Янги биометрик паспорт

Ўзбекистон Республикаси Президентининг 2009 йил 23 июлдаги ПФ-4117-сонли ва Ўзбекистон Республикаси Президентининг 2011 йил 5 январдаги "Ўзбекистон Республикасида паспорт тизимини янада такомиллаштиришга доир қўшимча чора-тадбирлар тўғрисида”ги ПФ 4262-сонли Фармонларига асосан Ўзбекистон Республикаси фуқаросининг амалдаги паспорти 2015 йил 31 декабргача ҳақиқатлиги белгилаб берилган. Яъни, фуқаролар шу муддатга қадар янги турдаги биометрик паспорт билан таъминланишлари шарт.

Ўзбекистон Республикаси ҳудудида доимий яшовчи фуқаро паспорт олиши учун доимий рўйхатда турадиган жойидаги ички ишлар идораларининг маълумотларни йиғиш пунктига мурожаат қилиши лозим. Улар бунинг учун Ички ишлар Вазирлиги томонидан белгиланган махсус шаклдаги анкета-аризани тўлдириши ва унга шахсини тасдиқловчи тегишли ҳужжат-амалдаги паспорти ёки биринчи марта паспорт олаётганлар туғилганлиги ҳақидаги гувоҳномасини, ота-онасининг паспорт нусхаси, давлат божи тўлаганлиги ҳақидаги квитанцияни илова қилиши керак. Паспорт эгасининг фамилияси, отасининг исми, исми, миллати, туғилган санаси ўзгарганлиги ёки ёзувларда ноаниқликлар мавжудлиги аниқланганлиги муносабати билан янги биометрик паспорт расмийлаштирилишидан олдин ушбу ҳолатларни тасдиқловчи ҳужжатларни тақдим этади.

Биометрик маълумотларни йиғиш пункти оператори фуқароларнинг биографик ва биометрик маълумотларини компьютер умумий тўпламига киритади. Бунда фуқаронинг бармоқ излари олинади ва рақамли фотосуратга туширилади. Ушбу маълумотлар асосида электрон талабнома тайёрланиб, махсус электрон тармоқ орқали Ўзбекистон Республикаси Вазирлар Маҳкамаси ҳузуридаги Давлат персоналлаштириш марказига юборилади. Бу ерда электрон талабномалар асосида ҳужжатлар персоналлаштирилади, яъни, биографик маълумотлар паспортни визуал текшириш зонасига, биографик ва биометрик ахборот эса чипга киритилади.

Эски намунадаги паспортни расмийлаштиришда фуқаролар томонидан фотосурат тақдим этилиб, ушбу фотосурат фуқаро паспортига ёпиштириб берилган бўлса, биометрик паспортни расмийлаштиришда фуқаролардан фотосурат олиб келиш талаб қилинмайди. Хорижга чиқиш-келиш ва фуқароликни расмийлаштириш хизматида фуқаро фотосуратга олиниб, ушбу фотосурат паспорт бланкасига босмалаш йўли билан туширилади. 16 ёшдан ошган фуқаролардан бармоқ излари махсус сканер қурилмалари орқали олинади. Шунингдек, биометрик паспортга барча зарур маълумотлар лотин алифбоси асосида киритилади.

Биометрик паспортнинг варақлари сони 36 тадан иборат ва махсус микрочип ўрнатилган бўлиб унга паспорт эгасининг биографик ҳамда биометрик маълумотларининг электрон нусхалари киритилади.

Маълумотларни тўплаш пунктига келиш учун жисмоний имконияти бўлмаган шахсларга ҳам биометрик паспорт бериш механизми ишлаб чиқилган. Ҳаракатланиш имконияти чекланган шахсларга хизмат кўрсатиш учун биометрик маълумотларни тўплаш пунктлари ҳузурида ариза берувчи яшаётган жойда унинг рақамли фотосурати ва бармоқлари изини олиш имконини берадиган мобил станция орқали расмийлаштирилади.

Юқорида қайд этилган Ўзбекистон Республикаси Президенти Фармонларини амалга ошира  бориб, жорий 2013 йил 28 июлдан эътиборан туманимиз фуқароларига янги биометрик паспортларни расмийлаштириб тақдим этишга киришилди. Шу кунга қадар 3500 нафарга яқин фуқароларнинг талаб қилинган ҳужжатлари компьютер базасига киритилиб, янги биометрик паспортлар талаб даражасида тайёрланмоқда. Шулардан 3000 тадан ортиғи сифатли тайёр қилиниб, фуқароларга тақдим этилди. Янги йилгача 6000 нафарга яқин фуқаро янги биометрик паспорт эгалари бўладилар. Янги 2014 йил давомида жами 46 минг нафардан ортиқ фуқаро янги биометрик паспорт соҳиблари бўладилар. 2015 йил охиригача туманимизнинг паспорт ёшидаги фуқароларнинг барчаси янги биометрик паспортга эгалик қиладилар. Бу билан Президентимизнинг мазкур Фармонлари тўла-тўкис муваффақиятли амалга оширилади.

Нурбек КАМОЛОВ,

Амударё тумани ИИБ хорижга чиқиш-келиш ва фуқароликни расмийлаштириш бўлинмаси бошлиғи, майор.

(Фото: http://fikr.uz)