АМУ ЭЛНИНГ ЎЗ ҚИЗИГА АЙЛАНГАН ЗУЛХУМОР

Шифо аҳли учун ҳеч қаерда ёзилмаган бир қоида бор: кун-у туннинг қайси маҳалида бўлишидан қатъий назар, бемордан чақирув бўлдими, сумкасини елкалаб тезда йўлга шайланади. Ўз бурчини садоқат билан бажаришга киришади. Касбий фаолиятига, Гиппократ қасамига содиқлик туйғуси шифокорни ҳар лаҳзада сафарбар ҳолатда яшашга ундайверади.
Уларнинг фидойиликлари, элим, юртим, деб интилишларини ҳис этмоқ учун фақатгина бир кеча – тонг отгунча бир бемор ҳолатини кузатмоқ кифоя. Зеро, шифо аҳли бутун ҳаёти, билим ва тажрибаси, куч-ғайратини ана шундай беором фаолиятга бахш этиб яшайдилар.
Зулхумор Маматқулова ана шундай юзлаб, минглаб фидойилардан бири. Асли Қашқадарёлик Зулхумор Маматқулова ўз касбий фоаолияти, фидойилиги, ташкилотчилиги ва ниҳоятда киришимлилиги билан амударёликларнинг азиз фарзандига айланди. Гастроэнтеролог-шифокор сифатида юзлаб инсонларнинг дардига дармон бўлди. Тиббиёт бирлашмасининг замонавий талабларга жавоб берадиган, яхши жиҳозланган физиотерапия бўлими ташкил этилишида елиб-югурди, бўлимни намунали тиббий муолажа масканига айлантирди. Физиотерапия бўлими раҳбари сифатида бўлим учун ажратилган хоналарни таъмирлаш, даволанувчилар учун зарур шарт-шароитлар яратиш ишларига бош-қош бўлди.
Ташаббускор шифокор тиббиёт соҳасида хусусий секторни ривожлантиришга ҳисса  қўшиш мақсадида 2017 йилда «Mohidil shifo med» масъулияти чекланган жамият шаклидаги хусусий клиникани ташкил этди. Ўзбекистон Республикаси Соғлиқни сақлаш вазирлиги томонидан тиббий фаолиятни амалга ошириш учун махсус лицензия олган 2017 йилнинг 8 сентябрь санаси Зулхумор Маматқулованинг ҳаётидаги энг қувончли кун бўлиб қолди.
Айни кунда аҳолига УЗИ текшируви, ЭХО кардиография, ЭКГ, лаборатория текширувлари, компьютер ёрдамида умуртқа поғонасини чўзиш, уқалаш, парафин, юрак-қон томир, асаб касалликлари, ошқозон-ичак, буйрак, қандли диабет, нафас йўллари каби касалликларни даволаш бўйича хизмат кўрсатишга ихтисослашган мазкур клиникада беморлар учун барча шароитлар яратилган.
«Mohidil Shifo med» хусусий клиникаси шаҳар марказида, туманимизнинг барча овул ва маҳаллаларидан автотранспорт воситалари серқатнов ҳудудда жойлашгани, замонавий инфратузилмага  эгалиги аҳолига манзур. Бундан ҳам муҳими, 20 ўринга мўлжалланган мазкур шифо масканида 6 нафар юқори малакага эга мутахассис шифокорлар, 6 нафар ўрта ва 4 нафар кичик тиббий ходимлар тун-у кун халқимиз хизматида. Аҳолига янада яхши қулайликлар яратиш мақсадида клиникага ўз маблағлари ҳисобидан юқори аниқликдаги «LOGIC» УЗИ аппарати олиб келиб ўрнатилди ва 4 та янги иш ўрин яратилди.
Изланувчан, тиниб-тинчимас Зулхумор Маматқулова тиббиёт соҳасига оид янгиликлар ва замонавий муолажа усулларини ўзлаштириб бориш билан бирга амалиётга жорий этиш борасида ҳам самарали фаолият олиб бормоқда. Клиника раҳбари ҳамда малакали шифокор сифатида у озоонтерапия муолажа усулини қунт билан ўрганди, тинмай малакасини оширди. Натижада клиникада озоонтерапия муолажа усулини йўлга қўйди.
Озон – бактерия, вирус ва замбуруғларни нобуд қилади, ҳатто организмнинг тикловчи жараёнларини тезлаштириб, тўқималарда кислород етишмовчилигини бартараф этади. Озонли муолажа, айниқса, ҳозирги пандемия шароитида беморга жуда муҳим. Шифокорларнинг фикрича, доимий равишда озонли муолажа олиб турган киши соғломлашиб, яшариб кетади, фақат қатъий муолажа тартибига амал қилиш керак.
Клиникада 2020 йил бошидан бери 13 минг 562 нафар беморга сифатли тиббий хизмат кўрсатилиб, шундан 200 нафардан зиёд бемор амбулатор, 545 нафари эса стационар шароитда даволаниб, оилалари бағрига қайтишди.
Шифо масканида даволанган, ўз дардларига шифо топган инсонлар, гарчи соғайиб кетишсалар-да, бу ерга, Зулхумор Маматқулова билан учрашиш, зарур тавсиялар олиш учун тез-тез келиб туришади. Уларнинг миннатдор нигоҳларидан ўзларига ҳаёт гўзалликларидан баҳра олиш, соғломлик бахш этган нажоткор шифокорига нисбатан меҳр ва самимият туйғуларини илғаб олиш қийин эмас. «Mohidil shifo med»  клиникаси  ана шундай меҳр ва самимият нурларидан ҳамиша чароғон ва гавжум.
Клиника раҳбари, олий тоифали гастроэнтеролог-шифокор Зулхумор Маматқулованинг ҳар бир иш куни ана шундай миннатдор кўнгиллар гавжумлигида, халқ саломатлигини муҳофаза қилишдек эзгу мақсадлар билан ўтаверади. Фидойи меҳнат ва халқ меҳри билан сайқалланган касбий фаолияти эса Зулхумор Маматқулованинг умр мазмунига айланган. Зеро, Аму элининг ўз қизи каби азиз Зулхуморхон учун халқ соғлигидан ҳам улуғроқ неъмат ва бахт йўқ.

Робия ЙЎЛДОШЕВА.