Жайхун илҳомлари

ТУШ

Куни кеча туш кўрибман,

Тушда ажиб иш кўрибман.

Кўзи қора, камон қошли,

Ойдан зиёд юз кўрибман.

Кеча Сизни туш кўрибман,

Эгнингизда гулдан либос.

Гўзалликка ошно қалбда,

Сизга бўлди баланд ихлос.

Ақлим олди жамолингиз,

Кундан кўркам камолингиз.

Минг бор дардга даво бўлмиш,

Сўз-у суҳбат – аъмолингиз.

Бўлиб чаманзор Раъноси,

Боғда гуллар терармишсиз.

Жон олғувчи табассум-ла,

Мен томонга келармишсиз.

Секин ҳолимни сўрдингиз,

Кўнглимни тоғдай кўтариб.

Майли, Сизни кўрай тушда,

Уйғониб кетмай, йўталиб.

Кеча Сизни туш кўрибман,

Тушимдаям хуш кўрибман.

Бекберган ТЛЕУМУРАТОВ,

Қипчоқ қишлоғи.

СИЗ ЮРГАН ЙЎЛЛАР

(Бувижоним Шарифа Аллоҳберганова хотирасига)

Умр ўтаверар, ўтади кунлар,

Сизларни эслатиб ёғар ёмғирлар.

Унутиш қийинкан ўтса ҳам йиллар,

Иссиқ бағрингизни қўмсар бағирлар.

Осмонга боқаман юлдузлар санаб,

Кўзларим  шу лаҳза кетади чақнаб.

Гўёки юпатиб, бошимни силаб,

Бобомнинг юлдузи тургандай порлаб.

Қалбим гулзорлари хазонга тўлар,

Соғинчдан эзилган юзларим ўпар.

Бобомнинг юлдузи билан ёнма-ён,

Бувимнинг юлдузи ожиз милтирар.

Унутмоғим қийин бобо, бувижон,

Дилимда айрилиқ из солган туғён.

Аммо изларингиз кўзимга суртгум,

Сиз юрган йўллардан юргум бегумон.

Қанча йиллар ўтди, номингиз яшар,

Элда, маҳаллада эслар яхшилар.

Изингизда қолган яхшилик билан,

Азиз хотирангиз қалбларда яшар.

Дилрабо ТУРСУНБОЕВА,Мелиорация ва сув хўжалиги касб-ҳунар коллежи ўқувчиси.

Онажоним ёнимда

(Онам хотирасига)

Онам мангу ташлаб кетди,

Мен дунёга келган куним.

Мурғак қалбим ғашлаб кетди,

Ой-юлдузсиз қолди туним.

Тилим чиққан кунларимда,

Онажон, деб ойга боқдим.

Ва пилдираб юрганимда,

Кўз ёшимда ўзим оқдим.

Оймоможон далда берди:

«Онажонинг ёнингда», – деб.

Менга чексиз меҳр берди,

Қуёш бўлди умримга зеб.

Бошларимни силаб-силаб,

Алла айтди бувижоним.

Келажагим, бахтим тилаб,

Парвонадир ҳур Ватаним.

Сардорбек КЕНЖАЕВ, 20-сонли мактаб ўқувчиси.

Тонгги изҳор

Эрталаб уйқудан кўзларим очсам,

Тонгги майин шамол хонамга кирди.

Ўз тақдир йўлимдан қанчалар қочсам,

Ҳаёт изларимдан югуриб-елди.

Маҳзун ҳаёлимнинг манзили чексиз,

Давом этса, мангу севади сени.

Хаёлим манзили тўзғир, кимсасиз,

Нелардан очайин, дастлабки сўзни.

Кўзларим кимнидир излайди бетин,

Дилимни нимадир ҳануз тирнайди.

Тонгимнинг шуъласи кўринар ҳар кун,

Тунимнинг юлдузи сени излайди.

Барно САИДОВА, Амударё хизмат кўрсатиш ва сервис касб-ҳунар

коллежи ўқувчиси.

Ота-онамга

Ота-онам ёнимда бўлса,

Тўлиб турар доим уйимиз.

Иккаласи кулиб ўтирса,

Лиммо-лимдир бахт жомимиз.

Дўстлар, йироқ кетманг ҳеч қачон,

Ота-она бағридан асло.

Улар билан осуда қўрғон,

Бахт қуёши тургайдир порлаб.

Дилнура РАҲИМБОЕВА,

39-сонли мактаб ўқувчиси.

Тошқин сой

(Устозимга)

Тўлиб-тошиб оқмоқда тип-тиниқ сой,

Ўйноқи тўлқинлари дилларга кўчган.

Сой етган жойларда турфа хил олам,

Яшнаб дарёларга айланар ҳар дам.

