Маҳалла еттилигининг ҳамжиҳатлиги – фаровонлик гарови

Мамлакатимизнинг чекка ҳудудларида амалга оширилаётган кенг кўламли ислоҳотлар, энг аввало, маҳаллабай ишлаш тизимининг қанчалик самарали эканлигини яққол намоён этмоқда. Амударё туманининг Тўлқин овул фуқаролар йиғини мисолида ҳам ушбу фикрларнинг ҳаётий исботини кўриш мумкин. Тўлқин овулида ҳозирги кунда 1 минг 623 та хонадон мавжуд бўлиб, уларда 2 минг 238 оила, жами 8 минг 783 нафар аҳоли тинч ва фаровон истиқомат қилиб келмоқда. Овул фуқаролар йиғини раиси Фахриддин Жумабеков, ҳоким ёрдамчиси Руслан Сағинбаев, хотин-қизлар фаоли Гавҳар Бабатаева, ёшлар етакчиси Фозилбек Қурбонбоев, профилактика инспектори Маъруфат Тоқлибоев, солиқ инспектори Зулхумор Юлдашева ҳамда ижтимоий ходим Дилфуза Абдуллаевалардан иборат “Маҳалла еттилиги” ўзаро ҳамжиҳатликда, бир ёқадан бош чиқариб самарали фаолият юритмоқдалар ва юқори натижаларга эришмоқдалар.

Овул аҳолисининг кундалик эҳтиёжларини қондириш мақсадида маҳалла ҳудудида кўплаб ижтимоий ва маиший объектлар фаолияти йўлга қўйилган. Хусусан, келажак авлод таълим-тарбияси учун 3 та умумтаълим мактаби ва 5 та мактабгача таълим ташкилоти хизмат кўрсатмоқда. Бундан ташқари, ҳудудда 7 та озиқ-овқат дўкони, 2 та сартарошхона, шунингдек, аҳолига тоза ичимлик сувини етказиб бериш ва тозалашга мўлжалланган 6 та шохобча муваффақиятли фаолият юритмоқда.

Овулда ижтимоий ҳимояга муҳтож аҳоли қатлами ҳам доимий эътибор марказида. Жумладан, 15 та эҳтиёжманд оилага зарур ёрдам кўрсатилди, 20 нафар фуқаро эса тегишли нафақа ва моддий ёрдам олишга йўналтирилди. Эътиборли жиҳати шундаки, “Тўлқин” овулида истиқомат қилувчи жами 4 минг 425 нафар хотин-қизлардан 30 ёшдан юқори бўлган, ижтимоий ҳимояга муҳтож 146 нафари хатлов асосида 2026 йилги “Аёллар дафтари”нинг еттинчи босқичига киритилди ва уларга манзилли ёрдам кўрсатиш тизими йўлга қўйилди.

Овул ёшларининг бўш вақтини мазмунли ўтказиш ва уларни спортга жалб қилиш борасида ташкиллаштирилаётган ишлар ҳам таҳсинга лойиқ. Ёшлар етакчисининг амалий кўмаги билан тунги вақтларда мактаб спорт залларида баскетбол, волейбол ва мини-футбол бўйича мусобақалар, шунингдек, турли кўрик-танловлар мунтазам ўтказиб келинмоқда. Натижада овул ёшлари спорт соҳасида салмоқди ютуқларга эришиб келмоқда. 2022 йилда тўлқинлик ёшлар стритбол бўйича “Беш ташаббус олимпиадаси”нинг Республика босқичида фахрли 2-ўринни эгаллаб, ҳудудда замонавий спорт майдончаси қуриш учун маблағ ютиб олишга муваффақ бўлишган эди. Бугунги кунда ёшлар ушбу майдончадан самарали фойдаланмоқда.

Овул ёшларидан тузилган футбол жамоаси эса Давлат хавфсизлик хизмати кубоги мусобақаларида кетма-кет уч йил – 2023, 2024 ва 2025 йилларда туман босқичи ғолиби бўлди. Бундан ташқари, 2024 йилда Қорақалпоғистон Республикаси кубогини ҳам қўлга киритди. 2025 йилда Мустақиллик байрами муносабати билан ўтказилган ҳоким кубоги ва 2026 йил Наврўз байрами арафасидаги мини-футбол бўйича чемпионат ғалабалари билан жамоанинг умумий совринлари сони олтита кубокка етди.

Спортдан ташқари ҳунармандчиликда ҳам ёшлар юқори натижаларга эришмоқдалар. Овулда яшовчи сартарош Ҳакимбек Ўтамуратов жорий йилнинг 27 март куни Нукус шаҳрида Ўзбекистон Сартарошлар ва пардозчилар ассоциацияси томонидан ташкил этилган мусобақада “мастерлар” йўналиши бўйича фахрли 3-ўринни қўлга киритди.

