МАҚСАДИМИЗ – ЭЛ ИШОНЧИНИ ОҚЛАШ

Мустақиллик йилларида мамлакатимизда аҳоли саломатлигини яхшилашга алоҳида эътибор берилди. Инсон саломатлиги йўлида қилинган мана шундай ғамхўрликлар натижасида нафақат туманимиз марказида, балки туманимизнинг барча қишлоқ жойларида ҳам аҳолига тиббий хизмат кўрсатиш ишлари тубдан яхшиланди.

Айни кунда "Оқ олтин” овули марказида фаолият кўрсатаётган қишлоқ врачлик пунктимизнинг 2013 йилда реконструкция қилиниб, замонавий ускуналар билан жиҳозланган бинога кўчириб ўтказилиши ҳам мана шундай ғамхўрликларнинг ифодаси бўлди, десак асло янглишмаймиз.

Бугунги кунда ҚВПда фаолият юритаётган 3 нафар умумий амалиёт шифокори, 17 нафар ҳамшира ва 2 нафар кичик ҳамшира овулимизнинг 1375 та хонадонида истиқомат қилаётган 8300 дан зиёд аҳолисига тиббий хизмат кўрсатмоқда.

Ходимларимизнинг хонадонларга белгиланган муддатларда ташриф буюриб, кишилар саломатлигини кўздан кечириб туришлари, уларга ўз вақтида тиббий ёрдам кўрсатишга ҳаракат қилишлари овулдошларимизнинг таҳсинларига сазовор бўлмоқда. Инсон саломатлигини муҳофаза қилишга масъул бўлган тиббиёт ходимларига халқимизнинг ҳурмати ва ишончининг тобора ортиб бораётганлиги бизларни ўз касбимизга янада кўпроқ меҳр қўйиб, фидойилик намуналарини кўрсатиб меҳнат қилишга даъват этмоқда.

Жамоамизда катта ҳамшира Гулсара Тўрамуротова, эмлаш ҳамшираси Гавҳар Бердимуротова, патронаж ҳамшираси Гулнора Асқарова ва патронаж акушеркаси Дилфуза Бекниязовалар ўзларининг фидойи меҳнатлари ва ишчанлиги билан жамоадошларига намуна бўлмоқдалар.

"Оқ олтин” қишлоқ врачлик пункти жамоаси аҳолига кўрсатилаётган тиббий хизматнинг сифати ва самарадорлигини ошира бориб, юртдошларимиз саломатлигини янада яхшилашга, уларнинг тиббиёт ходимларига бўлган ишончларини оқлашга ҳаракат қилади.

Мен ушбу фурсатдан фойдаланиб, барча ҳамкасбларимизни тиббиёт ходимлари куни байрами билан чин қалбимдан муборакбод қиламан!

Гулсара БЕГЖАНОВА,