“РАМАЗОН ҲАЙИТИ ТУҲФАЛАРИ” ЎЗ ЭГАЛАРИГА ЕТКАЗИЛДИ

Ўзбекистон Республикаси Президентининг 2018 йил 16 апрелдаги “Диний-маърифий соҳа фаолиятини тубдан такомиллаштириш чора-тадбирлари тўғрисида”ги 5416-сонли Фармонига мувофиқ ташкил этилган “Вақф” фахрия жамоат фонди масжидлар ва диний таълим муассасаларининг биноларини қуриш, таъмирлаш, реконструкция қилиш, диний-таълим муассасалари профессор-ўқитувчилари, тадқиқотчилари, мутахассислари, ўқувчи-талабаларини моддий қўллаб-қувватлаш, аҳолининг ижтимоий ҳимояга муҳтож қатламларини, имконияти чекланган шахсларни моддий-маънавий қўллаб-қувватлаш каби хайрли амалларни адо этиб келмоқда.

Кўп асрлик миллий ва диний қадриятларимизни асраб-авайлаш, дунё илм-фани ва маданиятига улкан ҳисса қўшган аждодларимизнинг бебаҳо меросини ўрганишни тарғиб этиш, халқимизга хос бўлган маърифатпарварлик, бағрикенглик меҳр-мурувват, бунёдкорлик каби эзгу фазилат ва қадриятларни давом эттиришга кўмаклашиш мақсадида ташкил этилган ушбу хайрия жамоат фонди амалга ошираётган ишларни юртдошларимиз ҳурмат-эътибор билан эътироф этишмоқда.

Фонд қутлуғ Рамазон ҳайити арафасида кўпчиликнинг кўнглига мадад бағишлайдиган яна бир хайрли ишга қўл урди: “Ҳар бир ҳудуддан 1000 та хонадон” лойиҳасига кўра мамлакатимизнинг ҳар бир вилоятидан 1000 та кам таъминланган, эҳтиёжманд, имконияти чекланган фуқаролар яшайдиган хонадонларга 1,1 млрд. сўмлик “Рамазон ҳайити туҳфалари” ортилган 14 та юк автомобиллари карвони 14 та ҳудудга жўнатди. Карвон республикамизнинг ҳар бир вилоятидан камида 1000 та оилага “Рамазон ҳайити туфҳалари”ни элтиб берди. Хайр-эҳсон сумкаларида кундалик эҳтиёж учун зарур бўлган бирламчи озиқ-овқат маҳсулотлари жойланган эди.

Ушбу қутлуғ Рамазон ҳайити туҳфаларидан туманимизда истиқомат қилаётган кам таъминланган, ижтимоий ҳимояга муҳтож 85 та хонадон аҳли ҳам баҳраманд бўлдилар. Ҳар бирига 60 минг сўмлик озиқ-овқат маҳсулотлари  солинган сумкалар “Вақф” хария жамоат фонди туҳфалари “Юсуф эшон бобо” жомеъ масжидида 55 нафар юртдошларимизга тарқатиб берилди.

Ҳар бирига 30 минг сўмлик озиқ-овқат маҳсулотлари солинган сумкаларни эса 30 та хонадонга овул ва маҳаллалар масъул ходимлари элтиб бердилар.

Хайр-эҳсонларни ҳақиқий эҳтиёжманд оилаларга етказишда туманимиздаги овул ва маҳаллалар масъул ходимлари ижтимоий ҳимояга муҳтож хонадонларни аниқлаб, рўйхатини шакллантириб, фаоллик кўрсатишди.

Рамазон барча мўмин-мусулмонлар учун Аллоҳ ризолиги учун рўза тутиб, ибодатлар қилинадиган ва бунинг учун улкан ажр-савоблар бериладиган ойдир. Шунингдек, молиявий ибодатлар ҳам амалга оширилиб, бир-бировга меҳр-мурувват, оқибат, хайр-саховат ишлари амалга оширилади. Айниқса, қутлуғ Ҳайит олдидан кам таъминланганлар ҳолидан хабар олиш, уларга совға-саломлар ҳадя қилиб, кўнглини кўтариш, уларнинг дуосини олиш ҳам халқимизнинг қон-қонига сингиб кетган қадриятларидандир.
Шубҳасиз, “Вақф” хайрия жамоат фонди ташкил этган ҳар бир ҳудуддан 1000 та хонадон лойиҳаси ҳам Ҳайит байрами арафасида кўпчилик юртдошларимиз кўнгилларига байрам қувончини ҳадя этди.

О.РАЖАБОВА.