Ёшларни ҳар томонлама қўллаб-қувватлаш ва уларнинг келажагига пойдевор яратиш мақсадида овулда яшовчи 33 нафар талабанинг шартнома тўловлари тўлаб берилди. “Келажак касблари” лойиҳаси доирасида 4 нафар ёш замонавий касбларга ўргатувчи марказларда таҳсил олди, 10 нафари касб-ҳунарли бўлди ва яна 10 нафари доимий иш билан таъминланди. Тадбиркорликка қизиқувчи 5 нафар ёшга жами 24 миллион сўм миқдорида субсидия ажратилди. Шунингдек, 2 нафар йигитнинг сафарбарлик чақируви резервидаги хизмат бадали, 4 нафарининг фуқаролик паспорти ҳамда яна 4 нафар ёшнинг ҳайдовчилик гувоҳномасини олиш харажатларининг бир қисми қоплаб берилди.

Қишлоқ хўжалиги билан шуғулланиш истагида бўлган 156 нафар ёшга 10 ва 30 йил муддатга ижара асосида ер майдонлари ажратилди. 29 нафар йигит-қизга жами 516 миллион сўм, шунингдек, йирик лойиҳалар учун 2 нафар ёшга 150 миллион сўмлик имтиёзли кредитлар ажратилди.

Иқтисодий ривожланиш ва аҳоли бандлигини таъминлаш борасида ҳоким ёрдамчисининг кўмаги билан жорий йилнинг дастлабки 3 ойи давомида 15 нафар ишсиз фуқарога жами 580 миллион сўм миқдорида имтиёзли кредитлар ажратилди. Умумий ҳисобда 26 нафар фуқаро ўзини-ўзи банд қилиб, 14 нафари доимий иш жойига эга бўлди. Миграциядан қайтган 2 нафар фуқарога кредит маблағлари олишга кўмаклашилди. Йил бошидан буён ҳудудда 7 та янги тадбиркорлик субъекти ўз фаолиятини бошлади.

Деҳқон хўжаликлари ва экспорт қилувчи корхоналар, брокерлар ҳамкорлигини таъминлаш орқали томорқадан унумли фойдаланиш тажрибаси оммалашмоқда. Жумладан, овулда яшовчи Азим Мухторов 8 сотихли иссиқхонасида помидор, 25 сотих очиқ майдонда эса карам етиштириб, оиласига юқори даромад келтирмоқда. Яна бир миришкор Бахтиёр Мухтаров ҳам 6 сотихли иссиқхонасида помидор парваришини йўлга қўйган.

Фуқаролар йиғини раиси Фахриддин Жумабеков бошчилигида “Маҳалла еттилиги” аъзолари ҳудуддаги йирик фермерлар билан ҳам доимий мулоқотда бўлиб, муаммоларни биргаликда ҳал этмоқда. “Хидиров Самад” фермер хўжалиги 38 гектар ерда пахта ва 35 гектар майдонда ғалла етиштирмоқда. Айни кунларда ушбу далаларда чигитларнинг бир текис униб чиқаётгани келгуси мўл ҳосилдан дарак бериб турибди.

Иқтисодий барқароркни таъминловчи муҳим омиллардан бири бу солиқ тушумларидир. Овулда мол-мулк ва ер солиғи тўловларининг ўз вақтида ундирилиши қатъий назоратга олинган. Ҳудуд бўйича жами ҳисобланган 375 миллион сўмликдан ортиқ солиқлардан бугунги кунга қадар 340 миллион сўмдан ортиғи ўз вақтида маҳаллий бюджетга ундирилди.

Ижтимоий қўллаб-қувватлаш йўналишида март ойи ҳолатига кўра, 208 та кам таъминланган оила болалар пули ва моддий ёрдам олмоқда. Ҳудудда истиқомат қилувчи 273 нафар ногиронлиги бўлган шахс ва уй таълимида ўқиётган 3 нафар бола доимий эътибор марказида.

Хулоса ўрнида шуни таъкидлаш жоизки, Тўлқин овулидаги “Маҳалла еттилиги” аъзоларининг ўзаро жипслашган ҳолда, тизимли олиб бораётган саъй-ҳаракатлари бугун ўз мевасини бермоқда. Ҳудудни ижтимоий-иқтисодий ривожлантириш, янги иш ўринларини яратиш, тадбиркорликни қўллаб-қувватлаш, хотин-қизлар ва ёшлар муаммоларини ҳал этиш ҳамда ҳудудни жиноятчиликдан холи, обод масканга айлантириш борасидаги бундай ибратли ишлар мамлакатимизда олиб борилаётган халқчил сиёсатнинг энг қуйи бўғиндаги ёрқин ва амалий ифодасидир.