“МЕН – БОЛАМАН ВА МЕНИНГ ҲАМ ҲУҚУҚЛАРИМ БОР” МАВЗУСИДА ОЧИҚ ДАРСЛАР ТАШКИЛ ҚИЛИНДИ

Инсон ҳуқуқлари ҳақида сўз борар экан, энг аввало, бола ҳуқуқлари кўз ўнгимизда гавдаланади. Зеро, инсон шахсияти айнан болаликда шаклланади, тобланади. Бола ҳуқуқлари ҳимояси таъминланган жамиятдагина келажакнинг чинакам ворислари камол топади, ўзига бўлган ишонч ва ҳурмат туйғуси ортади. Юртимизда болалар ҳуқуқларини ҳимоя қилиш, уларга муносиб яшаш ва ўқиш шароитларини яратишга алоҳида эътибор қаратилмоқда. 

Жорий йилнинг 13 ноябрь санасида туман Халқ таълими бўлимига қарашли 1-сонли ҳамда 40-сонли умумтаълим мактабларида бола ҳуқуқ ва эркинликлари ҳимоясига бағишланган очиқ дарслар ташкил қилинди. 1-сонли мактабнинг 5-“А” синфида ўқитувчи Муҳаббат Худойбергенова, 5-“В” синфда Зевар Атажанова, 6-“А” синфда Дилноза Иброҳимова, 7-Б синфда Маҳбуба Тожибоева, 7-В синфда Дилноза Қодировалар “Мен – боламан ва менинг ҳам ҳуқуқларим бор!” мавзусида очиқ дарслар ташкил қилдилар. Очиқ дарсларда маҳоратли педагоглар томонидан мавзу замонавий инновацион технологиялардан фойдаланган ҳолда, таъсирчан етказиб берилди.

Хусусан, бола ҳуқуқлари, эркинликлари ва қонуний манфаатларини ҳимоя қилиш тизимини янада такомиллаштириш, бола ҳуқуқларининг кафолатларини таъминлаш ва ушбу соҳадаги халқаро мажбуриятларни бажаришнинг таъсирчан тизимини яратиш мақсадида қабул қилинган “Бола ҳуқуқларини ҳимоя қилиш тизимини такомиллаштириш бўйича қўшимча чора-тадбирлар тўғрисида”ги Ўзбекистон Республикаси Президентининг Қарори бу борадаги ишларни амалга оширишда муҳим ҳужжат бўлиб хизмат қилмоқда.

Бу борада юртимизда етарлича ҳуқуқий асос яратилган. Хусусан, Ўзбекистон Республикаси Президентининг “Бола ҳуқуқларини ҳимоя қилиш тизимини такомиллаштириш бўйича қўшимча чора-тадбирлар тўғрисида”ги Қарори билан бола ҳуқуқлари эркинликлари ва қонуний манфаатларини ҳимоя қилиш тизимини янада такомиллаштириш, бола ҳуқуқларининг кафолатларини таъминлаш ва ушбу соҳадаги халқаро мажбуриятларни бажаришнинг таъсирчан тизимини яратиш мақсадида Олий Мажлиснинг Инсон ҳуқуқлари бўйича вакили, яъни Омбудсман ўринбосари – Бола ҳуқуқлари бўйича вакил лавозими жорий этилган.

Бола ҳуқуқлари бўйича вакилга бир қатор вазифалар юклатилди. Масалан, у имконияти чекланган болалар, шунингдек, етим болалар ва ота-она қарамоғидан маҳрум бўлган болалар тарбия муассасаларини тамомлагандан кейин уларнинг ижтимоий мослашувига кўмаклашади. Шунингдек, тарбия муассасаларини тамомлаган уй-жойга муҳтож етим болалар ва ота-она қарамоғидан маҳрум бўлган болаларнинг турар-жой билан таъминланишига ёрдам беради. 

Бола ҳуқуқлари ҳимоясига бағишланган очиқ дарслар 40-сонли мактабнинг 5-“А” синфида ўқитувчи Сайёра Тиловова томонидан, 6-“А” синфида Дилбар Хўжамуродова, 6-“Б” синфда Муборак Ражабова, 8-“Г” синфда Элёр Ҳайтбоев, 9-“А” синфда Ирода Яхшимуродовалар томонидан ҳам ташкил қилинди.

Айтиш керакки, умумтаълим мактабларида “Мен – боламан ва менинг ҳам ҳуқуқларим бор!” мавзусида очиқ дарсларни ташкил қилишдан кўзланган асосий мақсад болаларнинг ҳуқуқларини ҳимоя қилиш бўйича халқаро ва миллий қонунлар тўғрисида билимларни шакллантириш, фарзандларимизни умуминсоний ва умуммаданий қадриятларга ҳурмат руҳида тарбиялаш, мамлакатда ва бутун дунёда бўлаётган сиёсий, ижтимоий-иқтисодий воқеаларга дахлдорлик туйғусини шакллантиришдан иборат.

Шу мақсадда ташкил қилинган очиқ дарслар ўқувчиларни кичик гуруҳларга ажратган ҳолда ноанънавий тарзда, турли инновацион технологиялардан фойдаланган ҳолда ўтказилиши ўқувчиларнинг ўз ҳуқуқлари ва эркинликларини билишга бўлган қизиқишларини янада оширди. Ўқитувчилар дарсларда мавзу юзасидан тақдимотлар, тарқатма материаллар, қизиқарли ўйин методларидан фойдаландилар.

Дарсларда ўқувчилар бола ҳуқуқлари ҳимояси борасида ўзларини қизиқтирган барча саволларга тўлиқ жавоблар олдилар. Шунингдек, бу бўйича тушунчаларини мустаҳкамлаб, билимларини янада бойитдилар.

Чарос Арслонова.