AMUDARYoDA 208 TONNALIK PILLA XIRMONINI BUNYoD ETIShGA KIRIShILDI

Pillachilikni yetti xazinaning biri deya taʼriflashadi. Haqiqatan ham shu soha fidoyilari boʻlgan pillakorlar bilan suhbatlashsangiz, ipak qurti boqishning mashaqqatlaridan koʻra, foydali jihatlari haqida gapiradilar. 40-50-yillab oʻz xonadonlaridan bu moʻʼjizakor jonivorga joy berib, mehr bilan parvarish qilayotgan kasanachi pillakorlar: “Ipak qurti boqilgan xonadonda fayz-baraka boʻladi”, - deyishadi va har yili Qoraqalpogʻistonda birinchilardan boʻlib yuksak pilla xirmonini yaratadilar. Shuning uchun ham amudaryolik pillakorlar nomini nafaqat Qoraqalpogʻistonda, balki mamlakatimiz miqyosida hurmat-eʼtibor bilan tilga olishadi.

Buning oʻziga xos sababi ham bor, albatta. Chunki Amudaryo tumani mamlakatimizda eng koʻp pilla yetishtirib beruvchi tumanlardan biri hisoblanadi va har yili davlatga 208 tonnadan ziyod sifatli pilla xom ashyosini yetkazib beradi.

Joriy yilgi pillachilik mavsumiga ham amudaryolik pillakorlar jiddiy tayyorgarlik koʻrishdi. Avvalo, mavjud tut plantatsiyalari oʻz vaqtida oziqlantirilib, zarur agrotexnik tadbirlar amalga oshirildi. “Jayxun Silk” MChJ korxonasi tomonidan yangi va serhosil navli tut koʻchatlari yetkazib berilib, fermer xoʻjaliklari dalalari chekkalariga hamda yangidan tashkil etilgan tut plantatsiyalariga 343 ming dona serhosil tut koʻchatlari oʻtqazildi.

Pillachilikda yuqori va sifatli hosil olishning birdan-bir omili – ipak qurti urugʻini jonlantirish jarayonini agrotexnika talablari darajasida tashkil etishga bogʻliq. Shuni inobatga olgan holda tumanimizda yuqori saviyadagi 16 ta inkubatoriy tanlanib, ipak qurti urugʻini jonlantirish jarayoniga eng malakali mutaxassislar jalb etildi. Inkubatoriylar zamonaviy asbob-uskunalar, zarur jihozlar bilan taʼminlandi. Natijada ipak qurti urugʻlari oʻz vaqtida sifatli jonlantirilib, tumanimizdagi pillachilik tarmogʻini tashkil etgan fermer xoʻjaliklariga va kasanachi pillakorlarga jami 3768 quti ipak qurti urugʻi tarqatildi. Albatta, har bir sohada iqtisodiy manfaatdorlik masalasi muhim oʻrinda turadi. Shu bois, shartnoma boʻyicha 1495 nafar kasanachilarga tarqatilgan 1582 quti, 266 ta fermer xoʻjaliklariga tarqatilgan 2186 quti ipak qurti parvarishi uchun har bir quti ipak qurti hisobiga 240 ming soʻmdan boʻnak pullari berildi. Mavsum davomida har bir qurtxona holati mutaxassislar tomonidan qatʼiy jadval asosida nazorat qilib borildi. Zarur holatlarda maslahat va tavsiyalar berildi. Natijada tumanimizdagi barcha qurtxonalarda yaxshi toʻyingan, agrotexnika qoidalari asosida parvarish qilingan ipak qurtiga sifatli dasta qoʻyilib, pilla oʻrash jarayoni nihoyasiga yetmoqda.

5-iyun sanasida Mangʻit va Xitoy pilla qabul qilish maskanlarida mavsumining ilk hosili – pillani qabul qilish jarayoni boshlandi.

Pillakorlarimiz tomonidan yetishtirilgan moʻl hosildan darak beruvchi kumushrang pilla mahsulotining  sifati ham, salmogʻi ham yuqori, ipakchanlik holatidan mutaxassislarning koʻngli toʻq. Bu yilgi mavsumda 208 tonna yuqori sifatli Amudaryo pillasini yetishtirishga ahd qilgan “kumush tola” ijodkorlarining pilla karvoni qutlugʻ yoʻlda. Koʻzlangan manzil esa juda yaqin. 208 tonnalik Amudaryo pilla xirmoni bunyodkorlarining ahdlari ulugʻ, shashtlari qatʼiy!

Robiya YOʻLDOShEVA.