Ёшлар бандлигини таъминлаш ва қўллаб-қувватлаш — асосий вазифа

Пайшанба куни мамлакатимизда кенг нишонланадиган Ёшлар куни муносабати билан Амударё туманида яна бир муҳим ва мазмунли ташриф амалга оширилди. Туман ҳокими Собир Хўжаметов Хитой овулида жойлашган 85-сонли умумтаълим мактабида бўлиб, ёшлар учун яратилган шарт-шароитлар билан яқиндан танишди. Бу ташриф нафақат расмий назорат, балки ёшлар ҳаёти, уларнинг орзу-интилишлари ва келажаги билан бевосита қизиқиш ифодаси бўлди.

Мактаб ҳудудида яратилган имкониятлар, хусусан, спорт зали, замонавий жиҳозлар, турли тўгараклар фаолияти алоҳида эътибор билан кўздан кечирилди. Бугунги кунда ёш авлоднинг нафақат билимли, балки жисмонан соғлом бўлиб вояга етиши давлат сиёсатининг устувор йўналишларидан биридир. Шу боис ўқувчиларнинг спортга бўлган қизиқиши, уларнинг бўш вақтини мазмунли ташкил этиш борасида амалга оширилаётган ишлар таҳлил қилинди.

Ташриф давомида масъулларга аниқ вазифалар юклатилди. Хусусан, ёшларни соғлом турмуш тарзига кенг жалб этиш, иқтидорли ўқувчиларни қўллаб-қувватлаш, уларнинг қизиқишларини рўёбга чиқариш учун янада кенгроқ имкониятлар яратиш зарурлиги таъкидланди. Бу эса келажакда баркамол, фаол ва ташаббускор авлодни тарбиялаш йўлида муҳим қадам бўлиб хизмат қилади.

Туман ҳокими ташриф доирасида ҳудуддаги ёш тадбиркорлар фаолияти билан ҳам танишди. Хусусан, Асадбек Кенжаев томонидан йўлга қўйилган автомактаб фаолияти ўрганилди. У имтиёзли кредитдан оқилона фойдаланиб, нафақат ўз бизнесини йўлга қўйган, балки бошқа ёшларга ҳам касб ўрганиш, ҳайдовчилик кўникмаларини эгаллаш имконини яратган. Бу ташаббус ҳудудда ёшлар бандлигини таъминлашда муҳим омил бўлиб хизмат қилаётгани алоҳида қайд этилди.

Яна бир ибратли мисол сифатида Хитой овули ҳудудида истиқомат қилувчи ёш тадбиркор Оғабек Собировнинг фаолияти эътирофга сазовор. У маҳалла томонидан ажратилган имтиёзли кредитдан самарали фойдаланиб, иссиқхона ташкил этган, шу билан бирга чорвачилик йўналишида қўй парваришини ҳам йўлга қўйган. Ушбу ташаббус орқали у нафақат ўз бандлигини таъминлади, балки даромад манбаини кенгайтириб, атрофидаги ёшларга ҳам ўрнак бўлиб келмоқда. Бу каби саъй-ҳаракатлар қишлоқ жойларда тадбиркорлик муҳитини ривожлантиришда муҳим аҳамият касб этади.

Ташриф давомида Хитой ОФЙ биносида ёшлар билан очиқ мулоқот ҳам ташкил этилди. Унда туман раҳбарияти, тегишли ташкилотлар масъуллари ҳамда Бўзёп, Хитой, Торёп ва Куюк кўпир ҳудудларида яшовчи ёшлар иштирок этди. Самимий руҳда ўтган учрашувда ёшлар ўзларини қийнаётган муаммоларни, таклиф ва ташаббусларини эркин баён этдилар.

Айниқса, бандликни таъминлаш, тадбиркорликни ривожлантириш, имтиёзли кредитлар олиш, касб-ҳунар ўрганиш ва бўш вақтни мазмунли ташкил этиш масалалари кенг муҳокама қилинди. Ҳар бир мурожаат эътибордан четда қолмади — мутасаддилар томонидан аниқ жавоблар берилиб, амалий ёрдам кўрсатиш юзасидан тегишли чоралар белгиланди.

Якунда ёшларни ҳар томонлама қўллаб-қувватлаш, уларнинг ташаббусларини рўёбга чиқариш, жамиятда ўз ўрнини топишига кўмаклашиш борасидаги ишларни янада кучайтириш зарурлиги алоҳида таъкидланди.

Ҳудудларда ташкил этилаётган бундай учрашувлар ва ташрифлар раҳбарларнинг ёшлар ҳаётига бефарқ эмаслигининг амалий ифодасидир. Чунки бугунги эътибор — эртанги тараққиёт пойдевори. Ёшлар учун яратилаётган имкониятлар эса юрт келажагини порлоқ этишга хизмат қилади.

Чарос Арслонова, туман ҳокимлигининг Ахборот хизмати раҳбари.