ОНА ЗАМИН – РИЗҚ-РЎЗИМИЗ МАНБАИ

Туманимизда аҳоли бандлиги ва даромадлари ўсишини таъминлайдиган соҳалардан бири – бу шубҳасиз, қишлоқ хўжалигидир. Қадим-қадимдан ота-боболаримиз не бир машаққатлар эвазига тилсиз замин бағридан ризқини ундириб келган. Аму соҳилида ястанган туманимиз экин майдонлари бугунги кунга келиб, қишлоқ хўжалик маҳсулотлари билан наинки аҳолини, балки, Республикамиз бозорлари мўл-кўллигини ҳам таъминлайдиган, тотли мевалари, полиз маҳсулотлари, сабзавотлари хорижга  ҳам экспорт қилинадиган ҳудудга айланди.

Хўш, жорий йилда туманимиз фермерлари, деҳқон хўжаликлари ва томорқа ер эгаларининг режалари қандай? Бу саволимизга туман Фермер, деҳқон хўжаликлари ва томорқа ер эгалари Кенгаши раиси  Илҳом Полвонов шундай жавоб берди:

– Ўзбекистон Республикаси Вазирлар Маҳкамасининг жорий йил 30 январда қабул қилинган “Деҳқон хўжаликлари ва аҳоли томорқалари ер участкаларидан янада самарали фойдаланиш чора-тадбирлари тўғрисида”ги 53-сонли Қарори, туман ҳокимининг шу хусусидаги 2020 йил 7 февраль кунги қарорига асосан 2020 йилда деҳқон хўжаликлари ва томорқа ер участкаларида баҳорги, ўртаги (такрорий) қишлоқ хўжалиги экинларини жойлаштириш кўрсаткичлари ҳамда экинлардан етиштириладиган қишлоқ  хўжалиги маҳсулотларининг прогноз кўрсаткичлари тасдиқланди.

Туманимизда жами 32570 нафар томорқа ер эгаларининг 5217,3 гектар экин майдонлари мавжуд.

Баҳор мавсумида 158 гектар ерга сабзи, 180,5 гектар ерга пиёз, 15,8 гектар ерга саримсоқ пиёз, 225,6 гектар ерга бодринг, 169,2 гектар ерга кўкатлар, 694,3 гектар ерга картошка, 477,3 гектар ерга полиз экинлари, 631,8 гектар ерга помидор экинларини экиш ва мўл ҳосил олиш учун қизғин ҳаракат бошланиб кетди. Шу ерлардан 69546,1 тонна ҳосил олиниши, олинган ҳосилнинг 59114,2 тоннаси ички бозорларда сотилиши режалаштирилган.

Такрорий экинлар қишлоқ хўжалик маҳсулотлари етиштиришнинг муҳим манбаларидан эканлиги ҳисобга олиниб, такрорий экин сифатида 71,1 гектар ерга сабзи, 95,9 гектар ерга бодринг, 224,3 гектар ерга кўкатлар, 318,3 гектар ерга картошка, 240 гектар ерга полиз экинлари, 119,9 гектар ерга помидор, 981,8 гектар ерга бошқа экинлар экилиши кўзда тутилмоқда.

Айни кунларда туманимиз бўйича 5,4 гектар ер майдонида 450 та ихчам иссиқхоналар ташкил қилиниб, эртаги экинлар кўчатлари етиштирилаяпти. Бу кўчатлар кунлар исиши билан очиқ далаларга кўчириб ўтқазилади ва мўл ҳосил етиштириш чоралари кўрилади.

Шунингдек, 2020 йил ҳосили  учун ўтган йилнинг август-сентябрь ойларида аҳоли томорқаларининг 878 гектар ерига пиёз, саримсоқ пиёз, 233 гектар ерига эса кузги бошоқли дон экинлари экилган эди. Ушбу майдонлардаги экинларни парваришлаш ишлари олиб борилаяпти, суғориб, озиқлантирилиб, мўл ҳосил олиш чоралари кўрилаяпти.

Туманда “Амударё томорқа хизмат” масъулияти чекланган жамияти томонидан томорқа  ер эгаларининг экин майдонларига мотокультиваторлар орқали ва кимёвий ишлов бериш, шунингдек, минерал ўғитлар, уруғлар, мевали дарахтлар кўчатларини етказиб бериш йўлга қўйилди.

Кўрилаётган чора-тадбирларнинг барчаси халқимизнинг мўл-кўл ва хавфсиз озиқ-овқат, қишлоқ хўжалиги маҳсулотлари билан таъминланишига, дастурхони тўкин-сочин бўлишига қаратилган.

Замонавий илм-фан ютуқлари кенг жорий этилаётган мазкур соҳада мамлакатимиз аҳолисининг кўпчилик қисми машғул эканлиги эътиборга молик. Ҳа, она замин ризқ-рўзимиз манбаи.