Футбол фидоийси Мадраҳим Раҳимов таваллудининг 70 йиллигига бағишланган мусобақа ўтказилди

Мамлакатимизда амалга оширилаётган ислоҳотлар замирида халқнинг турмуш тарзини яхшилаш, маънан ва жисмонан соғлом муҳит яратиш, саломатликни мустаҳкамлаш ғояси ётибди.

Шу боис айни пайтда жисмоний тарбия ва спортга эътибор давлат аҳамиятига молик муҳим ижтимоий-сиёсий вазифага айланган. Спорт нафақат жисмоний ва маънавий соғломлик асоси, балки ҳаётга катта умид билан кириб келаётган ёшларни турли зарарли ёт ғоя ва одатлардан асраш, уларга ўз қобилияти ва истеъдодларини тўла руёбга чиқариш воситаси ҳамдир.

9 ноябрь куни Амударё тумани Навоий маҳалласида жойлашган футбол майдончасида 38-сонли мактабнинг жисмоний тарбия фани ўқитувчиси Азамат Раҳимов, туман жисмоний тарбия ва спорт бўлими бошлиғи Жасур Яхшимов ва халқ таълими бўлими методисти Нурбек Абдуллаевлар ташаббуси билан туманимизда анча йиллар давомида ўқувчиларга футбол бўйича мураббийлик қилган фахрий тренер Мадраҳим Раҳимов таваллудининг 70 йиллик юбилейи муносабати билан шаҳар мактаблари ўқувчилари ўртасида футбол мусобақаси ўтказилди.

38-сонли мактабнинг жисмоний тарбия фани ўқитувчиси Фахриддин Камолов, маънавий-маърифий ишлар бўйича директор ўринбосари Рустам Ҳамраев, туман халқ таълими бўлими методисти Нурбек Абдуллаевлар ҳакамлик қилган мазкур мусобақада Манғит шаҳридаги 9 та мактаб жамоалари иштирок этишди.

Мусобақа давомида 38-сонли мактабнинг мусиқа фани ўқитувчиси Озода Аҳмедова раҳбарлигидаги рақс гуруҳи ўқувчилари томонидан бадиий чиқишлар қилиниб, болалар куй-қўшиқлар ва рақслар ижро этишди.

Тадбирни туман жисмоний тарбия ва спорт бўлими бошлиғи Жасур Яхшимов очиб берди. Сўзга чиққанлар Мадраҳим Раҳимовни табаррук 70 ёши билан муборакбод этар экан, ёшларни спорт билан мунтазам шуғулланишга чақириб, бу соҳада Юртимизда ёшларга берилаётган имкониятлар ҳақида тўхталиб ўтишди.

Мадраҳим Раҳимов 1949 йилда туғилган. 1975 йилда Тошкент политехника институтининг қишлоқ қурилиши  факультетини  тамомлаган.  Спортга, айниқса футболга бўлган меҳри унинг бутун ҳаёти мазмунига айланган. 1981 йилда собиқ совет иттифоқи даврида ўша пайтдаги энг нуфузли  мусобақалардан бири бўлган “Олтин бошоқ” футбол мусобақасида фахрли 3-ўринни эгаллаган. Анча йиллар давомида туман болалар ва ўсмирлар спорт мактабида футбол бўйича ёшларга мураббийлик қилган. Ўқувчи-шогирдлари билан биргаликда 2016 йилда Нукус шаҳрида ўтказилган Қорқалпоғистон болалар лигасида 20 та жамоа ичида фахрли 2-ўринни эгаллаган. Мадраҳим Раҳимов туман миқёсида ўтказиладиган кўплаб футбол мусобақаларида ҳакамлик қилиб келади. У ўзи истиқомат қилаётган кўчада болаларнинг эркин футбол ўйнашлари, уларнинг футболга бўлган қизиқишларини қўллаб-қувватлаш ва машғулотлар олиб боришлари учун ўз ҳисобидан футбол майдончаси қурдирган.

Отахон 70 ёшга чиққан бўлсаларда, ҳали ҳам ёшлардек, куч-ғайрат ва шижоатга тўла. Унинг мақсади туманимизда кучли футболчиларни етиштириш ва ёшларнинг футболга бўлган иштиёқини янада кучайтиришдир.

Мусобақа якунига кўра, 36-сонли мактаб жамоаси биринчи, 38-сонли мактаб жамоаси иккинчи, 30-сонли мактаб жамоаси 3-ўринни эгаллашди. Ғолиб жамоалар тадбир ташкилотчиси Азамат Раҳимов томонидан диплом ҳамда эсдалик совғалари билан тақдирланди.

Ирода Эрдошева,
Жамоатчи мухбир.