“ТЎЛҚИН” ОИЛАВИЙ ШИФОКОРЛИК ПУНКТИ: ХАЛҚ САЛОМАТЛИГИ ЙЎЛИДА

Мамлакатимизда соғлиқни сақлаш тизимида амалга оширилаётган ислоҳотлар доирасида бирламчи тиббий муассасалар фаолиятини янада ривожлантиришга алоҳида эътибор қаратилмоқда. Салкам 30 йилдан буён фаолият юритиб келаётган “Тўлқин” оилавий шифокорлик пункти ҳам ана шу эътибор туфайли бугун ҳудуд аҳлининг саломатлигини сақлаш борасида салмоқли натижаларга эришмоқда.

Ўтган йиллар давомида ушбу тиббиёт муассасаси ҳудуд аҳолисига сифатли ва тизимли тиббий хизмат кўрсатиш орқали ўз нуфузини мустаҳкамлади. Бугунги кунда у замонавий талаблар асосида иш олиб бораётган, фидойи ходимларни жамлаган илғор соғлиқни сақлаш масканларидан бири саналади.

Малакали кадрлар – сифат кафолати

Сифатли тиббий хизматнинг асосий мезони малакали кадрлардир. Айни пайтда оилавий шифокорлик пунктида 3 нафар оилавий шифокор ва 1 нафар стоматолог-врач фаолият юритмоқда. Эътиборлиси, шифокорларнинг 2 нафари олий тоифали мутахассис бўлиб, катта тажрибага эга. Шунингдек, муассасада 1 нафар фельдшер, 2 нафар лаборант, 3 нафар доя ва 12 нафар ҳамширадан иборат жонкуяр ўрта тиббиёт ходимлари меҳнат қилмоқда. Улар таркибида 2 нафар олий, 2 нафар биринчи ва 4 нафар иккинчи тоифали мутахассисларнинг борлиги кўрсатилаётган тиббий ёрдам самарадорлигига ижобий таъсир кўрсатмоқда. Ушбу жамоа ҳар бир бемор дардига малҳам бўлишни ўзининг касбий бурчи деб билади.

Рақамларда намоён бўлаётган масъулият

“Тўлқин” оилавий шифокорлик пункти бугунги кунда 769 та хонадонда истиқомат қилувчи жами 6 минг нафардан ортиқ аҳолига хизмат кўрсатмоқда. Бу муассаса ходимлари зиммасига қанчалик катта масъулият юклашини англаш қийин эмас. Аҳолининг демографик таркибига назар ташласак, 1 ёшгача бўлган гўдаклар 125 нафарни, 14 ёшгача бўлган болалар 1888 нафарни, ўсмирлар эса 312 нафарни ташкил этади. Шунингдек, туғиш ёшидаги аёл-қизлар сони 1 минг 512 нафар бўлиб, уларнинг репродуктив саломатлигини муҳофаза қилиш, она ва бола саломатлигини асраш муассаса жамоасининг энг устувор вазифаларидан бири ҳисобланади.

Рақамлаштириш ва замонавий шароитлар

Муассасанинг моддий-техник базаси ҳам босқичма-босқич мустаҳкамланиб бормоқда. Барча хизмат хоналари сўнгги русумдаги компьютер техникаси билан таъминлангани тиббий ҳужжатларни электрон шаклда юритиш, ягона маълумотлар базасини шакллантириш ва хизмат кўрсатиш тезкорлигини оширишга хизмат қилмоқда. Алоҳида эътироф этиш жоизки, 6 нафар патронаж ҳамширанинг замонавий планшетлар билан таъминлангани уларнинг уйма-уй юриб хизмат кўрсатиш жараёнини сезиларли даражада енгиллаштирди ва назорат тизимини такомиллаштирди.

Тиббий масканда беморлар учун рўйхатхона, стоматология, врачлар ва аёллар кўрик хоналари, замонавий таҳлилхона, эмлаш ва муолажа хоналари, шунингдек, кундузги стационар хоналари фаолият юритмоқда. Барча хоналар аҳолига қулай ва сифатли хизмат кўрсатиш учун зарур ускуналар ва санитария-гигиена шароитлари билан тўлиқ таъминланган.

“Тўлқин” оилавий шифокорлик пункти ҳудуд аҳолиси саломатлигини муҳофаза қилиш, касалликларнинг олдини олиш, соғлом турмуш тарзини тарғиб қилиш ва аҳолининг тиббий маданиятни юксалтириш йўлида тизимли иш олиб бораётган маскан сифатида ўз эзгу фаолиятини изчил давом эттирмоқда. Бу ишларнинг замирида инсон қадрини улуғлашдек олий мақсад мужассамдир.

Хўжабой ЭГИЗБОЕВ, оилавий шифокорлик пункти мудири.