Амударё туманида ерлар лазерли қурилма ёрдамида текисланади

Бугунги кунда фермер хўжаликлари тараққиётини янги техникаларсиз тасаввур қилиш қийин. Шу сабабдан ҳам туманимиздаги кўпчилик фермер хўжаликлари ўз фаолиятини ривожлантириш мақсадида техникалар паркини тўлдиришга катта эътибор қаратмоқдалар.

Туманимизнинг Тўлқин овулида фаолият юритаётган “Тўлқинли Исмоил чорвадор” фермер хўжалиги раҳбари Азамат Маткаримов ҳам хўжаликнинг моддий-техника базасини мустаҳкамлаш масаласини асосий вазифалардан бири деб билади.

Яқинда фермер хўжалиги балансига лизинг асосида 4 та трактор, лазер ёрдамида ер текислайдиган 2 та агрегат, 2 та плуг ва 1 та ер ҳайдаш агрегати, 1 дона буғдой экадиган сеялка олиб келинди.

Фермер хўжалигига лазерли ер текислаш агрегатининг олиб келиниши нафақат ушбу фермер хўжалиги, балки туманимизда фаолият юритаётган қишлоқ хўжалиги корхоналари учун ҳам катта воқеа бўлди.

Маълумки, бизнинг шароитимизда пахта жўяклар бўйлаб юзалаб суғорилади. Бунда, асосан майдонлар текисланмагани туфайли, узатилган сувнинг ярмига яқин қисми йўқотилади. Сув сарфини камайтириш ва кўпроқ ҳосилдорликка эришиш учун эса ерни текислаш зарур. Далалар юзасини етарли миқдорда текислаш учун кейинги йилларда лазерли бошқарувга эга анъанавий текислагичлар қўлланилмоқда.

Суғориладиган ерларни лазерли қурилма ёрдамида текислаш нафақат сувни тежаш ва суғориш пайтидаги меҳнат самарадорлиги ошириш, балки парвариш қилинаётган қишлоқ хўжалиги экинлари ҳосилдорлигини ошириш, сув-ер ресурсларидан фойдаланиш унумдорлигини оширишга ҳам хизмат қилади.

Мутахассисларнинг ҳисоб-китобига кўра, лазерли текислаш амалга оширилган далаларда пахта етиштиришда ишчи кучи учун харажатлар 11 фоизга, суғориш харажатлари 20 фоизга, сув сарфи 20 фоизга камайди. Бунда ҳосилдорлик ҳар бир гектардан ўртача икки ярим центнерга, фойда эса салкам 60 фоизга ошади. Умуман олганда, лазерли режалаштириш қўлланилган далаларда етиштирилган пахтанинг рентабеллиги 10 фоиздан 15 фоизга ошиши мумкин. Бундай самарага эгат ётқизиш ва молалаш тадбирларидан воз кечиш, шунингдек, насос ва ишчи кучи каби суғориш харажатларини  қисқартириш ҳисобига эришилади.

Айтиш керакки, “Тўлқинли Исмоил чорвадор” фермер хўжалиги кўп тармоқли хўжаликлардан саналади. Кўп тармоқли фаолиятни йўлга қўйиш орқали фермер турли йилларда табиий шароит ноқулай келиши сабабли ҳосилдорлик пасайиши натижасида олинадиган фойда камайиб кетган ҳолларда бошқа тармоқдан уларни қоплаб, хўжалик молиявий ҳолатининг турғунлигини таъминлаб келмоқда. Қолаверса, пахта ва ғалладан ташқари чорвачилик, балиқчилик ва бошқа тармоқларнинг йўлга қўйилгани натижасида қишлоқ аҳолисининг йил давомида иш билан бандлиги таъминланмоқда. Энг муҳими, фермер эл дастурхони тўкинлигига ҳисса қўшиб, аҳолининг озиқ-овқатга бўлган эҳтиёжини қондириш, айниқса, чорва маҳсулотларидан гўшт, сут, тухумга бўлган эҳтиёжларини таъминлашга ҳисса қўшмоқда.