Шунда юракларда севинчлар тошар,

Кўнгил чўлларида гуллайди ҳаёт.

Шу сойдан баҳраманд жумлаи башар,

Шу сойдан сув ичиб яшайди абад!

Озода ХУДОЙБЕРГАНОВА.

ШУКРОНА

(Суриядаги тенгдошлар тақдирини кўриб...)

Мана, тонг отмоқда сокин, хотиржам,

Фалакдан жилмайиб боқади қуёш.

Тинчликка шукрона айтамиз шу дам,

Қалбда туғён урар шодлик ва қувонч.

Айт, яна қайда бор мусаффо осмон?

Булбулга, гулларга тўлган боғ қайда?

Ё азим дарёси зилол сувли юрт,

Лолага бурканган боқий тоғ қайда?

Тонг отганда ўқиш, ишни ўйлаймиз,

Ҳушнаво оҳангда қўшиқ куйлаймиз.

Бизлар гуркираган, фаровон юртда,

Чинордай шовуллаб, гуллаб яшаймиз.

Қайдадир бўлмоқда парокандалик,

Қайдадир тинчликни бузар иблислар.

Бегуноҳ гўдаклар етим ва... шўрлик,

Умри ҳазон бўлган ёш ўғил-қизлар.

Норасида гўдак туради титраб,

Кўз ёши юзини ювади сувдек.

Йўқ, бу кўз ёшмас қалбдаги туғён,

Гуноҳим нима деб йиғлайди шўрлик...

Эй тенгдош, юртимизга разм сол, қара,

Аста кўздан кечир дала, боғларни.

Ва юракдан айт минг бор шукрона,

Кўзинг қароғида асра Ватанни!

Қалбингда ғофиллик бўлмасин ҳеч ҳам,

Нолинма, ҳеч бир вақт ўтган умрдан.

Ахир яшаяпмиз жаннатдек кўркам,

Буюклар Ватани Ўзбекистонда!

Муқаддас МАТКАРИМОВА, 37-сонли мактаб ўқувчиси.

Ёмғир

Шивирлаган ёмғирлар, сирдошим бўлинг,

Шивирлашиб мен билан кўнглимни олинг.

Тўкилсин ғамларим майда-майдалаб,

Ёғаверинг армонларим тилкалаб.

Кафтимни тутаман, маъюс тикилиб,

Ёлғончи ҳисларим қолсин тўкилиб.

Бахтли кунлар келган дамда шошилиб,

Ёлғонлар ёмғирдек қолсин тўкилиб.

Шивирлаб, кўнглимни чандон кўтаринг,

Меҳнаткаш қўлларим – кафтимни ўпинг.

Қалбим музларини майда-майдалаб,

Ёмғир томчилари, йўлдошим бўлинг.

Айланмоқда менинг юрагим тошга,

Қалбим ҳам интизор азиз сирдошга.

Сирлашиб, мен билан кўнглимни олинг,

Шивирлаган ёмғирлар сирдошим бўлинг.

Роза РАҲИМОВА.

Ғунча

Гулларнинг ичида ғунча,

Ўзига тортар бунча?

Ранглари қизил, оппоқ,

Гўё сирли тугунча.

Очилса, гул бўлади,

Кўриб кўнгил тўлади.

Капалакка айвонча,

Зўр оромгоҳ бўлади.

Асадбек ЙЎЛДОШЕВ,

8-сонли ИДУМ ўқувчиси.

Ардоқли отамиз

Ёш ўғил-қизларга меҳрибон бўлди,

Катта ва кичикка доим ҳурматда.

Таълим-тарбияга йўл очиб берди,

Меҳрибон отамиз Ислом Каримов.

Эл-у халқни тўғри йўлга бошлаб борган,

Келажакка буюк ишонч тиклаган.

Халқим, деб халқининг дилида қолган,

Ардоқли отамиз Ислом Каримов.

Шаҳло СОБИРОВА, 31-сонли мактаб ўқувчиси.

Оналар

Ҳикматона сўзлари,

Нурга тўла кўзлари.

Меҳрибондир ўзлари,

Онажонлар, оналар.

«Она» сўзи мўътабар,

Энг азиз ва муқаддас.

Онани ҳафа қилар,

Фақатгина ақли паст.

Она қалби – бир олам,

Она – сеҳргар олам.

Она сеҳрининг бири –

Меҳрдир, билинг буни!

Ирода Ердошева.

Гўзаллик шайдосиман

Мен шоира эмасман,

Ошиқман гўзалликка.

Ҳеч беҳис яшолмасман,

Дўстман фикри ҳурликка.

Мудраган юракларни,

Шеърларим уйғотади.

Кўнгилларни шод этиб,

Ғуборин тарқатади.

Сабоҳат МАДРИМОВА.