АНИҚ ТАШХИС ҚЎЙИШ – КАСАЛЛИКНИ ДАВОЛАШ САРИ МУҲИМ ҚАДАМ

Ҳа, шундай. Чунки касалликни аниқлаш, тўғри  ташҳис қўйиш – уни самарали ва тезкор даволашга йўл очади.

Туман тиббиёт бирлашмасида бу борада муайян ишлар амалга оширилмоқда. Рентгенологик текширувнинг бунда ўрни алоҳидадир.

Бирлашмага 2014 йилда "Саломатлик - 3” лойиҳаси бўйича келтирилган ва аҳолига тиббий хизмат кўрсатаётган замонавий, компьютерлашган (CR-30-X) 2 та рентген аппаратидан беморларни текшириш ва тез ташхис қўйишда самарали фойдаланилмоқда. Мазкур рентген жиҳозлари тиббиёт бирлашмасининг Шошилинч тиббий ёрдам бўлимига, кўп тармоқли марказий поликлиникага ўрнатилди.

Туман аҳолисига тиббий хизмат кўрсатишни янада яхшилаш мақсадида келтирилган жиҳозлар беморларни тез ва самарали текширишга хизмат қилаётгани билан жуда аҳамиятлидир. Шунингдек, текширув натижалари кўп вақт давомида компьютер хотирасида сақланиб туриши беморнинг текширувдан олдинги ва кейинги ҳолатларини билиш, солиштириб кўриш, даволашнинг боришини кузатиш имконини беради. Қолаверса, аввалги рентген аппаратлари текширув натижаси 15-20 минутда аниқланган бўлса, ҳозирги замонавий компьютерлашган аппаратлар ёрдамида 2-3 минутда аниқланади, қолаверса, текширув вақтида беморнинг нурланиши камаяди.

Туман аҳолисига тиббий хизмат кўрсатишнинг бугунги аҳволини олдинги йилларга солиштирадиган бўлсак, эришилаётган қувонарли натижалар қатори рентгенологик текширишлар савияси ҳам тубдан яхшиланганлигига гувоҳ бўламиз.

Фикримнинг исботи сифатида шуни айтишим мумкинки, 2014 йилда 4000 нафардан ортиқ туманимиз фуқаролари рентгенологик текширувлардан ўтказилган бўлса, 2015 йилда 15000 дан, 2016 йилда эса 20000 дан ортиқ фуқаро текширувдан ўтди. Бундан кўриниб турибдики, беморларга бирламчи ташхис қўйиш ишлари Республика     миқёсидаги марказлар билан тенглашди.

Рентгенологик текширишлар туфайли бирламчи сил касалликлари, саратон касаллиги, ички аъзолар касалликлари тезкор аниқланиб, даволашни самарали олиб бориш имконияти яратилмоқда. Зеро, аниқ ташхис – касалликни тезкор даволаш сари муҳим қадамдир.

Ў.КЕНЖАЕВ, туман тиббиёт бирлашмаси рентгенолог шифокори.

(Фото: ЎзА)