GʻOʻZANI SUGʻORIShDA EGILUVChAN QUVURLARDAN FOYDALANISh ENG MAQBUL VA TEJAMKOR USUL
Ziroatchilikda moʻl-koʻl daromad topaman, degan dehqon har bir ishda tadbir ishlatadi. Dehqon tadbirkor boʻlsa, muammolar yechimini ham oʻzi topib, joyida oʻzi hal qiladi.
Toʻlqin ovulida ana shunday tadbirkor dehqonlar koʻp. Xususan, “Amet Toʻrayev” fermer xoʻjaligi rahbari Erkinboy Toʻrayev sohada olib borilayotgan islohotlar, innovatsion loyihalarni oʻz faoliyatiga joriy etish orqali paxta va boshqa qishloq xoʻjalik mahsulotlari yetishtirishda oʻz tajriba maktabini yaratganlardan. Ayniqsa, tejamkorlik daromadiga-daromad qoʻshishini fermer juda yaxshi biladi. Shu bois, u joriy yilgi ziroatchilik mavsumida tuman fermer xoʻjaliklari orasida birinchilardan boʻlib, gʻoʻzani sharbat usulida sugʻorishda egiluvchan quvurlardan foydalanish usulini boshlab berdi.
Joriy yilning 1-iyun kuni mazkur fermer xoʻjaligida “Gʻoʻzani sharbat usulida sugʻorishda egiluvchan quvurlardan foydalanishning afzalliklari” mavzusida koʻrgazmali seminar-kengash oʻtkazildi.
Koʻrgazmali seminar-kengash ishida tuman hokimining qishloq va suv xoʻjaligi masalalari boʻyicha oʻrinbosari Fayzulla Saʼdullayev, tuman fermer, dehqon xoʻjaliklari va tomorqa yer egalari Kengashi raisi Ilhom Polvonov, “Amydaryo tex” MChJ boshligʻi oʻrinbosari Rahimboy Jumaboyev, MTP rahbarlari, sohaning boshqa mutaxassislari hamda Toʻlqin ovuli hududidagi fermer xoʻjaliklari raislari ishtirok etishdi.
Koʻrgazmali seminar-kengash jarayonida bir tekis egat olingan dalalarga egiluvchan quvurlar orqali suv tarashning afzalliklari, gʻoʻza qator oralariga beriladigan suv sarfi va tejaladigan suv miqdori hamda ishchi kuchi, bundan xoʻjalik iqtisodiyotiga keladigan foyda xususida yetakchi mutaxassislar tomonidan zarur maʼlumotlar va tavsiyalar berildi.
Shuningdek, ushbu tejamkor texnologiyaning yana bir afzallik tomoni, yaʼni, oddiy sugʻorish jarayonida yuz berishi mumkin boʻlgan gʻoʻzani suv bosish holatiga barham berilishi, har bir tup gʻoʻza zarur miqdordagi suv bilan taʼminlanishi, natijada hosil nishonalari yuz foiz saqlab qolinishiga erishish mumkinligiga alohida eʼtibor qaratildi. Chunki koʻpchilik fermer xoʻjaliklarida suvbosdi boʻlgan gʻoʻzalar hosil nishonalarini tashlab yuborishi oqibatida hosildorlik kamayib ketishi tajribalardan ayon. Egiluvchan quvurlardan foydalanilganda ana shunday noxush holatning oldi olinadi va xoʻjalik iqtisodiga ijobiy samara beradi.
Koʻrgazmali seminar-kengash davomida fermer xoʻjaliklari raislari oʻzlarini qiziqtirgan savollar bilan murojaat qildilar va mutaxassislar tomonidan zarur tavsiyalar oldilar. Shu bilan birga gʻoʻzani sharbat usulida sugʻorishda egiluvchan quvurlardan foydalanish texnologiyasini oʻz faoliyatlarida joriy etish boʻyicha fikrlarini bildirdilar.
Robiya YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
