AMUDARYo TUMANIDA SAYYoR QABUL OʻTKAZILDI

Joylarga borib sayyor qabullar oʻtkazish, fuqarolar bilan yuzma-yuz uchrashish, aholi bilan doimiy muloqot qilish  ularni qiynayotgan muammolarni hal etishning  samarali usullaridan biri boʻlib kelmoqda. Odamlarning dardini eshitish, ular bilan ochiq soʻzlashish, ogʻirini yengil qilish fuqarolarning davlat va jamiyatga boʻlgan ishonchini mustahkamlashga xizmat qilmoqda.

Fuqarolar huquqlarini himoya qilish, jismoniy va yuridik shaxslarning murojaatlari bilan ishlashni nazorat qilish va muvofiqlashtirish boʻyicha Prezident administratsiyasi masʼul xodimi Alisher Usmanov ishtirokida 27-oktyabr kuni Amudaryo  tumanida boʻlib oʻtgan sayyor qabulda davlat hokimiyati va boshqaruvi organlarining xalq bilan muloqoti turli muammolarga oʻz joyida yechim topishning samarali usuli ekani yana bir bor oʻz tasdigʻini topdi.

Oʻzbekiston Respublikasi Prezidentining virtual va tumandagi Xalq qabulxonasiga murojaat qilgan fuqarolar bilan yuzma-yuz muloqot oʻtkazilgan sayyor qabulda Qoraqalpogʻiston Respublikasi Xalq qabulxonasi raisi H.Halimov, tuman hokimi S.Yoʻldashev, sektorlar rahbarlari, tuman hokimining oʻrinbosarlari,  huquqni muhofaza qilish organlari rahbarlari, davlat va jamoat tashkilotlari mutasaddilari, tijorat banklari xodimlari va boshqa masʼullar ishtirok etdilar.

 Tumanimizdagi Choykoʻl ovulida oʻtkazilgan sayyor qabulda uy-joy, kommunal xizmat koʻrsatish tizimi, tibbiyot, huquq-tartibot idoralari faoliyati va boshqa ijtimoiy, iqtisodiy va maishiy masalalarda qilingan ovul fuqarolarining  murojaatlari  koʻrib chiqildi. Jumladan, fuqaro Gulchehra Jumatovaning “Noʻgʻoy Eshon bobo” aholi punktini toza ichimlik suvi bilan taʼminlash, nogironligi boʻlgan Ahmad Shomurodovning poyabzal tikish mashinkasini olishga yordamlashish,  Oʻrinboy Bozorboyevning mahalladagi mavjud transformatorini  past kuchlanishda ishlayotganligi sababli  yuqori kuchlanishli transformatorga almashtirish taklifi, Shavkat Xolmurodovning “Qoraqipchoq” aholi punktidagi qoʻlbola simyogʻochlarni yangisiga almashtirishga yordam berish boʻyicha, Saʼdulla Jumaniyozovning “Qoʻlbergan bobo” qabristoniga oʻtadigan qipchoq arna koʻprigini taʼmirlash haqidagi, Yalgʻash Yoʻldoshevning 26-sonli maktab hududigacha boʻlgan yoʻlni, Rajab Eshboyevning Qangli ovulidagi Madaniyat va aholi dam olish markazini taʼmirlash boʻyicha va boshqa fuqarolarning ham turli masalalar yuzasidan qilgan  murojaatlari atroflicha oʻrganildi va tegishli chora-tadbirlar koʻrildi.

Doʻrman ovulida boʻlib oʻtgan sayyor qabulda ham hududda istiqomat qiluvchi fuqarolarning turmush tarzini yanada yaxshilash  hamda tadbirkorlik subʼektlari faoliyatiga doir masalalarni aniqlash, ijtimoiy-iqtisodiy muammolarni hal qilish maqsadida aholining murojaatlari tinglanib, oʻrganib chiqildi. Har bir fuqaroning murojaati diqqat bilan tinglanib, masalaga daxldor boshqarmalar, tashkilot va korxonalar rahbarlari ishtirokida chuqur tahlil qilgan holda bartaraf etish choralari koʻrildi. Aksariyat murojaatlarda keltirilgan inson huquqlarining buzilishi holatlari va boshqa ijtimoiy-iqtisodiy muammolar oʻz joyida hal etilib, murojaatchining talabi qondirildi. Maʼlum muddat, yaʼni atroflicha oʻrganish taqozo etiladigan murojaatlar boʻyicha tegishli mutasaddilarga topshiriqlar, murojaat egalariga huquqiy tushunchalar berildi.

Sayyor qabulda uy-joy, kommunal xizmat koʻrsatish tizimi, tibbiyot, huquq-tartibot idoralari faoliyati va boshqa ijtimoiy, iqtisodiy va maishiy masalalarda qilingan murojaatlar koʻrib chiqilib, tegishli chora-tadbirlar koʻrildi.

Ozoda Xudoyberganova.