IChIMLIK SUVIDAN NOQONUNIY FOYDALANISh HOLATLARIGA ChEK QOʻYILMOQDA

Ichimlik suvi — nafaqat hayot manbai, balki asrab-avaylanishi lozim boʻlgan strategik resursdir. Ayniqsa, iqlim oʻzgarishi va suv tanqisligi kuchayib borayotgan bugungi sharoitda har bir tomchi suvning qadri oshib bormoqda. Shu bois suv resurslaridan oqilona va tejamkorlik bilan foydalanish, tizimga oʻzboshimchalik bilan ulanishlarning oldini olish hamda sohada qonun ustuvorligini taʼminlash davlat siyosatining ustuvor yoʻnalishlaridan biriga aylangan.

Ichimlik suvidan qonunga xilof ravishda foydalanishning oldini olish maqsadida Qoraqalpogʻiston Respublikasi Qurilish va uy-joy kommunal xoʻjaligi sohasida hududiy nazorat qilish inspektsiyasi, “Qoraqalpoq suv taʼminoti” aktsiyadorlik jamiyati hamda Qoraqalpogʻiston Respublikasi Prokuraturasining qoʻshma qarori qabul qilingan. Ayni kunlarda mazkur qoʻshma qaror ijrosini taʼminlash maqsadida joylarda tizimli ishlar amalga oshirilmoqda. Ushbu hamkorlik suv taʼminoti tizimini muhofaza qilish, tarmoqlardagi yoʻqotishlarni kamaytirish va aholiga barqaror xizmat koʻrsatishni taʼminlashga qaratilgan.

Mazkur tadbirlar doirasida Amudaryo tumanining chekka hududlarida ichimlik suvi taʼminoti tizimlaridan foydalanish madaniyatini oshirish, tarmoqqa noqonuniy ulanishlarni aniqlashga qaratilgan navbatdagi reyd tadbirlari oʻtkazildi. Xususan, tumandagi Oʻrta qalʼa ovuli hamda Boʻston mahallasi hududlarida oʻtkazilgan oʻrganishlar jarayonida sohadagi mavjud tartib-qoidalarga amal qilmay, oʻzboshimchalik bilan tarmoqqa ulanib olgan fuqarolar aniqlandi. Mutaxassislar tomonidan holatlar joyida oʻrganilib, tegishli hujjatlar rasmiylashtirildi.

Taʼkidlash joizki, suv taʼminoti tizimiga noqonuniy ulanish nafaqat davlat manfaatlariga zarar yetkazadi, balki tarmoqdagi bosimning pasayishiga, quvurlarning shikastlanishiga va masʼuliyatli isteʼmolchilarga ham suv yetkazib berishda uzilishlar boʻlishiga sabab boʻladi.

Reyd davomida aniqlangan holatlar boʻyicha ikki nafar fuqaroga nisbatan tegishli choralar koʻrildi. Mazkur shaxslarning xatti-harakatlarida Oʻzbekiston Respublikasi Maʼmuriy javobgarlik toʻgʻrisidagi kodeksining 163-moddasi 1-qismida nazarda tutilgan huquqbuzarlik alomatlari qayd etilgani natijasida qonunbuzarlarga nisbatan jami 8 million 240 ming soʻm miqdorida jarima jazosi qoʻllanildi.

Bu kabi tadbirlar nafaqat jazolash, balki aholi oʻrtasida huquqiy targʻibot ishlarini kuchaytirishni ham koʻzda tutadi. Shu sababli Qoraqalpogʻiston Respublikasi Qurilish va uy-joy kommunal xoʻjaligi sohasida hududiy nazorat qilish inspektsiyasi xodimlari joylarda aholi va isteʼmolchilar bilan uchrashuvlar oʻtkazib, amaldagi qonunchilik talablari haqida maʼlumotlar bermoqda. Uchrashuvlarda fuqarolarga ichimlik suvidan foydalanishda shartnomaviy munosabatlarga amal qilish, hisoblagich asboblarini oʻz vaqtida oʻrnatish va noqonuniy harakatlardan tiyilish lozimligi uqtirilmoqda. Zero, suv taʼminoti tizimining barqaror ishlashi, kelgusi avlodlar uchun ham toza va yetarli suv zaxiralarini saqlab qolish har birimizning masʼuliyatimizga bevosita bogʻliq.

Hududlarda nazorat reydlari izchil davom ettirilmoqda. Bu esa suv isrofgarchiligiga chek qoʻyish, sohada qonuniylikni mustahkamlash va aholiga sifatli xizmat koʻrsatishni taʼminlash yoʻlidagi muhim qadamdir.