ЖИПСЛИКНИНГ ҚУДРАТИ

ЖИПСЛИКНИНГ ҚУДРАТИ

(Фахрия)

 Чаноқлардан тошиб турар улуғ насиба,

Сахий кузнинг этагидан ризқ терар Одам.

Ўзбекистон тонгги отган  қутлуғ паллада,

Ҳайратларга чулғанади жумлаи олам!

Обод, ёруғ кўнгилларни қучмиш фароғат,

Оппоқ денгиз чайқалади само остида.

Халқим учун фидойилик – улуғ ибодат,

Меҳнат билан она Ватан мангу осуда.

Ана қаранг, ҳашар қизир дала томонда,

Бир юз ўттиз олти миллат пахта теради.

Зафар дами барча хуррам, ҳозир хирмонда,

Юртда оппоқ-оппоқ тонглар отаверади.

Марал эже, Таня хола, Жексен кўкелар,

Элим, юртим, деган мард-у майдон аслида.

Озар қизи Лейлахоним, Назлим женгелар,

Бир-биридан қолишмайди терим баҳсида.

Маҳаллалар гузаридан далага туташ,

Йўллардадир жипсликнинг буюк қудрати.

Пахта ишқи билан ёнган дилларга уйқаш

Хирмонларда Оқибатнинг улуғ ҳикмати.

Кўрдингизми, Ўзбекистон далаларини,

Қуёш нурин тўйиб ичган пурзиё тупроқ.

Дунё танир лафзи ҳалол болаларини,

Халқим учун ирсиятдир сўзида турмоқ!

Сўзки, Ватан номи билан буюкланган шон –

Бугун шараф тожин кийган деҳқоннинг азми.

Аму элдан дунё томон йўл олган карвон

Ва шижоат, матонатнинг чинакам базми!

Ҳирмонлари баланд-баланд, тонглари оппоқ,

Эй она юрт! Ўзбекистон – жонажон Аму!

Бовурим, деб бағрин очган ҳар қорақалпоқ,

Зафар қучган дамларингда ёнингда мангу!

Кўрдим, Хитой, Куюккўпир, Жумуртов ёқда,

Пахта ишқи билан ёниб яшаётир эл.

Қиличбойда, Амир Темур, Қангли, Қипчоқда,

Далаларга кўчиб чиққан барча боғлаб бел.

Аҳли дунё ҳавасдадир Амударёга

Ризққа тўлиб бораётир бу кўҳна макон!

Бахт-у иқбол бўлмагайдир бундан зиёда,

Пахтасидай тонглари оқ нурафшон Ватан!

Робия ЙЎЛДОШЕВА