Спорт вазири билан ёшлар ўртасида очиқ мулоқот ўтказилди
Мамлакатимизда эртамиз эгаларининг ҳар томонлама баркамол униб-ўсиши, уларнинг истеъдод ва салоҳиятларини тўлақонли рўёбга чиқариш учун барча зарур шарт-шароитлар яратилмоқда. Хусусан, давлатимиз раҳбари томонидан жорий йилнинг 24 февраль куни ёшлар билан ўтказилган очиқ мулоқот давомида бир қатор муҳим ташаббуслар илгари сурилган эди. Учрашувда ҳар ҳафтанинг пайшанба кунини юртимизда “Ёшлар куни” сифатида ўтказиш, барча даражадаги раҳбарларнинг бевосита ёшлар билан учрашиб, уларни қийнаётган масалаларни тинглаши, муаммо ва таклифларни бевосита жойида ўрганиб, уларга амалий ечимлар ишлаб чиқиш вазифаси қатъий белгилаб берилди. Бугунги кунда мазкур ташаббус амалда ўз ижросини топмоқда ва бу йўналишда Спорт вазирлиги тизимида ҳам изчил, тизимли ишлар олиб бориляпти.
Ёшларнинг овозини эшитиш, уларнинг спортдаги ютуқларини рағбатлантириш ва мавжуд тўсиқларни биргаликда бартараф этиш мақсадида белгиланган вазифалар ижросини таъминлаш йўлида жойларда қатор ижобий ишлар амалга оширилмоқда. Ана шундай тадбирлардан бири Амударё туманида ҳам ўтказилди.
Ҳудуддаги спортчи ёшлар ва соҳа мутасаддиларини бир жойга жамлаган ушбу учрашувда Қорақалпоғистон Республикаси Спорт вазири Еркинбай Қутибаев бевосита иштирок этиб, келажак чемпионлари билан юзма-юз, самимий суҳбат қилди. Ушбу жараёнда мутасадди раҳбарларнинг ёшлар вакиллари билан бевосита мулоқотга киришиши уларнинг интилишларига катта руҳий мадад берди.
Тадбирда, шунингдек, Амударё тумани ҳокими ўринбосари Нодирбек Камолов ҳамда Амударё тумани Спорт мактаби директори Жасур Яхшимов ва туманнинг фаол спортчи ёшлари иштирок этиб, соҳадаги бугунги ҳолат ва истиқболдаги режалар юзасидан ўз фикр-мулоҳазалари билан ўртоқлашдилар.
Учрашув давомида асосий эътибор ёш спортчилар томонидан илгари сурилган таклифлар ва уларни қийнаётган баъзи муаммоларни атрофлича муҳокама қилишга қаратилди. Ҳар бир спортчининг фикри диққат билан тингланди ва ўртага ташланган ҳар бир масала бўйича раҳбарлар томонидан аниқ, асосли жавоблар қайтарилди. Муаммоларни пайдо бўлган жойининг ўзидаёқ тезкорлик билан бартараф этиш ва ёшларнинг истиқболли лойиҳаларини ҳаётга татбиқ қилиш бўйича тегишли чора-тадбирлар ҳамда истиқболли режалар белгилаб олинди.
Айтиш жоизки, давлатимиз томонидан илгари сурилган ташаббуслар бугун чекка ҳудудларда ҳам ўз меваларини бермоқда. Раҳбарлар ва ёшлар ўртасидаги бундай узвий алоқалар эртамиз эгаларининг жамиятдаги ўрнини мустаҳкамлашга, уларнинг спортда ва ҳаётда ўз мақсадлари сари дадил одимлашига хизмат қилади. Ўз наватида бу каби очиқ мулоқот майдонлари ёшларга ўз устида янада кўпроқ ишлашга, янгидан-янги марраларни забт этишга беқиёс мотивация беради.
Амударё туманида бўлиб ўтган мазкур учрашув спортчи ёшларнинг эртанги кунга бўлган ишончини янада оширди ва уларни янги ғалабалар сари руҳлантирди. Зеро, ёшларнинг дардини вақтида эшитиш ва уларга ечим топиш — бу нафақат бугунги куннинг талаби, балки порлоқ келажак пойдеворини яратиш йўлидаги энг муҳим қадамлардан биридир. Мамлакатимизнинг ҳар бир гўшасида мана шундай эътибор ва ғамхўрлик давом этар экан, юртимиз байроғини жаҳон ареналарида баланд кўтарадиган янги-янги чемпионлар етишиб чиқиши муқаррар.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
