АМУДАРЁ ТУМАНИДА САЙЁР ҚАБУЛ ЎТКАЗИЛДИ

Жойларга бориб сайёр қабуллар ўтказиш, фуқаролар билан юзма-юз учрашиш, аҳоли билан доимий мулоқот қилиш  уларни қийнаётган муаммоларни ҳал этишнинг  самарали усулларидан бири бўлиб келмоқда. Одамларнинг дардини эшитиш, улар билан очиқ сўзлашиш, оғирини енгил қилиш фуқароларнинг давлат ва жамиятга бўлган ишончини мустаҳкамлашга хизмат қилмоқда.

Фуқаролар ҳуқуқларини ҳимоя қилиш, жисмоний ва юридик шахсларнинг мурожаатлари билан ишлашни назорат қилиш ва мувофиқлаштириш бўйича Президент администрацияси масъул ходими Алишер Усманов иштирокида 27 октябрь куни Амударё  туманида бўлиб ўтган сайёр қабулда давлат ҳокимияти ва бошқаруви органларининг халқ билан мулоқоти турли муаммоларга ўз жойида ечим топишнинг самарали усули экани яна бир бор ўз тасдиғини топди.

Ўзбекистон Республикаси Президентининг виртуал ва тумандаги Халқ қабулхонасига мурожаат қилган фуқаролар билан юзма-юз мулоқот ўтказилган сайёр қабулда Қорақалпоғистон Республикаси Халқ қабулхонаси раиси Ҳ.Ҳалимов, туман ҳокими С.Йўлдашев, секторлар раҳбарлари, туман ҳокимининг ўринбосарлари,  ҳуқуқни муҳофаза қилиш органлари раҳбарлари, давлат ва жамоат ташкилотлари мутасаддилари, тижорат банклари ходимлари ва бошқа масъуллар иштирок этдилар.

 Туманимиздаги Чойкўл овулида ўтказилган сайёр қабулда уй-жой, коммунал хизмат кўрсатиш тизими, тиббиёт, ҳуқуқ-тартибот идоралари фаолияти ва бошқа ижтимоий, иқтисодий ва маиший масалаларда қилинган овул фуқароларининг  мурожаатлари  кўриб чиқилди. Жумладан, фуқаро Гулчеҳра Жуматованинг “Нўғой Эшон бобо” аҳоли пунктини тоза ичимлик суви билан таъминлаш, ногиронлиги бўлган Аҳмад Шомуродовнинг пойабзал тикиш машинкасини олишга ёрдамлашиш,  Ўринбой Бозорбоевнинг маҳалладаги мавжуд трансформаторини  паст кучланишда ишлаётганлиги сабабли  юқори кучланишли трансформаторга алмаштириш таклифи, Шавкат Холмуродовнинг “Қорақипчоқ” аҳоли пунктидаги қўлбола симёғочларни янгисига алмаштиришга ёрдам бериш бўйича, Саъдулла Жуманиёзовнинг “Қўлберган бобо” қабристонига ўтадиган қипчоқ арна кўпригини таъмирлаш ҳақидаги, Ялғаш Йўлдошевнинг 26-сонли мактаб ҳудудигача бўлган йўлни, Ражаб Эшбоевнинг Қангли овулидаги Маданият ва аҳоли дам олиш марказини таъмирлаш бўйича ва бошқа фуқароларнинг ҳам турли масалалар юзасидан қилган  мурожаатлари атрофлича ўрганилди ва тегишли чора-тадбирлар кўрилди.

Дўрман овулида бўлиб ўтган сайёр қабулда ҳам ҳудудда истиқомат қилувчи фуқароларнинг турмуш тарзини янада яхшилаш  ҳамда тадбиркорлик субъектлари фаолиятига доир масалаларни аниқлаш, ижтимоий-иқтисодий муаммоларни ҳал қилиш мақсадида аҳолининг мурожаатлари тингланиб, ўрганиб чиқилди. Ҳар бир фуқаронинг мурожаати диққат билан тингланиб, масалага дахлдор бошқармалар, ташкилот ва корхоналар раҳбарлари иштирокида чуқур таҳлил қилган ҳолда бартараф этиш чоралари кўрилди. Аксарият мурожаатларда келтирилган инсон ҳуқуқларининг бузилиши ҳолатлари ва бошқа ижтимоий-иқтисодий муаммолар ўз жойида ҳал этилиб, мурожаатчининг талаби қондирилди. Маълум муддат, яъни атрофлича ўрганиш тақозо этиладиган мурожаатлар бўйича тегишли мутасаддиларга топшириқлар, мурожаат эгаларига ҳуқуқий тушунчалар берилди.

Сайёр қабулда уй-жой, коммунал хизмат кўрсатиш тизими, тиббиёт, ҳуқуқ-тартибот идоралари фаолияти ва бошқа ижтимоий, иқтисодий ва маиший масалаларда қилинган мурожаатлар кўриб чиқилиб, тегишли чора-тадбирлар кўрилди.

Озода Худойберганова.