БАХТ-ИҚБОЛ, ЭРК ЙЎЛИ МАНГУ БЎЛСИН!

Бахт-иқбол, эрк йўли. Бу йўл томон интилмоқ, тинчлик, ҳузур-ҳаловатга етишмоқ – инсониятнинг азалий орзуси. Инсон то ўзини ана шу йўлда кўрмоқ учун интилаверади, орзу қилмоқдан асло чарчамайди.

Азизлар, атрофга бир боқинг: Она Юртнинг тўрт томони гулранг, тўрт томонида тўю-тантана! Бири-бирига меҳр жомини тутган 136 миллат аҳил-иноқ. Бири-бирининг қўлларидан туз тотган, етти маҳалланинг боласини ўз боласидай эъзозлаётган халқимизнинг шодлигига таъриф йўқ. Қувончлар жаранги дунёларга етган бундайин доруломон дамлар шукуҳи она Ўзбекистоннинг ҳар бир гўшасида ҳукмрон. Шукур, минг-минг шукур, халқимиз чин маънода Бахт-иқбол ва Эрк йўлида!

Бу манзилга етгунча азиз, жонажон Ўзбекистон халқи узоқ, жуда узоқ, сермашаққат йўл юрди. Сургунлар, қатағонлар, қонли муҳорабалар заҳрини тотавериб силласи қуриган азиз халқимиз учун ҳамиша бир эзгу шиор суянч бўлди: Эрк ва адолат барҳақлигига ишонч! Ана шу ишонч халқни бирлаштирди, эзгу орзулар рўёби йўлида жипслаштирди. Ана шу жипслик 136 та миллат фарзандларини буюк ва енгилмас Ўзбекистон халқи деган ном билан дунёга танитди. Тотувлик, бағрикенглик, меҳр-оқибат туйғулари ила гупурган юракларда, ҳар бир қалбда азиз ва ягона, жонажон Ватан – Ўзбекистон бўй тиклади!

Дил тўла фахр ва ифтихор ила баралла айтамиз: тан-у жонимизга сингиб кетган бугунги порлоқ ва келажаги буюк Ўзбекистон – бу Ватан – барчамизники!

Бугун бу Ватаннинг шаҳру ёвонларини кезинг – бегона йўқ. Тотувликдан ранг олган тўй-маъракаларини кўринг – барчаси яқин, барчаси қавм-у қариндош тожик-у ўзбек, қозоқ ва туркман, қорақалпоқ билан қирғиз, ўрис-у татар... Эҳ-ҳе, барча бир дастурхон атрофида жамул-жам, барчанинг ўз ўрни, дил тўла тилаги бор. Ўртада меҳр, қон-қариндошлик ҳо-ким, ҳурмат-эътибор ҳоким ўртада!

Қувончлар кўкка етган лаҳзаларнинг шукуҳини қаранг: – Она Юрт осмони мусаффо, тонглари осуда, кўнгиллар хотиржам, хонадонларда осойишталик.

Саришта, ободон кўчалар томон ланг очилган эшиклардан ойдин ҳаёт сари қадам ташлаётган фарзандлар чеҳрасига бир боқинг – қувончлар учқунлайди, қадамларида ажиб дадиллик, шижоат!

Ана шудир, азизлар, халқимиз минг машаққат ила етган Бахт-иқбол ва Эрк йўли! Бу йўлни қурмоқ учун жафолар чеккан момо-боболар ҳаққи, бу йўлга етаклаб, қадамларимизга қувват бўлган фидойилар ҳаққи, матонат ва жасорат камарларини маҳкам боғлаб, то бу йўлга етгунча ўз ҳузур-ҳаловатидан кечган, элим, юртим деб яшаган Ватанпарварлар ҳаққи, Бахт-иқбол ва Эрк йўли халқимиз учун мангу бўлсин! 27 йилдирки, Она Юрт осмони узра порлаб турган Ҳуррият Қуёши, Эрк ва Истиқлол байроғи мангу бўлсин, азизлар!

Зотан,

Буюк тарих билан буюк қадам-ла,

Буюк келажакка эврилган Ватан.

Қаранг тўрт томонга, ҳар бир қадамда

Бир буюк ўзгариш кашф этган Ватан!

Халқ бахтиёр бахт-у иқбол йўлида,

Ҳуррият, Эрк ва Истиқбол йўлида!

Шундайин Ватанга фарзандмиз, фарзанд,

Отамиз, онамиз Алпомишларга.

Тинчликка, дўстликка энг метин дарбанд –

Истиқлол пойидор эврилишларга!

Халқ бахтиёр бахт-у иқбол тахтида,

Кўз тегмасин Ўзбекистон бахтига!