Yoshlar bandligini taʼminlash va qoʻllab-quvvatlash — asosiy vazifa

Payshanba kuni mamlakatimizda keng nishonlanadigan Yoshlar kuni munosabati bilan Amudaryo tumanida yana bir muhim va mazmunli tashrif amalga oshirildi. Tuman hokimi Sobir Xoʻjametov Xitoy ovulida joylashgan 85-sonli umumtaʼlim maktabida boʻlib, yoshlar uchun yaratilgan shart-sharoitlar bilan yaqindan tanishdi. Bu tashrif nafaqat rasmiy nazorat, balki yoshlar hayoti, ularning orzu-intilishlari va kelajagi bilan bevosita qiziqish ifodasi boʻldi.

Maktab hududida yaratilgan imkoniyatlar, xususan, sport zali, zamonaviy jihozlar, turli toʻgaraklar faoliyati alohida eʼtibor bilan koʻzdan kechirildi. Bugungi kunda yosh avlodning nafaqat bilimli, balki jismonan sogʻlom boʻlib voyaga yetishi davlat siyosatining ustuvor yoʻnalishlaridan biridir. Shu bois oʻquvchilarning sportga boʻlgan qiziqishi, ularning boʻsh vaqtini mazmunli tashkil etish borasida amalga oshirilayotgan ishlar tahlil qilindi.

Tashrif davomida masʼullarga aniq vazifalar yuklatildi. Xususan, yoshlarni sogʻlom turmush tarziga keng jalb etish, iqtidorli oʻquvchilarni qoʻllab-quvvatlash, ularning qiziqishlarini roʻyobga chiqarish uchun yanada kengroq imkoniyatlar yaratish zarurligi taʼkidlandi. Bu esa kelajakda barkamol, faol va tashabbuskor avlodni tarbiyalash yoʻlida muhim qadam boʻlib xizmat qiladi.

Tuman hokimi tashrif doirasida hududdagi yosh tadbirkorlar faoliyati bilan ham tanishdi. Xususan, Asadbek Kenjayev tomonidan yoʻlga qoʻyilgan avtomaktab faoliyati oʻrganildi. U imtiyozli kreditdan oqilona foydalanib, nafaqat oʻz biznesini yoʻlga qoʻygan, balki boshqa yoshlarga ham kasb oʻrganish, haydovchilik koʻnikmalarini egallash imkonini yaratgan. Bu tashabbus hududda yoshlar bandligini taʼminlashda muhim omil boʻlib xizmat qilayotgani alohida qayd etildi.

Yana bir ibratli misol sifatida Xitoy ovuli hududida istiqomat qiluvchi yosh tadbirkor Ogʻabek Sobirovning faoliyati eʼtirofga sazovor. U mahalla tomonidan ajratilgan imtiyozli kreditdan samarali foydalanib, issiqxona tashkil etgan, shu bilan birga chorvachilik yoʻnalishida qoʻy parvarishini ham yoʻlga qoʻygan. Ushbu tashabbus orqali u nafaqat oʻz bandligini taʼminladi, balki daromad manbaini kengaytirib, atrofidagi yoshlarga ham oʻrnak boʻlib kelmoqda. Bu kabi saʼy-harakatlar qishloq joylarda tadbirkorlik muhitini rivojlantirishda muhim ahamiyat kasb etadi.

Tashrif davomida Xitoy OFY binosida yoshlar bilan ochiq muloqot ham tashkil etildi. Unda tuman rahbariyati, tegishli tashkilotlar masʼullari hamda Boʻzyop, Xitoy, Toryop va Kuyuk koʻpir hududlarida yashovchi yoshlar ishtirok etdi. Samimiy ruhda oʻtgan uchrashuvda yoshlar oʻzlarini qiynayotgan muammolarni, taklif va tashabbuslarini erkin bayon etdilar.

Ayniqsa, bandlikni taʼminlash, tadbirkorlikni rivojlantirish, imtiyozli kreditlar olish, kasb-hunar oʻrganish va boʻsh vaqtni mazmunli tashkil etish masalalari keng muhokama qilindi. Har bir murojaat eʼtibordan chetda qolmadi — mutasaddilar tomonidan aniq javoblar berilib, amaliy yordam koʻrsatish yuzasidan tegishli choralar belgilandi.

Yakunda yoshlarni har tomonlama qoʻllab-quvvatlash, ularning tashabbuslarini roʻyobga chiqarish, jamiyatda oʻz oʻrnini topishiga koʻmaklashish borasidagi ishlarni yanada kuchaytirish zarurligi alohida taʼkidlandi.

Hududlarda tashkil etilayotgan bunday uchrashuvlar va tashriflar rahbarlarning yoshlar hayotiga befarq emasligining amaliy ifodasidir. Chunki bugungi eʼtibor — ertangi taraqqiyot poydevori. Yoshlar uchun yaratilayotgan imkoniyatlar esa yurt kelajagini porloq etishga xizmat qiladi.

Charos Arslonova, tuman hokimligining Axborot xizmati rahbari.