TAQDIRIMIZGA DAXLDOR JARAYoN
Bugungi kunda fuqarolar yigʻinlari aholining mahalliy ahamiyatga molik masalalarini hal etuvchi, xalq ommasini davlat, hokimiyat idoralari bilan bogʻlab turuvchi organga aylandi. Yurtimizning barqaror rivojlanishi, ertasini belgilashda fuqarolar yigʻinlari raislari va uning maslahatchilari saylovi katta ahamiyat kasb etishi shubhasiz.
Oʻzbekiston Respublikasi Konstitutsiyasining 105-moddasiga muvofiq shaharcha, qishloq va ovullarda, shuningdek, ular tarkibidagi mahallalarda fuqarolarning yigʻinlari, oʻzini oʻzi boshqarish organi boʻlib, ular ikki yarim yil muddatga raisni va uning maslahatchilarini saylaydi.
Ushbu qoidaga asosan joriy yilning may-iyun oylarida mamlakatimizda fuqarolar yigʻini raisi va uning maslahatchilari saylovi oʻtkazilmoqda. Shu kungacha saylovga doir asosiy vazifalar, munosib nomzodlarni koʻrsatishning ahamiyati, ijtimoiy-siyosiy jarayonni oʻtkazish tartibi va ularning yakunlarini eʼlon qilish, buni ommaviy axborot vositalarida yoritish kabi masalalar yuzasidan bir necha marta seminarlar, yigʻilishlar oʻtkazildi. Ishchi guruhlar aʼzolari oʻz vazifalarini batafsil tushunib yetdilar.
"Yangiobod” mahallasida aholi soni 3346 nafarni tashkil etsa, shundan 2221 nafari saylash huquqiga ega. "Fuqarolar yigʻinlari raislari (oqsoqollari) va ularning maslahatchilari saylovi toʻgʻrisida”gi Oʻzbekiston Respublikasi Qonunining 15-moddasiga muvofiq, fuqarolarning umumiy yigʻilishlarida 2221 nafar saylovchi tomonidan saylangan 62 nafar vakillar fuqarolar yigʻini raisi va uning maslahatchilari saylovida ishtirok etish huquqiga ega boʻlishdi. Albatta, mahallamiz aholisining bu vakillari munosib nomzodni saylash - hududning ijtimoiy rivojida nechogʻli muhim ahamiyat kasb etishini yaxshi tushunadilar.
"Yangiobod” mahallasida 2016-yil 21-may kuni oʻtkaziladigan kelajakka daxldor jarayonda har bir vakil oʻz shaxsiy fikriga tayangan holda, oʻziga maʼqul nomzodga ovoz beradi. Ular boy hayotiy tajribaga ega, koʻpchilikni ortidan ergashtira oladigan, tadbirkor va fidoyi insonlarning mahallaga raislik qilishi shu hududning rivojlanishi, turmush tarzining yanada yaxshilanishi omillaridan biri ekanligini chuqur anglaydilar.
Biz kim boʻlishimizdan qatʼiy nazar, mahallada yashaymiz. Yaxshi-yomon kunimiz ham mahalla-koʻy, qoʻni-qoʻshni bilan oʻtadi, albatta. Shunday ekan, mahalla hayotiga befarq qaramay, saylovlarning taqdirimizga bevosita daxldor jarayon ekanini his qilishimiz shart.
Xulosa qilib aytganda, boʻlajak saylovlarda eng munosib nomzodlarning fuqarolar yigʻini raisi va uning maslahatchilari sifatida saylanishi yurtimiz tinchligi, Vatan taraqqiyoti va xalqimiz farovonligini taʼminlashda beqiyos ahamiyat kasb etadi.
Muqaddas BEKNAZAROVA,
"Yangiobod” mahalla fuqarolar yigʻini raisi (oqsoqoli) va uning maslahatchilari saylovini tashkil etish hamda oʻtkazish boʻyicha ishchi guruhi raisi, 40-sonli maktab direktori oʻrinbosari.
(Foto - http://mahallagzt.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
