“RAMAZON HAYITI TUHFALARI” OʻZ EGALARIGA YeTKAZILDI

Oʻzbekiston Respublikasi Prezidentining 2018-yil 16-apreldagi “Diniy-maʼrifiy soha faoliyatini tubdan takomillashtirish chora-tadbirlari toʻgʻrisida”gi 5416-sonli Farmoniga muvofiq tashkil etilgan “Vaqf” faxriya jamoat fondi masjidlar va diniy taʼlim muassasalarining binolarini qurish, taʼmirlash, rekonstruktsiya qilish, diniy-taʼlim muassasalari professor-oʻqituvchilari, tadqiqotchilari, mutaxassislari, oʻquvchi-talabalarini moddiy qoʻllab-quvvatlash, aholining ijtimoiy himoyaga muhtoj qatlamlarini, imkoniyati cheklangan shaxslarni moddiy-maʼnaviy qoʻllab-quvvatlash kabi xayrli amallarni ado etib kelmoqda.

Koʻp asrlik milliy va diniy qadriyatlarimizni asrab-avaylash, dunyo ilm-fani va madaniyatiga ulkan hissa qoʻshgan ajdodlarimizning bebaho merosini oʻrganishni targʻib etish, xalqimizga xos boʻlgan maʼrifatparvarlik, bagʻrikenglik mehr-muruvvat, bunyodkorlik kabi ezgu fazilat va qadriyatlarni davom ettirishga koʻmaklashish maqsadida tashkil etilgan ushbu xayriya jamoat fondi amalga oshirayotgan ishlarni yurtdoshlarimiz hurmat-eʼtibor bilan eʼtirof etishmoqda.

Fond qutlugʻ Ramazon hayiti arafasida koʻpchilikning koʻngliga madad bagʻishlaydigan yana bir xayrli ishga qoʻl urdi: “Har bir hududdan 1000 ta xonadon” loyihasiga koʻra mamlakatimizning har bir viloyatidan 1000 ta kam taʼminlangan, ehtiyojmand, imkoniyati cheklangan fuqarolar yashaydigan xonadonlarga 1,1 mlrd. soʻmlik “Ramazon hayiti tuhfalari” ortilgan 14 ta yuk avtomobillari karvoni 14 ta hududga joʻnatdi. Karvon respublikamizning har bir viloyatidan kamida 1000 ta oilaga “Ramazon hayiti tufhalari”ni eltib berdi. Xayr-ehson sumkalarida kundalik ehtiyoj uchun zarur boʻlgan birlamchi oziq-ovqat mahsulotlari joylangan edi.

Ushbu qutlugʻ Ramazon hayiti tuhfalaridan tumanimizda istiqomat qilayotgan kam taʼminlangan, ijtimoiy himoyaga muhtoj 85 ta xonadon ahli ham bahramand boʻldilar. Har biriga 60 ming soʻmlik oziq-ovqat mahsulotlari  solingan sumkalar “Vaqf” xariya jamoat fondi tuhfalari “Yusuf eshon bobo” jomeʼ masjidida 55 nafar yurtdoshlarimizga tarqatib berildi.

Har biriga 30 ming soʻmlik oziq-ovqat mahsulotlari solingan sumkalarni esa 30 ta xonadonga ovul va mahallalar masʼul xodimlari eltib berdilar.

Xayr-ehsonlarni haqiqiy ehtiyojmand oilalarga yetkazishda tumanimizdagi ovul va mahallalar masʼul xodimlari ijtimoiy himoyaga muhtoj xonadonlarni aniqlab, roʻyxatini shakllantirib, faollik koʻrsatishdi.

Ramazon barcha moʻmin-musulmonlar uchun Alloh rizoligi uchun roʻza tutib, ibodatlar qilinadigan va buning uchun ulkan ajr-savoblar beriladigan oydir. Shuningdek, moliyaviy ibodatlar ham amalga oshirilib, bir-birovga mehr-muruvvat, oqibat, xayr-saxovat ishlari amalga oshiriladi. Ayniqsa, qutlugʻ Hayit oldidan kam taʼminlanganlar holidan xabar olish, ularga sovgʻa-salomlar hadya qilib, koʻnglini koʻtarish, ularning duosini olish ham xalqimizning qon-qoniga singib ketgan qadriyatlaridandir.
Shubhasiz, “Vaqf” xayriya jamoat fondi tashkil etgan har bir hududdan 1000 ta xonadon loyihasi ham Hayit bayrami arafasida koʻpchilik yurtdoshlarimiz koʻngillariga bayram quvonchini hadya etdi.

O.RAJABOVA.