ТАҚДИРИМИЗГА ДАХЛДОР ЖАРАЁН
Бугунги кунда фуқаролар йиғинлари аҳолининг маҳаллий аҳамиятга молик масалаларини ҳал этувчи, халқ оммасини давлат, ҳокимият идоралари билан боғлаб турувчи органга айланди. Юртимизнинг барқарор ривожланиши, эртасини белгилашда фуқаролар йиғинлари раислари ва унинг маслаҳатчилари сайлови катта аҳамият касб этиши шубҳасиз.
Ўзбекистон Республикаси Конституциясининг 105-моддасига мувофиқ шаҳарча, қишлоқ ва овулларда, шунингдек, улар таркибидаги маҳаллаларда фуқароларнинг йиғинлари, ўзини ўзи бошқариш органи бўлиб, улар икки ярим йил муддатга раисни ва унинг маслаҳатчиларини сайлайди.
Ушбу қоидага асосан жорий йилнинг май-июнь ойларида мамлакатимизда фуқаролар йиғини раиси ва унинг маслаҳатчилари сайлови ўтказилмоқда. Шу кунгача сайловга доир асосий вазифалар, муносиб номзодларни кўрсатишнинг аҳамияти, ижтимоий-сиёсий жараённи ўтказиш тартиби ва уларнинг якунларини эълон қилиш, буни оммавий ахборот воситаларида ёритиш каби масалалар юзасидан бир неча марта семинарлар, йиғилишлар ўтказилди. Ишчи гуруҳлар аъзолари ўз вазифаларини батафсил тушуниб етдилар.
"Янгиобод” маҳалласида аҳоли сони 3346 нафарни ташкил этса, шундан 2221 нафари сайлаш ҳуқуқига эга. "Фуқаролар йиғинлари раислари (оқсоқоллари) ва уларнинг маслаҳатчилари сайлови тўғрисида”ги Ўзбекистон Республикаси Қонунининг 15-моддасига мувофиқ, фуқароларнинг умумий йиғилишларида 2221 нафар сайловчи томонидан сайланган 62 нафар вакиллар фуқаролар йиғини раиси ва унинг маслаҳатчилари сайловида иштирок этиш ҳуқуқига эга бўлишди. Албатта, маҳалламиз аҳолисининг бу вакиллари муносиб номзодни сайлаш - ҳудуднинг ижтимоий ривожида нечоғли муҳим аҳамият касб этишини яхши тушунадилар.
"Янгиобод” маҳалласида 2016 йил 21 май куни ўтказиладиган келажакка дахлдор жараёнда ҳар бир вакил ўз шахсий фикрига таянган ҳолда, ўзига маъқул номзодга овоз беради. Улар бой ҳаётий тажрибага эга, кўпчиликни ортидан эргаштира оладиган, тадбиркор ва фидойи инсонларнинг маҳаллага раислик қилиши шу ҳудуднинг ривожланиши, турмуш тарзининг янада яхшиланиши омилларидан бири эканлигини чуқур англайдилар.
Биз ким бўлишимиздан қатъий назар, маҳаллада яшаймиз. Яхши-ёмон кунимиз ҳам маҳалла-кўй, қўни-қўшни билан ўтади, албатта. Шундай экан, маҳалла ҳаётига бефарқ қарамай, сайловларнинг тақдиримизга бевосита дахлдор жараён эканини ҳис қилишимиз шарт.
Хулоса қилиб айтганда, бўлажак сайловларда энг муносиб номзодларнинг фуқаролар йиғини раиси ва унинг маслаҳатчилари сифатида сайланиши юртимиз тинчлиги, Ватан тараққиёти ва халқимиз фаровонлигини таъминлашда беқиёс аҳамият касб этади.
Муқаддас БЕКНАЗАРОВА,
"Янгиобод” маҳалла фуқаролар йиғини раиси (оқсоқоли) ва унинг маслаҳатчилари сайловини ташкил этиш ҳамда ўтказиш бўйича ишчи гуруҳи раиси, 40-сонли мактаб директори ўринбосари.
(Фото - http://mahallagzt.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
