ТАДБИРКОРЛАР УЧУН ЯНГИ ИМКОНИЯТЛАР

Кичик бизнес ва хусусий тадбиркорликни ҳар томонлама қўллаб-қувватлаш мамлакатимизни ижтимоий-иқтисодий ривожлантиришда муҳим аҳамият касб этмоқда.

Муҳтарам Президентимизнинг жорий йил 15 майда қабул қилинган "Хусусий мулк, кичик бизнес ва хусусий тадбиркорикни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш чора-тадбирлари тўғрисида”ги Фармони эса бу борадаги ислоҳотларнинг янги ва муҳим босқичини белгилаб бериши шубҳасиз.

Ушбу Фармон билан тадбиркорларни ишончли ҳимоя қилиш, ўз фаолиятларини ривожлантириш йўлидаги тўсиқларни бартараф этишнинг тўртта асосий йўналиши бўйича амалга ошириладиган аниқ чора-тадбирлар белгиланди.

Биринчи йўналишга кўра тадбиркорлик фаолиятига ноқонуний аралашиш ва тўсқинлик қилиш, хусусий мулкдорлар ҳуқуқларини бузганлик учун давлат, ҳуқуқни муҳофаза қилувчи ва назорат органлари мансабдор шахсларининг жавобгарлиги оширилади.

Иккинчи йўналишда – хусусий мулкни ҳимоя қилиш кафолатини кучайтириш, тадбиркорлик фаолиятини тартибга соладиган маъмурий ва жиноят қонунчилигини либераллаштириш жараёнини давом эттириш белигиланди.

Учинчи йўналишда белгиланган вазифаларга кўра барча турдаги рўйхатдан ўтказиш, рухсат бериш ва лицензиялаш, шунингдек, ташқи иқтисодий фаолиятни амалга ошириш билан боғлиқ тартиб тамойиллар янада соддалаштирилади.

Бу йўналишда туман, шаҳар ҳокимликлари ҳузуридаги тадбикорлик субъектларини рўйхатдан ўтказиш инспекциялари негизида тадбиркорларга "бир дарча” тамойили асосида давлат хизматлари кўрсатиш ягона марказларини ташкил этиш ва 2016 йилнинг 1 январидан ушбу марказларнинг фаолият бошлашини таъминлаш белгиланди. Ҳар бир тадбиркор ўзи учун керакли давлат хизматларини шу марказлар орқали олади.

Тўртинчи йўналишда хусусий мулк ва хусусий тадбиркорликни жадал ривожлантириш учун зарур шарт-шароит ва имкониятлар яратиш, уларнинг моддий кредит ресурсларидан фойдаланишини кенгайтириш, бизнес муҳитини яхшилашга  доир тадбирлар ўз ифодасини топган.

Ушбу йўналиш бўйича жорий йилнинг 1 июлидан якка тартибдаги тадбиркорларга фаолиятидан келиб чиққан ҳолда бир нафардан уч нафаргача ходим ёллаш ҳуқуқи берилди. Бунда ҳар бир ёлланган ишчига пенсия жамғармасига энг кам ойлик иш ҳақининг 50 фоизи миқдорида суғурта бадали ва белгиланган солиқ ставкасининг 30 фоизи миқдорида солиқ тўлаши белгилади. Агар якка тартибдаги тадбиркорлар ушбу Фармонга асосан касб-ҳунар коллежлари битирувчиларини ишга қабул қилса, битирувчиларнинг коллежни тугатганидан бошлаб ўн икки ой мобайнида ёлланма ишчилар учун белигланган солиқдан озод этилиши белгилаб қўйилмоқда.

Бундай имкониятлар бизнинг туманимизда фаолият юритаётган 700 дан зиёд якка тартибдаги тадбиркорлар учун янги иш ўринларини яратишга, ёшларни тадбиркорлик фаолияятига жалб этишга шароит яратади.