“Янги ўзбекистон – янгича дунёқараш” шиори остида тарғибот тадбирлари давом этмоқда

Давлатимиз раҳбари томонидан мамлакатни ҳар томонлама ижтимоий-иқтисодий, сиёсий, маданий жиҳатдан ривожлантириш мақсадида ишлаб чиқилган Ҳаракатлар стратегиясида белгиланган вазифалар ижросини таъминлаш мақсадида туманимизга ташриф буюрган тарғибот гуруҳи томонидан барча ҳудудларда маданий-маърифий тадбирлар ўтказилди. Ундан ташқари, тадбирларни ўтказишдан ёшларни адабиёт, санъат, спорт, ахборот технологияларига бўлган қизиқишларини янада ошириш бўйича илгари сурилган бешта муҳим ташаббусни кенг тарғиб қилиш кабилар ҳам кўзланди. Туман аҳолиси томонидан ушбу тадбирларнинг барчаси катта қизиқиш билан қарши олинди.

17 ноябрь куни адабиёт, санъат, таълим вакилларидан иборат тарғибот гуруҳи томонидан ташкил этилган тадбирлар чекка ҳудудлардаги Қангли овулида жойлашган 29-сонли мактабда, Назархон овулидаги 3-сонли мактабда ҳамда Қипчоқ шаҳарчасидаги 21-сонли Болалар мусиқа ва санъат мактабида бўлиб ўтди. Тарғиботчилар, аввало, мактаблар ҳаёти билан яқиндан танишдилар, ўқувчиларнинг таълим-тарбия олишлари учун мактабларда яратилган шарт-шароитларни катта қизиқиш билан ўргандилар. Бўлиб ўтган тадбирларда мактабларнинг ижодкор, изланувчан ўқувчиларининг ижод намуналари, қўл меҳнатлари маҳсуллари меҳмонлар эътиборига ҳавола қилинди. Маданий-маърифий тадбирларда китоб ўқиш, адабиёт ва санъатнинг инсон ҳаётидаги аҳамияти, спорт билан шуғулланишнинг инсон саломатлигидаги ўрни, ахборот технологияларининг ҳаётимизга жадаллик билан кириб келаётгани, уларни ўрганиш замон талаби эканлиги, ёшларни ҳар томонлама қўллаб-қувватлашга, ёшлар ва хотин-қизлар бандлигини таъминлашга қаратилаётган эътибор хусусида сўз юритилди.

Таъкидланганидек, адабиёт ва санъат  инсон ҳаётини мазмунли қилади, маънавий жиҳатдан бойитади. Улар инсоннинг гўзалликка бўлган эҳтиёжларини қондириши баробарида, унинг ҳис-туйғуларини уйғотади, ижодий қобилиятини ривожлантиради, эзгулик сари етаклайди. Бу билан инсоннинг маънавий ўсишига шароит яратади, ижтимоий ва шахсий ҳаётида энг мураккаб муаммоларни ҳал этишга ёрдам беради, ҳар бир киши ҳаётда ўз ўрнини топишига ҳам кўмаклашади. Бунинг учун, энг аввало, адабиёт ва санъатни тушуниш, у билан ошно бўлиш лозим. Тадбирларда ижро этилган адабиёт ва санъат намуналари, нафис шеърлар, гўзал куй-қўшиқлар юртдошларимизда кўтаринки кайфият уйғотди.

Маънавий-маърифий тадбирлар куннинг иккинчи ярмида Қум ёп маҳалласидаги 39-сонли мактабда, Беш том маҳалласидаги 24-сонли мактабларда давом эттирилди. Юқори кайфиятда ўтказилган тадбирларда юртдошларимиз мамлакатимизда барча соҳаларда амалга оширилаётган кенг кўламли ислоҳотлар мазмун-моҳияти билан таништирилди. Тарғибот тадбирларини ташкил қилишдан кўзланган асосий мақсадларга эришилди.

“Янги ўзбекистон – янгича дунёқараш” тадбири кўп сонли аҳоли қалбига қувонч улашди. Тарғибот гуруҳи аъзолари ҳам ўз навбатида маънавий-маърифий тадбирларнинг савияли, кўтаринки руҳда ўтишида амалий ёрдам кўрсатган мактаблар жамоаларига ва бошқа ташкилотлар масъулларига ўз миннатдорчиликларини билдирдилар.

Чарос Арслонова.