ХОНАДОН ФАЙЗИ МЕҲНАТ БИЛАН

Пиллачилик – етти хазинанинг бири. Ипак қурти боқилган хонадонда эса ҳамиша файз-барака бўлади. Бу мўъжизакор жониворнинг наинки пилладан олинадиган ипаги, балки пиллачилик саноатида қайта ишловдан кейинги чиқиндисигача ноёб саналади.

Мен салкам 35 йилдан бери ҳар йилги ипак қурти боқиш мавсумида 1,5-2 қути ипак қуртини парваришлаб, ҳар қути қурт уруғидан 70-75 килограммдан ҳосил оламан. Ипак қурти боқиш жуда нозик ва изчил меҳнат талаб қиладиган иш. Мавсум  давомида бутун оила – ўғил-қизларим, невараларим – барчамиз ҳамжиҳатликда ишлаганимиз учун унчалик муаммо бўлмайди. Айни кунда нафақат ипак қурти боқиш, балки, мавсумнинг ўзига хос ишлари – томорқа, пахта далаларидаги юмушлар энг қизғин паллага кирган. Бунинг устига апрель ойининг серёғин келиши деҳқончиликда жиддий муаммоларни келтириб чиқарди. Азал-азалдан деҳқонларимиз табиат инжиқликларига қарши курашиб, муаммоларни фидойи меҳнатлари билан енгиб келишган. Ушбу ғанимат дамларнинг ҳар бир лаҳзасидан унумли фойдаланиб, деҳқончиликдаги кечиктириб бўлмас муаммоларни юксак ақл-заковат билан енгиб ўтиш эса миллатимизга хос фазилат.

Бизнинг оилада ишга яроқли ҳар бир инсон меҳнатга ҳамдам. Мен келинлар ва қизларим билан ипак қурти парваришига қараймиз. Сифатли барг етказиб бериш билан эса ўғилларим шуғулланишади. Келтирилган тут баргларини саранжомлаб тахлаш ҳам анчагина меҳнат талаб қиладиган жараён. Боз устига бу йил тут баргларини шира босган. Уни ювиб, ювилган баргларни қуртхоналарга киритишдан олдин қайта-қайта сув пуркаб, кейин ипак қуртига бераяпмиз. Яна бир-икки кундан сўнг ипак қуртларига даста қўямиз, пилла ўраш даври бошланади.

Ипак қурти боқиш, ғўзанинг қатқалоғини юмшатиш ташвишлари деб томорқа хўжалигимизни унутиб қўйганимиз йўқ. Чунки  оиламизнинг иқтисодини кўтарадиган яна бир манба – томорқа ерларимиз. Мева-чева, сабзавот ва полиз экинларининг илк, эртапишар навлари аллақачон дастурхонимизга тушди.

Меҳнат қилган элда азиз, - дейишади. Очиғи, меҳнат қилган одам аввало тўқ ва фаровон, обод яшайди. Худога шукур, камтарин меҳнатимиз орқасидан элда обрў топиб, бой-бадавлат ҳаёт кечираяпмиз. Янги иморатлар қуриб, энг замонавий уй жиҳозлари сотиб олаяпмиз. Бундан ортиқ тўкинлик бўлмаса керак. Меҳнатни инсон аввало ўзи, оиласи, фарзандлари бахти, осойишталиги ва фаровонлигини таъминлаш учун қилади. Оилалар обод, фаровон, фарзандлар илмли бўлса, овул-элимиз, юртимиз ҳам обод, хонадонларимиз файзли бўлади.

Донагул БЕРДИБОЕВА,

пиллакор,

 Куюк кўпир овули.