ANIQ TAShXIS QOʻYISh – KASALLIKNI DAVOLASh SARI MUHIM QADAM

Ha, shunday. Chunki kasallikni aniqlash, toʻgʻri  tashhis qoʻyish – uni samarali va tezkor davolashga yoʻl ochadi.

Tuman tibbiyot birlashmasida bu borada muayyan ishlar amalga oshirilmoqda. Rentgenologik tekshiruvning bunda oʻrni alohidadir.

Birlashmaga 2014-yilda "Salomatlik - 3” loyihasi boʻyicha keltirilgan va aholiga tibbiy xizmat koʻrsatayotgan zamonaviy, kompyuterlashgan (CR-30-X) 2 ta rentgen apparatidan bemorlarni tekshirish va tez tashxis qoʻyishda samarali foydalanilmoqda. Mazkur rentgen jihozlari tibbiyot birlashmasining Shoshilinch tibbiy yordam boʻlimiga, koʻp tarmoqli markaziy poliklinikaga oʻrnatildi.

Tuman aholisiga tibbiy xizmat koʻrsatishni yanada yaxshilash maqsadida keltirilgan jihozlar bemorlarni tez va samarali tekshirishga xizmat qilayotgani bilan juda ahamiyatlidir. Shuningdek, tekshiruv natijalari koʻp vaqt davomida kompyuter xotirasida saqlanib turishi bemorning tekshiruvdan oldingi va keyingi holatlarini bilish, solishtirib koʻrish, davolashning borishini kuzatish imkonini beradi. Qolaversa, avvalgi rentgen apparatlari tekshiruv natijasi 15-20 minutda aniqlangan boʻlsa, hozirgi zamonaviy kompyuterlashgan apparatlar yordamida 2-3 minutda aniqlanadi, qolaversa, tekshiruv vaqtida bemorning nurlanishi kamayadi.

Tuman aholisiga tibbiy xizmat koʻrsatishning bugungi ahvolini oldingi yillarga solishtiradigan boʻlsak, erishilayotgan quvonarli natijalar qatori rentgenologik tekshirishlar saviyasi ham tubdan yaxshilanganligiga guvoh boʻlamiz.

Fikrimning isboti sifatida shuni aytishim mumkinki, 2014-yilda 4000 nafardan ortiq tumanimiz fuqarolari rentgenologik tekshiruvlardan oʻtkazilgan boʻlsa, 2015-yilda 15000 dan, 2016-yilda esa 20000 dan ortiq fuqaro tekshiruvdan oʻtdi. Bundan koʻrinib turibdiki, bemorlarga birlamchi tashxis qoʻyish ishlari Respublika     miqyosidagi markazlar bilan tenglashdi.

Rentgenologik tekshirishlar tufayli birlamchi sil kasalliklari, saraton kasalligi, ichki aʼzolar kasalliklari tezkor aniqlanib, davolashni samarali olib borish imkoniyati yaratilmoqda. Zero, aniq tashxis – kasallikni tezkor davolash sari muhim qadamdir.

Oʻ.KENJAYeV, tuman tibbiyot birlashmasi rentgenolog shifokori.

(Foto: OʻzA)