ЕР – БЕБАҲО ХАЗИНА, БУНИ АМУДАРЁЛИК ФЕРМЕРЛАР, ДЕҲҚОНЛАР ЯХШИ БИЛИШАДИ

Ўтган йиллар давомида давлатимиз томонидан Қонунлар, муҳим Фармон ва Қарорлар, давлат дастурлари қабул қилиниши ҳамда уларнинг ижроси изчил бажарилиши фермер, деҳқон хўжаликлари ва томорқа ер эгаларининг қишлоқ хўжалиги маҳсулотларини ишлаб чиқарувчи асосий субъектлар сифатида шаклланишига замин яратди.

Туманимизда ҳам экин ерларидан самарали фойдаланиш, фермер, деҳқон хўжаликлари ва томорқа ер эгаларининг ҳуқуқларини ва қонуний манфаатларини ҳимоя қилиш, қишлоқда фуқароларнинг бандлиги ва фаровонлигини ошириш бўйича тизимли ишлар амалга оширилмоқда.

Ўзбекистон Республикаси Вазирлар Маҳкамасининг “Деҳқон хўжаликлари ва аҳоли томорқаларидан самарали фойдаланиш, экин экиш ишларини тизимли ташкил қилиш ҳамда маҳсулот етиштириш ҳажмларини кўпайтириш чора-тадбирлари тўғрисида”ги Қарорига мувофиқ туманда фермер, деҳқон хўжаликлари ва томорқа ер эгалари фаолиятини янада ривожлантириш, уларнинг экин майдонларидан самарали фойдаланишни ташкил этиш бўйича чора-тадбирлар дастури ишлаб чиқилди.

2020 йил баҳор мавсумида туманда 158 гектар сабзи, 180,5 гектар пиёз, 15,8 гектар саримсоқ пиёз, 225,6 гектар бодринг, 169,2 гектар кўкатлар, 694,3 гектар картошка, 477,3 гектар полиз экинлари, 631,7 гектар помидор ва бошқа экинларни экиш режалаштирилган эди. Жами 1778,5 гектар томорқа ерларидан тўлиқ  фойдаланишни назорат қилиш бўйича ишчи гуруҳ шакллантирилди ва ишчи гуруҳ аъзолари билан биргаликда мавжуд аҳоли томорқаларини хатловдан ўтказиш жараёнида деҳқон хўжаликлари ҳамда томорқа ер эгаларининг талаб ва  истаклари, ҳудуднинг иқлим шароитидан келиб чиқиб, тайёрланган таклифлар бўйича туманда эртаги сабзавотлар ўз муддатида экилди ва етиштирилган ҳосил ўз вақтида йиғиб олинди. 3141,9 гектар ер майдонига экилган ўртаги ва кечги экинлар эса пишиб-етилмоқда.

2021 йил ҳосили учун 1139 гектар тўқсонбости экинлари экиш режалаштирилган бўлиб, 25 август ҳолатига 210,8 гектар майдонда тўқсонбости экинлари экилди.

Аҳоли хонадонлари ва томорқаларидан самарали фойдаланиш, 2-3 марта ҳосил олиш тўғрисида тушунтириш-тарғибот ишлари тизимли равишда олиб борилмоқда.  Натижада аҳоли томорқаларида кўзланганидан зиёд эртаги картошка, помидор, бодринг, полиз маҳсулотлари, витаминга бой мевалар, кўкатлар ва резаворлар етиштирилди.

Дуккакли экинлардан эса 700 тонна ҳосил олиш режалаштирилган.

Аҳоли томорқаларида 1183 та иссиқхона мавжуд бўлиб, шундан 450 таси янгидан барпо этилган.

Ташаббус билан чиққан 389 та фермер хўжаликлари аҳоли томорқа ер майдонларини ҳайдаш, мевали дарахтлар, сабзавот уруғлари ва кўчатлар етказиб беришда кўмаклашиш бўйича 3377 та хонадонларга бириктирилди.

2020 йил январь-март ойларида 4 та сектор раҳбарлари бошчилигида аҳоли хонадонларига кириб, эрта баҳорда камида 5-10 тадан мевали дарахт кўчатлари, эртаги сабзавотлар экиш, иссиқхоналар барпо этиш, чорва моллари ва парранда боқишни ташкил этиш ҳамда ердан самарали фойдаланиш бўйича тарғибот ишлари олиб борилгани ўзининг ижобий самарасини берди.

Туман ҳокими қарори билан, мева-сабзавот ишлаб чиқариш кооперативлари ташкил этилиб, 5 та ишлаб чиқариш кооперативига 35 гектар ер ажратиб берилди ва 112 нафар кам таъминланган фуқаролар кооператив аъзолигига қабул қилиниб, уларнинг бандлиги таъминланди. Ушбу фуқароларга ер майдони берилиб, Бандликка кўмаклашиш давлат жамғармаси ҳисобидан ҳар бирига 2 миллион 223 минг сўмдан субсидиялар ажратилди.

Бундан ташқари, туман ҳокимининг 2020 йил 24 апрелдаги 103-сонли қарорига асосан 10 та деҳқон хўжалиги ташкил қилинди. Уларга 3,16 гектар ер майдонлари ажратилди. Шу орқали уларнинг бандлиги таъминланишига эришилди.

Туман ҳокими 2020 йил 1 июнь санасида яна бир муҳим қарорни имзолади. Ушбу 132-сонли қарорга кўра, фермер хўжаликларининг ғалладан бўшаган ер майдонларида такрорий экин экиш учун кам таъминланган 45 та оилага 20 сотихдан жами 9 гектар ер бир марта экиб, самарали фойдаланишлари ва ўз бандлигини таъминлаш ҳамда зарур озиқ-овқат маҳсулотларини етиштириб олишлари бўйича тавсиялар берилди.

Қорамон маҳалласида яшовчи Янгибой Султанов оиласи эса туман фермер, деҳқон хўжаликлари ва томорқа ер эгалари Кенгаши ёрдами билан 3 сотихли иссиқхона эгалари бўлишди.

Туманимизда 389 та фермер хўжаликлари мавжуд. Шундан 357 таси пахтачилик ва ғаллачиликка, 13 таси чорвачиликка, 5 таси паррандачилик ҳамда 6 таси боғдорчилик ва узумчиликка ихтисослашган. Балиқчилик йўналишида эса 2 та, сабзавотчилик йўналишида 7 та фермер хўжаликлари фаолият юритади.

Кўп тармоқли фермер хўжаликларини ташкил этиш ва ривожлантириш, улар томонидан қишлоқ хўжалиги маҳсулотларини етиштириш, қайта ишлаш ҳажмларини кўпайтириш ва сервис хизматлари шохобчаларини ташкил этиш бўйича чора-тадбирлар амалга оширилиб келинмоқда.

Туманимизда 2020 йилда кўп тармоқли фермер хўжаликларини ривожлантириш бўйича қабул қилинган  Дастурга мувофиқ 22 та интенсив боғ, 7 та балиқчилик, 7 та қорамолчилик, 15 та қўйчилик, 2 та эчкичилик, 22 та паррандачилик, 11 та асаларичилик тармоқлари ташкил қилинди. 996 миллион сўмлик ушбу лойиҳалар фермер хўжаликлари ҳисобидан амалга оширилиб, 97 та янги иш ўринлари яратилди.

 И.ПОЛВОНОВ, туман Фермер, деҳқон хўжаликлари

ва томорқа ер эгалари Кенгаши раиси.