Юрт обод, эл фаровон

ЎзА, А.Ортиқбоев, 30.07.2013 13:59

Энг улуғ, энг азиз байрамимиз – Ўзбекистон Республикаси мустақиллигининг 22 йиллиги тобора яқинлашмоқда. Мамлакатимизда ушбу қутлуғ сана олдидан амалга оширилаётган улкан бунёдкорлик ишларини сарҳисоб қилиб, навбатдаги марраларни яна бир бор белгилаб олиш яхши анъанага айланган.

Бу борада Амударё туманида амалга оширилаётган ишлар хусусида туман ҳокими, Қорақалпоғистон Республикаси Жўқорғи Кенгеси депутати Ражаббой Йўлдошев Ўзбекистон Миллий ахборот агентлиги – ЎзА мухбирига қуйидагиларни гапириб берди:

– Президентимиз раҳнамолигида олиб борилаётган кенг кўламли ислоҳотлар туфайли юртимиз тобора обод ва фаровон бўлиб, барча ютуғимизнинг бунёдкори бўлган халқимизнинг онгу тафаккури, дунёқараши, ишга, ҳаётга муносабати тубдан ўзгариб, эртанги кунга, ўз кучи ва имкониятларига ишончи мустаҳкамланиб бораётир.

Бутун мамлакатимизда бўлгани каби туманимиз иқтисодиётида ҳам барқарор ўсиш суръатлари таъминланиб, улкан ютуқ ва муваффақиятлар қўлга киритилмоқда.

Саноат салоҳиятини ривожлантириш мақсадида 2013-2015 йилларда туманни комплекс ривожлантириш дастури ишлаб чиқилиб, изчиллик билан амалга оширилаётир. Ушбу дастур доирасида инвестиция лойиҳалари дастури, мавжуд саноат корхоналарини тўлиқ қувватда ишлатиш, бўш турган бино ва иншоотларда ишлаб чиқаришни ташкил этиш ҳамда тижорат банклари тасарруфидаги корхоналарнинг ишлаб чиқариш ҳажмини ошириш ҳисобидан кам қувватли, иқтисодий ночор корхоналарни молиялаштириш, 2012-2016 йилларда хизмат кўрсатиш соҳаларини ривожлантириш ҳамда қишлоқ хўжалик маҳсулотлари ишлаб чиқариш, яъни чорвачилик, паррандачилик, балиқчилик, асаларичилик соҳаларини ривожлантириш дастурлари ишлаб чиқилди.

Шу каби кенг кўламли ишлар натижасида "Asia silk” шўъба корхонаси ҳамда пойабзал, кийим-кечак, мебель, колбаса маҳсулотлари ишлаб чиқарадиган корхоналар, сутни қайта ишлаш комплекси, Хитой технологияси асосида йилига 25 миллион дона ғишт ишлаб чиқариш қувватига эга "Қорақалпоққишлоққурилишсервис” корхонаси, замонавий совутгичли "сендвич” панелли мева-сабзавот сақлайдиган омборхоналар ишлаб турибди.

Англиянинг "Welroy Technology LLP” компанияси билан биргаликда қиймати 29 миллион АҚШ долларига тенг бўлган "Амударётекс” хорижий корхонаси, "Zhas metall production” қўшма корхонасининг металлни эритиш ва қайта ишлаш цехи қурилиши ишлари жадал суръатларда олиб борилмоқда.

2013-2015 йилларда туманнинг саноат салоҳиятини ривожлантириш дастурига асосан қиймати 32 миллион 672,8 минг доллар миқдорида 20 лойиҳа амалга оширилиши, шунинг натижасида 478 янги иш ўрни ташкил қилиниши кўзда тутилмоқда.

Айни пайтда туманимизда икки мингдан ортиқ тадбиркорлик субъекти фаолият юритмоқда. Уларнинг 99,8 фоизи хусусий ва масъулияти чекланган жамият шаклига ўтган бўлиб, бу ерда жами иш билан банд аҳолининг 89,1 фоизи меҳнат қилаётир.

Тадбиркорликни ривожлантириш бўйича 2013 йилда 380 лойиҳани амалга ошириш режалаштирилган. Бугунги кунда тадбиркорликка нафақат иқтисодиётни ривожлантириш, балки аҳоли бандлигини таъминлаш масаласида ҳам жиддий эътибор қаратилмоқда. Бу йўналишда олиб борилган ишлар натижасида жорий йилнинг 6 ойида 16 миллиард 560 миллион сўмлик 274 лойиҳа амалга оширилди ва 1061 янги иш ўрни яратилди.

Туманимизда фаолият юритаётган 278 фермер хўжалигидан 197 тасида ишлаб чиқариш, хизмат кўрсатиш ва сервис, қайта ишлаш йўналишидаги қўшимча тармоқлар йўлга қўйилиб, фермер хўжаликларининг даромади ва уларда иш билан банд аҳоли сони ортиб бормоқда.

Иқтисодиётнинг етакчи тармоғи бўлган қишлоқ хўжалиги соҳасида катта натижаларга эришилмоқда. Бу йил туманимиз пиллачилари 243,5 тонна пилла етиштириб, йилнинг дастлабки шартномавий режасини ортиғи билан бажарди. Ғаллакорларимиз 10 минг тоннадан ортиқ буғдой етиштирди, шундан 4605 тоннаси шартнома асосида давлатга топширилди.

Қишлоқ жойларда намунавий лойиҳалар асосида уй-жой қурилиши кўламининг кенгайиши ҳар йили кўплаб оилаларнинг янгича ҳаёт кечиришига замин яратмоқда. Бу йил ана шундай 70 уй-жой қурилиши давом этмоқда.

Бугун қайси хонадонга кирманг, қайси овул ёки маҳаллада бўлманг, ҳар бир фуқаронинг аввало ўзи яшаётган, меҳнат қилаётган ҳудудни, қолаверса, ўз маҳалласи ва қишлоғини обод масканга айлантиришга ҳисса қўшаётганига гувоҳ бўласиз. "Қадр-қимматим, таянчим ва ифтихоримсан, мустақил Ўзбекистон!” деган эзгу ғояни ўзида мужассам этган мустақиллигимизнинг 22 йиллик байрамини муносиб кутиб олиш учун халқимиз фидойилик билан меҳнат қилмоқда.