Sport vaziri bilan yoshlar oʻrtasida ochiq muloqot oʻtkazildi

Mamlakatimizda ertamiz egalarining har tomonlama barkamol unib-oʻsishi, ularning isteʼdod va salohiyatlarini toʻlaqonli roʻyobga chiqarish uchun barcha zarur shart-sharoitlar yaratilmoqda. Xususan, davlatimiz rahbari tomonidan joriy yilning 24-fevral kuni yoshlar bilan oʻtkazilgan ochiq muloqot davomida bir qator muhim tashabbuslar ilgari surilgan edi. Uchrashuvda har haftaning payshanba kunini yurtimizda “Yoshlar kuni” sifatida oʻtkazish, barcha darajadagi rahbarlarning bevosita yoshlar bilan uchrashib, ularni qiynayotgan masalalarni tinglashi, muammo va takliflarni bevosita joyida oʻrganib, ularga amaliy yechimlar ishlab chiqish vazifasi qatʼiy belgilab berildi. Bugungi kunda mazkur tashabbus amalda oʻz ijrosini topmoqda va bu yoʻnalishda Sport vazirligi tizimida ham izchil, tizimli ishlar olib borilyapti.

Yoshlarning ovozini eshitish, ularning sportdagi yutuqlarini ragʻbatlantirish va mavjud toʻsiqlarni birgalikda bartaraf etish maqsadida belgilangan vazifalar ijrosini taʼminlash yoʻlida joylarda qator ijobiy ishlar amalga oshirilmoqda. Ana shunday tadbirlardan biri Amudaryo tumanida ham oʻtkazildi.

Hududdagi sportchi yoshlar va soha mutasaddilarini bir joyga jamlagan ushbu uchrashuvda Qoraqalpogʻiston Respublikasi Sport vaziri Yerkinbay Qutibayev bevosita ishtirok etib, kelajak chempionlari bilan yuzma-yuz, samimiy suhbat qildi. Ushbu jarayonda mutasaddi rahbarlarning yoshlar vakillari bilan bevosita muloqotga kirishishi ularning intilishlariga katta ruhiy madad berdi.

Tadbirda, shuningdek, Amudaryo tumani hokimi oʻrinbosari Nodirbek Kamolov hamda Amudaryo tumani Sport maktabi direktori Jasur Yaxshimov va tumanning faol sportchi yoshlari ishtirok etib, sohadagi bugungi holat va istiqboldagi rejalar yuzasidan oʻz fikr-mulohazalari bilan oʻrtoqlashdilar.

Uchrashuv davomida asosiy eʼtibor yosh sportchilar tomonidan ilgari surilgan takliflar va ularni qiynayotgan baʼzi muammolarni atroflicha muhokama qilishga qaratildi. Har bir sportchining fikri diqqat bilan tinglandi va oʻrtaga tashlangan har bir masala boʻyicha rahbarlar tomonidan aniq, asosli javoblar qaytarildi. Muammolarni paydo boʻlgan joyining oʻzidayoq tezkorlik bilan bartaraf etish va yoshlarning istiqbolli loyihalarini hayotga tatbiq qilish boʻyicha tegishli chora-tadbirlar hamda istiqbolli rejalar belgilab olindi.

Aytish joizki, davlatimiz tomonidan ilgari surilgan tashabbuslar bugun chekka hududlarda ham oʻz mevalarini bermoqda. Rahbarlar va yoshlar oʻrtasidagi bunday uzviy aloqalar ertamiz egalarining jamiyatdagi oʻrnini mustahkamlashga, ularning sportda va hayotda oʻz maqsadlari sari dadil odimlashiga xizmat qiladi. Oʻz navatida bu kabi ochiq muloqot maydonlari yoshlarga oʻz ustida yanada koʻproq ishlashga, yangidan-yangi marralarni zabt etishga beqiyos motivatsiya beradi.

Amudaryo tumanida boʻlib oʻtgan mazkur uchrashuv sportchi yoshlarning ertangi kunga boʻlgan ishonchini yanada oshirdi va ularni yangi gʻalabalar sari ruhlantirdi. Zero, yoshlarning dardini vaqtida eshitish va ularga yechim topish — bu nafaqat bugungi kunning talabi, balki porloq kelajak poydevorini yaratish yoʻlidagi eng muhim qadamlardan biridir. Mamlakatimizning har bir goʻshasida mana shunday eʼtibor va gʻamxoʻrlik davom etar ekan, yurtimiz bayrogʻini jahon arenalarida baland koʻtaradigan yangi-yangi chempionlar yetishib chiqishi muqarrar.