Амударёда йўл инфратузилмаси яхшиланмоқда

Мамлакатимизда йўл инфратузилмасини ривожлантириш, ҳудудларни ўзаро боғлаш ва аҳолига қулай транспорт шароитларини яратиш давлат сиёсатининг устувор йўналишларидан бирига айланган. Бу борада амалга оширилаётган кенг кўламли ислоҳотлар жойларда ўзининг амалий ифодасини топиб, ҳар бир ҳудуд қиёфасини янгилашга хизмат қилмоқда. Амударё туманида ҳам йўл хўжалигини ривожлантириш, мавжуд йўлларни таъмирлаш ва янгиларини барпо этиш борасида самарали ишлар олиб борилмоқда.

Бугунги кунда тумандан ўтувчи муҳим транспорт йўналишларидан бири —А380 автомобиль йўли – Қипчоқ пристани – Манғит шаҳри – Тошҳовуз шаҳри – Туркманистон Республикаси чегараси” йўналишидаги автомобиль йўлида кенг кўламли асфальтлаш ишлари олиб борилаётгани бунинг яққол исботидир.

Мазкур йўл узоқ йиллар давомида таъмирталаб ҳолатда бўлиб, автотранспорт воситаларининг эркин ва хавфсиз ҳаракатланиши учун қийинчилик туғдириб келаётган эди. Айниқса, йўл қопламасининг эскиргани сабабли ҳайдовчилар ва пиёдалар учун ноқулайликлар, ҳатто хавф-хатарли вазиятлар юзага келаётгани кўп бора кузатилган.

Ҳозирда олиб борилаётган асфальтлаш ишлари замонавий талаблар асосида, сифат ва мустаҳкамликни таъминлашга қаратилган ҳолда амалга оширилмоқда. Натижада яқин кунларда ушбу йўл орқали ҳаракатланиш янада қулай ва хавфсиз бўлиши кутилмоқда.

Рақамларга мурожаат қиладиган бўлсак, бугунги кунда Амударё тумани ҳудудида жами 1 438 километр узунликдаги автомобиль йўллари мавжуд. Шундан 319 километри Амударё тумани йўллардан фойдаланиш давлат муассасаси балансида бўлган умумий фойдаланишдаги йўллардир. Ушбу йўлларнинг 71 километри давлат аҳамиятига эга бўлса, 248 километри маҳаллий аҳамиятдаги автомобиль йўлларидан иборат.

Афсуски, мавжуд йўлларнинг 160 километри таъмирталаб ҳолатда бўлиб, бунинг асосий сабабларидан бири сифатида юк автомобилларининг белгиланган меъёрлардан ортиқча юк билан ҳаракатланишидир. Бу эса йўл қопламасининг тезда ишдан чиқишига олиб келмоқда.

Шунга қарамай, 2025 йил давомида туманда йўл қурилиши ва таъмири борасида сезиларли ишлар амалга оширилди. Хусусан, қарийб 200 километр узуликдаги йўлда турли кўламдаги таъмирлаш ва сақлаш ишлари олиб борилди. Давлат бюджети маблағлари ҳисобидан 11,1 километр автомобиль йўлига асфальт-бетон қопламаси ётқизилди. 22 километр йўлда нуқсонларни бартараф этиш мақсадида ўй-чуқурлар картасимон усулда таъмирланди.

“Ташаббусли бюджет” лойиҳаси доирасида ҳам муҳим ишлар бажарилди. Жумладан, лойиҳанинг 2025 йилги 1-мавсумида 14,2 километр, 2-мавсумида эса 6,2 километр йўл асфальтланди. Бундан ташқари, яна 7,4 километр йўлда асфальтлаш ишлари амалга оширилиши режалаштирилган.

Кўприклар ҳолатини яхшилашга ҳам алоҳида эътибор қаратилмоқда. Тумандаги авария ҳолатидаги 3 та кўприкда таъмирлаш ишлари бошланган бўлиб, уларнинг 2 таси аллақачон фойдаланишга топширилди.

Аҳолини узоқ йиллар давомида қийнаб келган муаммолардан бири — тупроқ қопламали ички йўллар масаласига ҳам ечим топилмоқда. Хусусан, 127 километр узунликдаги ички йўлларга қум-шағал аралашмаси ётқизилди. Бундан ташқари, 11 километр ички хўжалик йўллари ҳам таъмирланди.

Келгусида амалга ошириладиган ишлар ҳам кенг кўламни қамраб олади. 2026 йил учун белгиланган режаларга кўра, ушбу йилни Амударё тумани учун йўл инфратузилмасини ривожлантиришда муҳим босқич, десак муболаға бўлмайди. Режага мувофиқ, 305 километрдан ортиқ автомобиль йўллари ҳамда авария ҳолатидаги 6 та кўприкда таъмирлаш ишлари амалга оширилади.

Жумладан, Манғит шаҳридан Қиличбой овулига олиб борувчи 18 километр, Куюк кўпир овулидан Жумуртов шаҳарчасига олиб борувчи 9 километр, Манғит шаҳридан Амир Темур номли овулга олиб борувчи 6 километр йўл ҳамда Қизилчали маҳалласи ҳудудидаги 0,5 километр йўл таъмирланади.

Шунингдек, умумий фойдаланишдаги 50 километр йўлда ўй-чуқурларни бартараф этиш ишлари олиб борилади. “Ташаббусли бюджет” лойиҳаси доирасида аҳоли билан ҳамкорликда яна 22 километр йўлни асфальтлаш режалаштирилган. Фуқароларнинг мурожаатлари ва сайёр қабуллар натижаларига асосан эса 200 километрдан ортиқ тупроқ қопламали ички хўжалик йўлларига қум-шағал аралашмасини ётқизиш кўзда тутилган.

Хулоса қилиб айтганда, Амударё туманида йўл инфратузилмасини яхшилаш, транспорт ҳаракати хавфсизлигини таъминлаш ва аҳолига янада қулай шароит яратиш борасида олиб борилаётган ишлар изчил ва тизимли равишда давом этмоқда. Бу эса нафақат бугунги кун, балки келажак авлодлар учун ҳам қулай инфратузилма яратишдек хайрли мақсадга хизмат қилади. 

Чарос Арслонова, туман ҳокимлигининг Ахборот хизмати раҳбари.