Mahalla yettiligining hamjihatligi – farovonlik garovi

Mamlakatimizning chekka hududlarida amalga oshirilayotgan keng koʻlamli islohotlar, eng avvalo, mahallabay ishlash tizimining qanchalik samarali ekanligini yaqqol namoyon etmoqda. Amudaryo tumanining Toʻlqin ovul fuqarolar yigʻini misolida ham ushbu fikrlarning hayotiy isbotini koʻrish mumkin. Toʻlqin ovulida hozirgi kunda 1 ming 623 ta xonadon mavjud boʻlib, ularda 2 ming 238 oila, jami 8 ming 783 nafar aholi tinch va farovon istiqomat qilib kelmoqda. Ovul fuqarolar yigʻini raisi Faxriddin Jumabekov, hokim yordamchisi Ruslan Sagʻinbayev, xotin-qizlar faoli Gavhar Babatayeva, yoshlar yetakchisi Fozilbek Qurbonboyev, profilaktika inspektori Maʼrufat Toqliboyev, soliq inspektori Zulxumor Yuldasheva hamda ijtimoiy xodim Dilfuza Abdullayevalardan iborat “Mahalla yettiligi” oʻzaro hamjihatlikda, bir yoqadan bosh chiqarib samarali faoliyat yuritmoqdalar va yuqori natijalarga erishmoqdalar.

Ovul aholisining kundalik ehtiyojlarini qondirish maqsadida mahalla hududida koʻplab ijtimoiy va maishiy obʼektlar faoliyati yoʻlga qoʻyilgan. Xususan, kelajak avlod taʼlim-tarbiyasi uchun 3 ta umumtaʼlim maktabi va 5 ta maktabgacha taʼlim tashkiloti xizmat koʻrsatmoqda. Bundan tashqari, hududda 7 ta oziq-ovqat doʻkoni, 2 ta sartaroshxona, shuningdek, aholiga toza ichimlik suvini yetkazib berish va tozalashga moʻljallangan 6 ta shoxobcha muvaffaqiyatli faoliyat yuritmoqda.

Ovulda ijtimoiy himoyaga muhtoj aholi qatlami ham doimiy eʼtibor markazida. Jumladan, 15 ta ehtiyojmand oilaga zarur yordam koʻrsatildi, 20 nafar fuqaro esa tegishli nafaqa va moddiy yordam olishga yoʻnaltirildi. Eʼtiborli jihati shundaki, “Toʻlqin” ovulida istiqomat qiluvchi jami 4 ming 425 nafar xotin-qizlardan 30 yoshdan yuqori boʻlgan, ijtimoiy himoyaga muhtoj 146 nafari xatlov asosida 2026-yilgi “Ayollar daftari”ning yettinchi bosqichiga kiritildi va ularga manzilli yordam koʻrsatish tizimi yoʻlga qoʻyildi.

Ovul yoshlarining boʻsh vaqtini mazmunli oʻtkazish va ularni sportga jalb qilish borasida tashkillashtirilayotgan ishlar ham tahsinga loyiq. Yoshlar yetakchisining amaliy koʻmagi bilan tungi vaqtlarda maktab sport zallarida basketbol, voleybol va mini-futbol boʻyicha musobaqalar, shuningdek, turli koʻrik-tanlovlar muntazam oʻtkazib kelinmoqda. Natijada ovul yoshlari sport sohasida salmoqdi yutuqlarga erishib kelmoqda. 2022-yilda toʻlqinlik yoshlar stritbol boʻyicha “Besh tashabbus olimpiadasi”ning Respublika bosqichida faxrli 2-oʻrinni egallab, hududda zamonaviy sport maydonchasi qurish uchun mablagʻ yutib olishga muvaffaq boʻlishgan edi. Bugungi kunda yoshlar ushbu maydonchadan samarali foydalanmoqda.

Ovul yoshlaridan tuzilgan futbol jamoasi esa Davlat xavfsizlik xizmati kubogi musobaqalarida ketma-ket uch yil – 2023, 2024 va 2025-yillarda tuman bosqichi gʻolibi boʻldi. Bundan tashqari, 2024-yilda Qoraqalpogʻiston Respublikasi kubogini ham qoʻlga kiritdi. 2025-yilda Mustaqillik bayrami munosabati bilan oʻtkazilgan hokim kubogi va 2026-yil Navroʻz bayrami arafasidagi mini-futbol boʻyicha chempionat gʻalabalari bilan jamoaning umumiy sovrinlari soni oltita kubokka yetdi.

Sportdan tashqari hunarmandchilikda ham yoshlar yuqori natijalarga erishmoqdalar. Ovulda yashovchi sartarosh Hakimbek Oʻtamuratov joriy yilning 27-mart kuni Nukus shahrida Oʻzbekiston Sartaroshlar va pardozchilar assotsiatsiyasi tomonidan tashkil etilgan musobaqada “masterlar” yoʻnalishi boʻyicha faxrli 3-oʻrinni qoʻlga kiritdi.

