Алла янграб турсин, замин устида!

Она. Бу сўз бизга мўътабар ва азиз. Чунки у бизни оқ ювиб, оқ тараб, вояга етказган инсондир. Дунёда ҳар қандай улуғ зотни – пайғамбарларни ҳам, подшоҳларни ҳам она туққан. Боланинг тили "Она” сўзи билан чиқади. Онага бўлган эҳтиром барча инсонларга хос фазилатдир.

Бир куни бир киши пайғамбарнинг олдига келиб, яхшиликни кимга қилсам бўлади, деб сўрабди. Шунда пайғамбар онангга, деб жавоб берибди. У киши уч маротаба сўрабди. Уч маротаба ҳам онангга, деб жавоб қайтарибди.

Она фарзандини вояга етказгандан кейин ундан меҳр кутади. Лекин баъзи бир фарзандлар борки, ҳатто онасининг дилини оғритади. Ақлли болалар оналарини ҳурмат қилишади. Бу ижодий томон барча болаларда бўлса эди. Онамиз бизлар учун нималарга қўл урмайди, дейсиз. Биз бунинг қадрига етаяпмизми? Балки биз бунга ҳаракат қилаётгандирмиз, лекин онанинг фарзандига қилган яхшилигини ҳеч нимага тенглаб бўлмайди. Шунинг учун ул зотга ҳар вақт эҳтиром кўрсатиш лозим.

Она қандай касб эгаси бўлмасин, у энг аввало оиласи учун, фарзандлари учун, жон куйдириб яшайди. Халқимизда: "аёлни эъзозлаган миллатнинг қадри ҳамиша баланд бўлади” деган ажойиб нақл бор. Мамлакатимиз давлат ва жамият қурилишида йил сайин аёллар фаоллиги ошиб бормоқда. Бу эса аёлнинг қадр-қимматини юксакларга кўтаришдир. Онани авайлаш бу фарзанд бурчи. Ҳар қандай фарзанд бу бурчни бажаришга мажбурдир. Она – улуғлик, гўзаллик, донолик тимсоли. Она ҳаёт чашмаси. Она буюклиги билан ва гўзал фазилати билан эъзозланиб келади.

Ўзбек аёллари дунёдаги энг болажон аёллардан ҳисобланади. Кечалари ухламасдан бешик тебратиб, боласига алла айтаётган она чин меҳр тимсолидир. Она алласида фарзандини баланд тоғларга, бепоён боғларга ўхшатади. Фарзандлар айтилган бу сеҳрли аллани авлодларга етказиб беради. Она фарзандига алла айтаётган пайтида беғубор чақалоққа бўлган меҳрини қўшади. Она алласи бошқа куй-қўшиқлардан ана шу жиҳати билан ажралиб туради. Алла фарзандларни яхшиликка, гўзалликка чорлайди. Алла эшитиб ўсган бола ақл фаросатли бўлади, - дейдилар. Аммо дунёда алла эшитмай, онасиз ўсаётган болалар ҳам йўқ эмас, биз онамиз бағрида Ватанимиз ардоғида эканлигимиздан қувонишимиз керак, албатта.

Жаннат оналарнинг пойида деб бежизга айтишмайди. Бунинг боиси шундаки, она қадам босган даргоҳ шунчалар нурафшон бўлиб кетади. Онанинг ҳурматини жойига қўйсанг, савобга қоласан, деган ҳикмат ҳам шундан. Уларнинг юрган ҳар бир қадамида жаннат бор, бахт бор. Демак, ўша бахт оналарнинг пойида. Уларнинг пойидаги жаннатни ҳис қила билишимиз лозим. Она меҳрини қуёшдан таралаётган нурга ҳам ўхшатишади. Биз ана шу меҳр уммонига чўмиб улғаямиз.

8 март - Онажонлар байрами билан барча оналарни, опа-сингилларни ва дугоналаримни чин қалбимдан муборакбод этаман. Уларга сиҳат-саломатлик, ишларида ривож, ўқишларида омад тилайман. Ҳеч қачон юзларидан кулгу аримасин. Толеи баланд, ризқ-у насибаси зиёда бўлсин, ҳар бир Аёлнинг! Оиласи бағрида, фарзандлари даврасида бахт нашидасини суриб яшасинлар.

Азиз онажонлар! Бағрингиз бешикдан асло айро тушмасин. Дунёдаги энг зулмкор инсоннинг ҳам юрагини эритиб юборувчи оташин қўшиқ – Алла янграб турсин мангу замин устида!

Юлдуз Мададова,

44-сонли мактабнинг 6-синф ўқувчиси, танлов ғолиби.

(Фото - http://www.afisha.uz)