Amudaryo tumanida Qurbon hayiti keng nishonlandi

Muqaddas qadriyatlarimiz, mehr-oqibat va chin insonparvarlik tuygʻularini oʻzida mujassam etgan ulugʻ ayyom – Qurbon hayiti jonajon yurtimiz boʻylab oʻziga xos shukuh, fayz va koʻtarinki kayfiyat bilan kutib olindi. Mamlakatimizning har bir goʻshasi va mahallalarida boʻlgani kabi Amudaryo tumanida ham ushbu muborak bayram keng miqyosda nishonlandi. Xususan, 27-may kuni erta sahardan boshlab Mangʻit shahrida joylashgan “Yusuf eshon bobo” jomeʼ masjidi hamda tuman hududidagi barcha boshqa masjidlar yurtdoshlarimiz bilan toʻldi.

Minglab yurtdoshlarimiz dastlab Hayit namozidan oldingi maʼrifiy va ruhiy tarbiyaga boy boʻlgan maʼruzalarni katta eʼtibor bilan tingladilar. Ushbu taʼsirchan maʼruzalar davomida Qurbon hayitini munosib nishonlash, bu qutlugʻ kunni ulugʻ bayram sifatida koʻtarinki kayfiyatda oʻtkazish lozimligi alohida taʼkidlab oʻtildi. Shuningdek, ulamolarimiz tomonidan bu bayramning asl mohiyati faqatgina ibodat va marosimlar bilan cheklanmasligi, balki insonlarga ato etilgan behisob va bebaho neʼmatlarga shukronalik bildirish, yon-atrofimizdagi koʻmakka muhtoj insonlarga beminnat yordam qoʻlini choʻzish, oilalarga quvonch va shodlik ulashishdan iborat ekanligi keng tushuntirildi.

Davlatimiz rahbarining Qurbon hayiti munosabati bilan xalqimizga yoʻllagan bayram tabrigida ham ayni shu muhim jihatlarga alohida urgʻu berildi. Tabrikda taʼkidlanganidek, tinchlik, mehr-oqibat va saxovat bayrami hisoblangan Qurbon hayiti muqaddas dinimiz mohiyatida mujassam boʻlgan ezgu gʻoya va insonparvar amallarni yaqqol ifoda etadi. Bu oliyjanob jihatlar hozirgi kunda mamlakatimiz boʻylab insonparvarlik ruhida, avvalo inson qadrini ulugʻlash maqsadida olib borilayotgan keng koʻlamli islohotlarning maʼno-mazmuniga toʻla uygʻun hamda hamohang ekanligi bilan barchamiz uchun yanada aziz va qadrlidir.

Chindan ham, bu yilgi Qurbon hayiti bayramini oʻtkazishga yurtimizda har qachongidan ham oʻzgacha tayyorgarlik koʻrildi. Prezidentimizning bevosita tashabbusi bilan ushbu muborak ayyom arafasida keng koʻlamli xayriya va muruvvat tadbirlari amalga oshirildi. Jumladan, ogʻir va nogironlikni keltirib chiqaruvchi murakkab kasalliklarga chalingan 10 ming nafar bolada jarrohlik amaliyoti oʻtkaziladi. Bundan tashqari, onkologik, gematologik va onkogematologik tashxisi qoʻyilgan 2 300 nafar bemorni chuqurlashgan tibbiy tekshiruvdan oʻtkazish, ularni zamonaviy usullarda davolash va kerakli murakkab jarrohlik amaliyotlarini bajarish ishlari boshlandi. Shuningdek, kamida 350 nafar bemorda jigar va buyrak transplantatsiyasi kabi oʻta murakkab amaliyotlar bajariladi.

Bayram kunlarida ijtimoiy himoyaga muhtoj bolalarni har tomonlama qoʻllab-quvvatlashga ham alohida eʼtibor qaratilmoqda. Jumladan, 8 ming nafardan ziyod yetim va ota-ona qaramogʻidan butunlay mahrum boʻlgan bolalar, shuningdek, Vatan sarhadlarini himoya qilish yoʻlida qahramonlarcha qurbon boʻlgan ota-onalarning farzandlari uchun ularning shaxsiy omonat hisobvaraqlariga 200 AQSh dollari miqdoridagi pul mablagʻlari oʻtkazib berilmoqda. 500 ta masjidda aholi uchun eng qulay shart-sharoitlar yaratish, xususan, zamonaviy tahoratxonalar qurish, mavjudlarini rekonstruksiya qilish yoki kapital taʼmirlash, shu bilan birga, joylardagi qabristonlarni obod qilish kabi savobli ishlar izchillik bilan amalga oshirilmoqda. Shu bilan birgalikda, davlat taʼminotidagi oilalar, oʻzgalar mehri va parvarishiga muhtoj boʻlgan yolgʻiz yashovchi hamda yolgʻiz keksalar va nogironligi boʻlgan shaxslar maxsus kundalik oziq-ovqat toʻplamlari bilan taʼminlanmoqda. Mazkur muruvvat va xayriya chora-tadbirlarini moliyalashtirish uchun “Vaqf” xayriya jamoat fondiga 690 mlrd. soʻm mablagʻ ajratilgan.

Ushbu munavvar kunlarda 15 ming nafardan ziyod vatandoshlarimiz Saudiya Arabistonida muqaddas haj amallarini ado etmoqdalar. Ayniqsa, bu yil tariximizda ilk marta “Prezident hojilari” deb nomlangan maxsus dastur joriy etilgani barcha moʻmin-musulmonlarni birdek quvontirdi va qalblarini gʻururga toʻldirdi. Ushbu dasturga muvofiq, el-yurtimizga sidqidildan, halol va fidokorona xizmat qilgan 100 nafar yurtdoshimiz, yaʼni el orasida hurmatga sazovor boʻlgan ulamolar, piru badavlat nuroniylar, mahalla faxriylari hamda ularning oila aʼzolari davlatning toʻlaqonli koʻmagida muborak haj safariga borishdek imkoniyatga ega boʻldilar.

Amudaryo tumanidagi barcha masjidlarda Qurbon hayiti namozi toʻliq ado etilgach, yigʻilgan minglab yurtdoshlarimiz duoga qoʻl ochdilar. Ular shunday dorilomon, yorugʻ va farovon tinch kunlarga eson-omon, sogʻ-salomat yetkazgani uchun Yaratganga behisob shukronalar va hamdu sanolar aytdilar. Bundan tashqari mustaqil yurtimizga barqaror tinchlik-xotirjamlik, doimiy yuksalish, mehnatkash va bagʻrikeng xalqimizga esa omonlik, qut-baraka va farovonlik tilab eng ezgu duolar qildilar.

Muborak ayyom kunlarida yurtdoshlarimiz tomonidan mamlakatimizning turli goʻshalaridagi moʻtabar ziyoratgohlar, qabristonlar va tarixiy qadamjolarning ziyorat qilinishi esa yurtdoshlarimizning oʻtgan ajdodlar ruhiga boʻlgan chuqur ehtiromi hamda boy madaniy, maʼnaviy merosimizga boʻlgan yuksak hurmatining yorqin ifodasidir.