Yoshlarni har tomonlama qoʻllab-quvvatlash va ularning kelajagiga poydevor yaratish maqsadida ovulda yashovchi 33 nafar talabaning shartnoma toʻlovlari toʻlab berildi. “Kelajak kasblari” loyihasi doirasida 4 nafar yosh zamonaviy kasblarga oʻrgatuvchi markazlarda tahsil oldi, 10 nafari kasb-hunarli boʻldi va yana 10 nafari doimiy ish bilan taʼminlandi. Tadbirkorlikka qiziquvchi 5 nafar yoshga jami 24 million soʻm miqdorida subsidiya ajratildi. Shuningdek, 2 nafar yigitning safarbarlik chaqiruvi rezervidagi xizmat badali, 4 nafarining fuqarolik pasporti hamda yana 4 nafar yoshning haydovchilik guvohnomasini olish xarajatlarining bir qismi qoplab berildi.

Qishloq xoʻjaligi bilan shugʻullanish istagida boʻlgan 156 nafar yoshga 10 va 30-yil muddatga ijara asosida yer maydonlari ajratildi. 29 nafar yigit-qizga jami 516 million soʻm, shuningdek, yirik loyihalar uchun 2 nafar yoshga 150 million soʻmlik imtiyozli kreditlar ajratildi.

Iqtisodiy rivojlanish va aholi bandligini taʼminlash borasida hokim yordamchisining koʻmagi bilan joriy yilning dastlabki 3 oyi davomida 15 nafar ishsiz fuqaroga jami 580 million soʻm miqdorida imtiyozli kreditlar ajratildi. Umumiy hisobda 26 nafar fuqaro oʻzini-oʻzi band qilib, 14 nafari doimiy ish joyiga ega boʻldi. Migratsiyadan qaytgan 2 nafar fuqaroga kredit mablagʻlari olishga koʻmaklashildi. Yil boshidan buyon hududda 7 ta yangi tadbirkorlik subʼekti oʻz faoliyatini boshladi.

Dehqon xoʻjaliklari va eksport qiluvchi korxonalar, brokerlar hamkorligini taʼminlash orqali tomorqadan unumli foydalanish tajribasi ommalashmoqda. Jumladan, ovulda yashovchi Azim Muxtorov 8 sotixli issiqxonasida pomidor, 25 sotix ochiq maydonda esa karam yetishtirib, oilasiga yuqori daromad keltirmoqda. Yana bir mirishkor Baxtiyor Muxtarov ham 6 sotixli issiqxonasida pomidor parvarishini yoʻlga qoʻygan.

Fuqarolar yigʻini raisi Faxriddin Jumabekov boshchiligida “Mahalla yettiligi” aʼzolari hududdagi yirik fermerlar bilan ham doimiy muloqotda boʻlib, muammolarni birgalikda hal etmoqda. “Xidirov Samad” fermer xoʻjaligi 38 gektar yerda paxta va 35 gektar maydonda gʻalla yetishtirmoqda. Ayni kunlarda ushbu dalalarda chigitlarning bir tekis unib chiqayotgani kelgusi moʻl hosildan darak berib turibdi.

Iqtisodiy barqarorkni taʼminlovchi muhim omillardan biri bu soliq tushumlaridir. Ovulda mol-mulk va yer soligʻi toʻlovlarining oʻz vaqtida undirilishi qatʼiy nazoratga olingan. Hudud boʻyicha jami hisoblangan 375 million soʻmlikdan ortiq soliqlardan bugungi kunga qadar 340 million soʻmdan ortigʻi oʻz vaqtida mahalliy byudjetga undirildi.

Ijtimoiy qoʻllab-quvvatlash yoʻnalishida mart oyi holatiga koʻra, 208 ta kam taʼminlangan oila bolalar puli va moddiy yordam olmoqda. Hududda istiqomat qiluvchi 273 nafar nogironligi boʻlgan shaxs va uy taʼlimida oʻqiyotgan 3 nafar bola doimiy eʼtibor markazida.

Xulosa oʻrnida shuni taʼkidlash joizki, Toʻlqin ovulidagi “Mahalla yettiligi” aʼzolarining oʻzaro jipslashgan holda, tizimli olib borayotgan saʼy-harakatlari bugun oʻz mevasini bermoqda. Hududni ijtimoiy-iqtisodiy rivojlantirish, yangi ish oʻrinlarini yaratish, tadbirkorlikni qoʻllab-quvvatlash, xotin-qizlar va yoshlar muammolarini hal etish hamda hududni jinoyatchilikdan xoli, obod maskanga aylantirish borasidagi bunday ibratli ishlar mamlakatimizda olib borilayotgan xalqchil siyosatning eng quyi boʻgʻindagi yorqin va amaliy ifodasidir.