ҒЎЗАНИ СУҒОРИШДА ЭГИЛУВЧАН ҚУВУРЛАРДАН ФОЙДАЛАНИШ ЭНГ МАҚБУЛ ВА ТЕЖАМКОР УСУЛ
Зироатчиликда мўл-кўл даромад топаман, деган деҳқон ҳар бир ишда тадбир ишлатади. Деҳқон тадбиркор бўлса, муаммолар ечимини ҳам ўзи топиб, жойида ўзи ҳал қилади.
Тўлқин овулида ана шундай тадбиркор деҳқонлар кўп. Хусусан, “Амет Тўраев” фермер хўжалиги раҳбари Эркинбой Тўраев соҳада олиб борилаётган ислоҳотлар, инновацион лойиҳаларни ўз фаолиятига жорий этиш орқали пахта ва бошқа қишлоқ хўжалик маҳсулотлари етиштиришда ўз тажриба мактабини яратганлардан. Айниқса, тежамкорлик даромадига-даромад қўшишини фермер жуда яхши билади. Шу боис, у жорий йилги зироатчилик мавсумида туман фермер хўжаликлари орасида биринчилардан бўлиб, ғўзани шарбат усулида суғоришда эгилувчан қувурлардан фойдаланиш усулини бошлаб берди.
Жорий йилнинг 1 июнь куни мазкур фермер хўжалигида “Ғўзани шарбат усулида суғоришда эгилувчан қувурлардан фойдаланишнинг афзалликлари” мавзусида кўргазмали семинар-кенгаш ўтказилди.
Кўргазмали семинар-кенгаш ишида туман ҳокимининг қишлоқ ва сув хўжалиги масалалари бўйича ўринбосари Файзулла Саъдуллаев, туман фермер, деҳқон хўжаликлари ва томорқа ер эгалари Кенгаши раиси Илҳом Полвонов, “Amydaryo tex” МЧЖ бошлиғи ўринбосари Раҳимбой Жумабоев, МТП раҳбарлари, соҳанинг бошқа мутахассислари ҳамда Тўлқин овули ҳудудидаги фермер хўжаликлари раислари иштирок этишди.
Кўргазмали семинар-кенгаш жараёнида бир текис эгат олинган далаларга эгилувчан қувурлар орқали сув тарашнинг афзалликлари, ғўза қатор ораларига бериладиган сув сарфи ва тежаладиган сув миқдори ҳамда ишчи кучи, бундан хўжалик иқтисодиётига келадиган фойда хусусида етакчи мутахассислар томонидан зарур маълумотлар ва тавсиялар берилди.
Шунингдек, ушбу тежамкор технологиянинг яна бир афзаллик томони, яъни, оддий суғориш жараёнида юз бериши мумкин бўлган ғўзани сув босиш ҳолатига барҳам берилиши, ҳар бир туп ғўза зарур миқдордаги сув билан таъминланиши, натижада ҳосил нишоналари юз фоиз сақлаб қолинишига эришиш мумкинлигига алоҳида эътибор қаратилди. Чунки кўпчилик фермер хўжаликларида сувбосди бўлган ғўзалар ҳосил нишоналарини ташлаб юбориши оқибатида ҳосилдорлик камайиб кетиши тажрибалардан аён. Эгилувчан қувурлардан фойдаланилганда ана шундай нохуш ҳолатнинг олди олинади ва хўжалик иқтисодига ижобий самара беради.
Кўргазмали семинар-кенгаш давомида фермер хўжаликлари раислари ўзларини қизиқтирган саволлар билан мурожаат қилдилар ва мутахассислар томонидан зарур тавсиялар олдилар. Шу билан бирга ғўзани шарбат усулида суғоришда эгилувчан қувурлардан фойдаланиш технологиясини ўз фаолиятларида жорий этиш бўйича фикрларини билдирдилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
