АМУДАРЁДА 208 ТОННАЛИК ПИЛЛА ХИРМОНИНИ БУНЁД ЭТИШГА КИРИШИЛДИ
Пиллачиликни етти хазинанинг бири дея таърифлашади. Ҳақиқатан ҳам шу соҳа фидойилари бўлган пиллакорлар билан суҳбатлашсангиз, ипак қурти боқишнинг машаққатларидан кўра, фойдали жиҳатлари ҳақида гапирадилар. 40-50 йиллаб ўз хонадонларидан бу мўъжизакор жониворга жой бериб, меҳр билан парвариш қилаётган касаначи пиллакорлар: “Ипак қурти боқилган хонадонда файз-барака бўлади”, - дейишади ва ҳар йили Қорақалпоғистонда биринчилардан бўлиб юксак пилла хирмонини яратадилар. Шунинг учун ҳам амударёлик пиллакорлар номини нафақат Қорақалпоғистонда, балки мамлакатимиз миқёсида ҳурмат-эътибор билан тилга олишади.
Бунинг ўзига хос сабаби ҳам бор, албатта. Чунки Амударё тумани мамлакатимизда энг кўп пилла етиштириб берувчи туманлардан бири ҳисобланади ва ҳар йили давлатга 208 тоннадан зиёд сифатли пилла хом ашёсини етказиб беради.
Жорий йилги пиллачилик мавсумига ҳам амударёлик пиллакорлар жиддий тайёргарлик кўришди. Аввало, мавжуд тут плантациялари ўз вақтида озиқлантирилиб, зарур агротехник тадбирлар амалга оширилди. “Жайхун Силк” МЧЖ корхонаси томонидан янги ва серҳосил навли тут кўчатлари етказиб берилиб, фермер хўжаликлари далалари чеккаларига ҳамда янгидан ташкил этилган тут плантацияларига 343 минг дона серҳосил тут кўчатлари ўтқазилди.
Пиллачиликда юқори ва сифатли ҳосил олишнинг бирдан-бир омили – ипак қурти уруғини жонлантириш жараёнини агротехника талаблари даражасида ташкил этишга боғлиқ. Шуни инобатга олган ҳолда туманимизда юқори савиядаги 16 та инкубаторий танланиб, ипак қурти уруғини жонлантириш жараёнига энг малакали мутахассислар жалб этилди. Инкубаторийлар замонавий асбоб-ускуналар, зарур жиҳозлар билан таъминланди. Натижада ипак қурти уруғлари ўз вақтида сифатли жонлантирилиб, туманимиздаги пиллачилик тармоғини ташкил этган фермер хўжаликларига ва касаначи пиллакорларга жами 3768 қути ипак қурти уруғи тарқатилди. Албатта, ҳар бир соҳада иқтисодий манфаатдорлик масаласи муҳим ўринда туради. Шу боис, шартнома бўйича 1495 нафар касаначиларга тарқатилган 1582 қути, 266 та фермер хўжаликларига тарқатилган 2186 қути ипак қурти парвариши учун ҳар бир қути ипак қурти ҳисобига 240 минг сўмдан бўнак пуллари берилди. Мавсум давомида ҳар бир қуртхона ҳолати мутахассислар томонидан қатъий жадвал асосида назорат қилиб борилди. Зарур ҳолатларда маслаҳат ва тавсиялар берилди. Натижада туманимиздаги барча қуртхоналарда яхши тўйинган, агротехника қоидалари асосида парвариш қилинган ипак қуртига сифатли даста қўйилиб, пилла ўраш жараёни ниҳоясига етмоқда.
5 июнь санасида Манғит ва Хитой пилла қабул қилиш масканларида мавсумининг илк ҳосили – пиллани қабул қилиш жараёни бошланди.
Пиллакорларимиз томонидан етиштирилган мўл ҳосилдан дарак берувчи кумушранг пилла маҳсулотининг сифати ҳам, салмоғи ҳам юқори, ипакчанлик ҳолатидан мутахассисларнинг кўнгли тўқ. Бу йилги мавсумда 208 тонна юқори сифатли Амударё пилласини етиштиришга аҳд қилган “кумуш тола” ижодкорларининг пилла карвони қутлуғ йўлда. Кўзланган манзил эса жуда яқин. 208 тонналик Амударё пилла хирмони бунёдкорларининг аҳдлари улуғ, шаштлари қатъий!
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
