ЯНГИ ЎҚУВ ЙИЛИ ЯНГИ БИНОДА

Давлатимиз раҳбари И.А.Каримов таъкидлаганидек, дунё иморатлари ичида энг улуғи  мактаб бўлса, касблар ичида энг шарафлиси ўқитувчилик ва мураббийликдир. Қалби эзгулик ва меҳрга лиммо-лим муаллимларнинг масъулиятли меҳнати туфайли ёш авлод илм-маърифатга ошно бўлиб улғаяди, келажакнинг ишончли ворисларига айланади.

Якунланган 2012-2013 ўқув йили биз 19-сон мактаб жамоаси учун самарали йил бўлди. Узоқ йиллар жамоамизга раҳбарлик қилиб ҳаммамизга устоз бўлган рахматлик Дўсимбат ака Ешимбетовнинг ишларини бугун шогирдлари давом эттиришаяпти. Бугунги кунда мазкур таълим даргоҳида 532 ўқувчи таҳсил олмоқда. Уларга 66 нафар малакали ўқитувчи таълим-тарбия бермоқда. Дарслар аниқ режа, ёшлар салоҳиятини ривожлантиришга қаратилган илғор педагогик технологиялар асосида ташкил этилган. Бир қанча фан ва спорт тўгараклари фаолият кўрсатмоқда. Ўқувчиларнинг ёзги таътил даврида мактабимизда "Оҳу” оромгоҳи ташкил қилиниб, болаларнинг бўш вақтини мазмунли  ўтказишда Э.Хўжанова, Г.Отажонова, Г.Қозиева, М.Собирова, Е.Сапарбоева сингари устозлар ташаббускор бўлдилар. Жорий, 2012-2013 ўқув йилида 9-синфни битирувчи ўқувчилар сони 72 нафарни ташкил этди. Улардан 19 нафарининг ҳужжатлари 3-сонли академик лицейга, 53 нафарининг ҳужжатлари касб-ҳунар коллежларига топширилди ва қабул қилинди.

Қувонарлиси шуки, янги ўқув йили капитал реконструкция қилинган ва қўшимча 10 та хона қурилган янгича қиёфадаги мактабда бошланади. Педагог ўқитувчиларнинг меҳнати натижасига қараб келажагимиз белгиланар экан, биз ўқитувчилар ёш авлодни тарбиялаш жараёнида тинмай изланиш, зарур барча билим, кўникма, малакаларни эгаллаб, эртанги кунимизнинг эгалари – юксак маънавиятли, комил инсонлар бўлиб етишишлари учун барча имкониятлардан фойдаланамиз.

Фарзандларимизнинг камолга етишлари, бахту саодати йўлида ҳавас қилса арзигулик ишлар амалга оширилаётгани учун давлатимиз раҳбаридан миннатдормиз.

Лиза ЎРОЗБОЕВА,

19-мактаб директорининг ўқув ишлари бўйича ўринбосари.

(Фото - http://www.qashqadaryogz.uz)