа ноқонуний уланишларни аниқлашга қаратилган навбатдаги рейд тадбирлари ўтказилди. Хусусан, тумандаги Ўрта қалъа овули ҳамда Бўстон маҳалласи ҳудудларида ўтказилган ўрганишлар жараёнида соҳадаги мавжуд тартиб-қоидаларга амал қилмай, ўзбошимчалик билан тармоққа уланиб олган фуқаролар аниқланди. Мутахассислар томонидан ҳолатлар жойида ўрганилиб, тегишли ҳужжатлар расмийлаштирилди.

Таъкидлаш жоизки, сув таъминоти тизимига ноқонуний уланиш нафақат давлат манфаатларига зарар етказади, балки тармоқдаги босимнинг пасайишига, қувурларнинг шикастланишига ва масъулиятли истеъмолчиларга ҳам сув етказиб беришда узилишлар бўлишига сабаб бўлади.

Рейд давомида аниқланган ҳолатлар бўйича икки нафар фуқарога нисбатан тегишли чоралар кўрилди. Мазкур шахсларнинг хатти-ҳаракатларида Ўзбекистон Республикаси Маъмурий жавобгарлик тўғрисидаги кодексининг 163-моддаси 1-қисмида назарда тутилган ҳуқуқбузарлик аломатлари қайд этилгани натижасида қонунбузарларга нисбатан жами 8 миллион 240 минг сўм миқдорида жарима жазоси қўлланилди.

Бу каби тадбирлар нафақат жазолаш, балки аҳоли ўртасида ҳуқуқий тарғибот ишларини кучайтиришни ҳам кўзда тутади. Шу сабабли Қорақалпоғистон Республикаси Қурилиш ва уй-жой коммунал хўжалиги соҳасида ҳудудий назорат қилиш инспекцияси ходимлари жойларда аҳоли ва истеъмолчилар билан учрашувлар ўтказиб, амалдаги қонунчилик талаблари ҳақида маълумотлар бермоқда. Учрашувларда фуқароларга ичимлик сувидан фойдаланишда шартномавий муносабатларга амал қилиш, ҳисоблагич асбобларини ўз вақтида ўрнатиш ва ноқонуний ҳаракатлардан тийилиш лозимлиги уқтирилмоқда. Зеро, сув таъминоти тизимининг барқарор ишлаши, келгуси авлодлар учун ҳам тоза ва етарли сув захираларини сақлаб қолиш ҳар биримизнинг масъулиятимизга бевосита боғлиқ.

Ҳудудларда назорат рейдлари изчил давом эттирилмоқда. Бу эса сув исрофгарчилигига чек қўйиш, соҳада қонунийликни мустаҳкамлаш ва аҳолига сифатли хизмат кўрсатишни таъминлаш йўлидаги муҳим қадамдир.