СЕКТОP PАҲБАPИНИНГ АМАЛИЙ ЁPДАМИ БИЛАН 3 КИЛОМЕТPЛИК ЙЎЛ ЖОPИЙ ТАЪМИPЛАНДИ

Ўзбекистон Pеспубликаси Президентининг 2017 йил 8 августдаги “Ҳудудларнинг жадал ижтимоий-иқтисодий ривожланишини таъминлашга доир чора-тадбирлар тўғрисида”ги Қарори асосида мамлакатимизнинг барча ҳудудларида ташкил қилинган секторлар давлат органларини аҳоли билан яқинлаштириш, жонли мулоқотни йўлга қўйишда муҳим восита бўлмоқда. Секторлар раҳбарлари томонидан аҳолининг муаммоларини ҳал қилиш борасида қатор амалий ишлар қилинмоқда.

Президентимизнинг 2019 йил 17 январдаги “Аҳоли муаммолари билан ишлаш тизимини янада такомиллаштириш чора-тадбирлар тўғрисида”ги Фармонига мувофиқ ҳудудларни жадал ижтимоий-иқтисодий ривожлантириш масаласи янги босқичга кўтарилди. Фармонга мувофиқ секторлар зиммасига ҳудудларни комплекс ижтимоий-иқтисодий ривожлантиришга эришиш билан бирга аҳоли мурожаатлари билан ишлаш, аҳолини қийнаб келаётган муаммоларни аниқлаш ва батараф этиш, уйма-уй юриш орқали халққа, тадбиркорлик субъектларига яқин кўмакчи бўлиш борасида долзарб вазифалар топширилди.

Туманимизда ташкил этилган тўртта секторлар ҳам ушбу талаблар асосида ўз фаолиятларини олиб бориб, халқимизнинг таянчи, суянчига айланди.

3-сектор раҳбари, Амударё тумани Ички ишлар бўлими бошлиғи Улуғбек Худойберганов аҳоли билан ўтказган учрашувларининг бирида сектор раҳбарига маҳалла ҳудудидан ўтувчи заҳкаш кўприги таъмирга муҳтож бўлиб қолганлиги ҳақида мурожаат келиб тушган эди. Ушбу мурожаат атрофлича ўрганилиб, тегишли ташкилотлар жалб қилинди ва қисқа давр ичида 8 метрлик бетон кўприк таъмирланди.

Эндиликда ҳудуд аҳолиси ва бу йўлдан ўтувчи автомашина ҳайдовчилари, пиёдалар учун анча қулайлик яратилди.

Торёп маҳалласи Улуғбек Худойберганов раҳбарлик қилаётган учинчи сектор ҳудудидага киради. Сектор раҳбари ҳудудларни уйма-уй юриб айланиб, халқ билан жонли мулоқотлар қилиб муаммоларни аниқлашга ва тезкорлик билан чоралар кўриб, зиммасидаги маъсулиятни адо этишга интилади. Хусусан, 2019 йилда Торёп маҳалласида тўрт марта аҳоли билан сайёр қабул ўтказди ва уйма-уй юриб муаммоларни, аҳоли турмушидаги камчиликларни ўрганди.

Айниқса, ўсмирлар, ёшлар билан учрашиб, уларнинг ёт ғоялар таъсирига берилмаслиги, ўқиб, илм олишлари ва баркамол бўлиб вояга етишлари учун яратилган шароитлар ҳақида суҳбатлашиб, келажагимиз эгаларининг жамиятимизга керакли инсонлар бўлиб вояга етишишларига муносиб ҳисса қўшмоқда. Жамоат тартибини сақлаш, маъмурий ҳуқуқбузарликларнинг, жиноятларнинг олдини олиш борасида олиб борилган тарғибот ишлари натижасида ҳудудда аҳоли тинчлик-осойишталиги таъминланмоқда. Коронавирус пандемияси туфайли ўрнатилган карантин қоидаларини бузиш каби нохуш ҳолатлар содир этилмади, аҳоли уйда қолиб, ҳунари, чорваси, деҳқончилиги туфайли даромад топиб, фаровон яшашмоқда.

Чиндан ҳам кейинги вақтларда Манғит-Куюк кўпир йўли орқали Хўжаовул аҳоли пунктидан ўтиб, Торёп маҳалласига олиб борувчи йўлнинг нотекислигидан йўловчилар азият чекаётган, бу бўйича сектор раҳбарига мурожаатлар ҳам келиб тушган эди. Йўлнинг 3 километрлик қисми сектор раҳбари Улуғбек Худойбергановнинг амалий ёрдами билан жорий таъмирлангани учун ҳудуд аҳолиси унга миннатдорчилик билдирмоқда. Зарур жойларига майда тош тўкилиб, махсус техникалар ёрдамида ёйилган ва зичланган йўлнинг ушбу қисмининг ҳолати жорий таъмирдан кейин аввалгисидан анча яхшиланди. Шуни ҳам айтиб ўтиш керакки, йўл таъмири ишларида маҳалла ёшлари ҳам кўнгилли сифатида ёрдамга келишди.

Бир сўз билан айтганда, секторлар аҳолининг турмуши фаровонлашувида, кундалик ҳаётдаги муаммоларининг аниқланиши ва бартараф этилишида муҳим аҳамият касб этмоқда.

Ойгул PАЖАБОВА.