МАДАНИЯТ ВА САНЪАТ СОҲАСИГА ЭЪТИБОP ЯНАДА ОPТДИ

Давлатимиз раҳбари деярли ҳар бир учрашувлари, маърузаларида маданиятимиз ва санъатимизни ривожлантириш, соҳада ечимини кутаётган долзарб муаммоларга алоҳида тўхталиши бежиз эмас. Зеро, маданияти равнақ топган ва уни қадрлайдиган халқ ҳамиша ҳурматга сазовор бўлади.

Сўнгги йилларда мамлакатимизда миллий маданиятни янада ривожлантириш, янги Ўзбекистоннинг янги тарихини яратиш, моддий ва номоддий маданий мерос дурдоналарини сақлаш ва тарғиб этиш, халқ оғзаки ижодиёти ва хаваскорлик санъатини янада оммалаштириш, ёшларни маданият ва санъатга бўлган қизиқишларини орттиришга катта эътибор қаратилмоқда.

    Муҳтарам Юртбошимиз томонидан жорий йил 26 май куни “Маданият ва санъат соҳасининг жамият ҳаётидаги ўрни ва таъсирини янада ошириш чора-тадбирлари тўғрисида”ги Фармони ҳамда “Ўзбекистон Pеспубликаси Маданият вазирлиги фаолиятини такомиллаштириш чора-тадбирлари тўғрисида”ги Қарори тасдиқланди.

   Ушбу қарор барча маданият ходимларига дастуриламал десам муболаға бўлмайди. Мазкур Фармон ва Қарорни ўқиб, очиғи, жуда хурсанд бўлдим. Ушбу ҳужжатлар орқали биз ижод аҳлига жуда катта ғамхўрликлар ва имкониятлар яратилиши кўзда тутилган. Айниқса, биз учун энг қувонарлиси, 15 апрель – “Ўзбекистон Pеспубликаси маданият ва санъат ходимлари куни” деб белгилангани бўлди. Шу кунга қадар маданият ва санъат соҳаси ходимларининг алоҳида куни белгиланмаган эди. Бу эса биз каби соҳа ходимларининг қаддини кўтариб, маънавий куч бағишлади.

Таъкидлаш жоизки, узоқ йиллардан буён маданият ва санъат соҳасида муаммо ва масалалар йиғилиб қолган эди. Мазкур Фармон ва Қарор билан ушбу муаммолар тўлиқ ечилиши белгилаб берилди.

   Маданият ва санъат барча даврларда ҳам ўз даражасини йўқотмаган. Иқтидорли қурувчи ажойиб иморат қурса, у хақиқий санъат асари ҳисобланади. Маданият ва санъат арбоблари, ижодкор зиёлилар миллатнинг маданий, маънавий юзидир. Айнан шу сабаб маданият – миллат ойнаси, жамиятнинг юзи ҳисобланади. Ҳар бир миллат ўз маданиятини чуқур ҳис қилмаса у қанотсиз қуш кабидир.

Бизга сир эмаски, бугунги кунда кўплаб ёшларимиз ғарб маданиятининг айрим турларидан андоза олаётган бир пайтда, уларни миллий қадриятларимизга мос бўлган ҳолда тарбиялаш, ўзлигимизни англатиш, улар қалбида миллий меросларимизга бўлган ҳурмат ва эҳтиром уйғотиш бош вазифамизга киради.

  Ўзбекистон иқтисодий жиҳатдан қудратли бўлиши бетакрор маданият ва қадриятларимизни чуқур ҳис қилувчи жамиятни шакллантиришга тўхтовсиз ҳаракатда бўлиш ҳар бир соҳа ходимининг бурчидир. Айниқса,  бу борада маданият ходимлари янада фаол бўлмоғи керак. Шундай синовли кунларда маданият соҳаси ходимларини рухлантирган мазкур Фармон ва Қарорнинг қабул қилиниши барчамизнинг давлатимиз маданияти ва санъатини ривожлантириш йўлидаги мақсадимизга қанот бўлиб, ойдин манзиллар томон шахдам қадамлар қўйишга куч бағишлайди.

Мазкур ҳужжатлар билан эндиликда, 2020 йил 1 сентябрдан давлат органлари ва ташкилотлари тизимидаги маданият саройлари ва бошқа муассасаларда тўлиқ жонли ижро асосида ўтказилган концерт дастурлари учун ижара тўловидан 50 фоиз чегирма бериш тартиби жорий этилиши ҳақиқий санъат жонкуярлари учун юксак моддий ва маънавий рағбат бўлди. Айниқса, санъаткор, ижодкор ва ижрочиларнинг муаллифлик ҳуқуқларини ҳимоя қилиш палатасини ташкил этиш ташаббуси аҳли санъат борки, орзуларимизга қанот бағишлади. Ҳар бир ҳудудда  кўчма цирклар гуруҳлари, ҳайвонот боғлари ташкил этиш, шунингдек, оммавий тадбирлар ўтказиш билан боғлиқ ишларнинг раҳбарликка олиниши янада қувонарлидир.

Ушбу Фармон орқали бизга берилган кенг имкониятлар ва имтиёзлардан оқилона фойдаланиб, касбимизни янада севиб-ардоқлашга, куч-ғайрат билан кўпроқ меҳнат қилишга, санъат ва маданиятимизнинг ҳали очилмаган қирраларини ҳам намоён этишга интилиб меҳнат қилаверамиз.             

                   
                                    
Шуҳрат ЮСУПОВ,
туман Маданият бўлими раҳбари.