Жайхун илҳомлари

КИТОБГА ЮЗ БОСИБ

Бу дунёда жавоҳир кўп, терай десанг,

Умрни банди айлар хўб ҳавас берсанг.

Бироқ бир гапга меҳринг тўк, азиз фарзанд,

Китобдан катта бойлик йўқ, қадим айтган!

Китоб – гавҳар, сўзи бўлгай сабоқ ҳар чоғ,

Шами ўчмас зиё бедоғ, зеҳн-ла боқ.

Анга бефарқ яшар бўлсанг демаслар соғ,

Ани дўст танласанг кунлар ўтур оппоқ!

Билим кони – қуёш улдир, қуруқ қўймас,

Элим илмига бош шулдир, сенам бўйлаш.

Бериб ишқинг қушин қўндир, севиб сўйлаш,

Бетига юз босиб тиз чўк, чуқур ўйлаш!

Жумабой ҲИДОЯТОВ.

Ақлим ҳайрон

Соч ўстирмай қўйди қаранг, қаламқошлар,

Ақлим ҳайрон: бу қандайин замон бўлди?

Бир гап айтай, минг афсуски, замондошлар,

Ер супурган сочлар бизга армон бўлди.

Эртакларда қолмиш энди узун сочлар,

Момолардан қолган мерос оёқости.

Соч елкадан ўтди тамом, кесиб ташлар,

Гул қизларнинг елкаларин шайтон босди.

Тарихлардан сўз очсамки, тилим куяр,

Қўзғагум йўқ Момоҳаво ғазабини.

Кўрмоқликка ор этиб, ўз кўзин ўяр,

Қарғамасин дейман насл-насабини.

Қора зулфи  ҳар бир қизга кўрк эмасми,

Ё шунчалик бездимикан кокиллардан.

Кўрган киши момоларинг ким демасми,

Кечдимикан ор аталмиш соҳиллардан?

Мен бир шоир кўнглимдаги борим айтдим,

Сочим билан не ишинг бор, деманг қизлар.

Бу сафар-ку шу жойида тугар байтим,

Яна ёзгум, яна сочни кессангизлар.

Комронбек Камол,

М.Юсуф номидаги жамоат фонди томонидан ўтказилган «Ёш ижодкорлар» фестивалининг Ўзбекистон

Республикаси бўйича ғолиби.

Ўзбекистон

Мен сени севаман, эй Ўзбекистон,

Ҳар бир гўшанг бўлсин боғ-у гулистон.

Байроғинг кўтарган фидойиларинг,

Мадҳингни айлайди дунёга достон!

Ҳарбийлар тайёрдир бўлмоқ-чун фидо

Боболар тилида шукрона, дуо.

Аждодларим қолдирган тарихдан садо,

Улуғвор масканим – Ўзбекистоним!

Булбуллар сайрайди боғларинг аро,

Гулларинг яшнайди чаманзор аро.

Фарзандинг омондир тинчлигинг ила,

Олам ичра ягона Ўзбекистоним.

Жаннатим, жаҳоним, менинг Ватаним,

Аллоҳ назар солган Ўзбекистоним.

Сўнгги нафасгача бўлмасман айро,

Сенга жоним фидо, сенга жон фидо.

Манзура Эшимова.

Асл фарзанд эл дeб туражак

Ўғлонлари қалқон бу юртнинг

Кeлажаги порлоқ бўлажак.

Атлас дўппи кийган қизларга

Бутун дунё ҳавас қилажак.

Аждодлари улуғ элимда

Авлодлари давом бўлажак.

Эркинликдан камар бeлинда,

Халқим дунё турса, туражак.

Қарилари очган қўллардан,

Дуолардан нур ёғилажак.

Обод турмуш, порлоқ йўллари -

Чорлаб турар ёрқин кeлажак.

Сeнда жилов, сeнда бор имкон,

Асл фарзанд эл, дeб туражак.

Ватан озод, мусаффо осмон -

Қалдирғочлар жавлон уражак!

Охунжон АБДУЛЛАEВ,

ҚДУ ўзбeк филологияси фа-культeти 3-босқич талабаси.

Дийдор завқи

Мана, яна учрашиб,

Дийдоримизга тўйдик.

Кўргач, бир-биримизни,

Дардни унутиб қўйдик.

Яна ҳазил-ҳузуллар,

Бошланади, куламиз.

Аммо бу дақиқалар,

Қайтмаслигин биламиз.

Истаймиз, яна-яна,

Дийдор кўришмоқликни.

Мактаб давридаги,

Ёлғон урушмоқликни.

Гарчи бебош, шаддодмиз,

Унутмаймиз синфдош!

Унутиб бўларканми,

Ахир қалам-қошларни!

Мафтуна РАҲИМОВА, 16-сонли мактаб ўқувчиси.

ДАСТУРХОН

Уйга келганда меҳмон,

Ойим ёзар дастурхон.

Дастурхоннинг устида,

Доим турар ширмой нон.

Дастурхонда неъматлар,

Чирой берар, кўрк берар.

Буларни яратгунча,

Қанча инсон тер тўкар.

Дастурхон тўкин-сочин,

Эл-юрт яшар фаровон.

Серфайз дастурхонларим,

Кўриб ҳайратда жаҳон.

Шаҳло ҚУРОЛОВА, 62-сонли мактаб ўқувчиси.

Аброр полвон бўлади

Қўшнимиз чақалоғи –

Барчанинг эркатойи.

Сўзласанг тушунгандай,

Кулаверар қуёшдай.

Исмидир унинг Аброр,

Маъносидир покдомон.

Ота-онанг бахтига,

Бўлгин доимо омон!

Эркалатар бобоси,

Давомчи авлодим, деб.

Қувонади бувиси,

Қўлидан қўймайди ҳеч.

Беғуборсан шўх-шодон,

Сен билан диллар обод.

Нурафшондир хонадон,

Оилани қучган бахт.

Келажакда сен ботир,

Паҳлавон ўғлон бўлгин.

Ҳар ишда юртга суянч,

Ва мард-у майдон бўлгин!

Юлдуз МАДАДОВА, 44-сонли мактаб ўқувчиси.

БАХТ

Мен бахтни қайдан излайин,

Осмонданми ёки ерданми?

Тутқич бермас қаён кезмайин,

Ниятимни бахт сезганми?

Бахтни кўрган борми, инсонлар,

Тасвирлангиз, унинг суратин?

Мен бир бора тўқнашган онлар,

Билиб олар эдим сийратин.

Мен сўрадим бир куни ойдан,

Бахт нимадир ўзи дунёда?

Бахт шудир, сенинг учун ким,

Борлигингга айтса шукрона.

Севара Сидабуллаева.

Соғинч

Онажоним меҳрибоним,

Сиз менинг ягонамсиз.

Сизни жуда севаман,

Меҳрда дурдонамсиз.

Сизни мудом соғиниб,

Ҳар кун ойга қарайман.

Ой юзида кўрай деб,

Номингиз такрорлайман.

Холида ТОЖИМУРОДОВА, 40-сонли мактаб ўқувчиси.