ИМКОНИЯТИ ЧЕКЛАНГАН, ЛЕКИН ИНТИЛИШЛАРИ ЧЕКСИЗ ИНСОНЛАР

Атрофимизда шундай инсонлар ҳам борки, уларнинг ҳаракатлари, интилишлари, ногирон бўлсалар-да, амалга  ошираётган эзгу ишлари ва ҳаётда эришаётган ютуқларини кўриб, беихтиёр уларни тўрт мучаси соғ инсонлар билан солиштирамиз. Ахир ўзлари соғлом, бардам-бақувват бўлатуриб, қайсидир моддий эҳтиёжини қондириш мақсадида давлат ва жамоат ташкилотлари идораларига ижтимоий ёрдам сўраб, тинимсиз мурожаат қилувчилар камми? Афсуски, шундайларнинг кўпчилиги  айрим имконияти чекланган инсонларнинг қалбларида кечадиган ҳаётга нисбатан жўшқин туйғуларни идрок эта олмайдилар.

Тақдирини ўз қўллари, сабр-матонати билан яратаётган, эзгу интилишлари билан жамиятда ўз ўрнини топаётган бундай инсонлар кўп.

Айни пайтда Ўзбекистон Ногиронларлар жамияти туман бўлинмасининг 40 нафардан зиёд аъзолари бор. Жамият  аъзоларининг тўлақонли шахс сифатида шаклланишлари, ўз орзу-интилишларини қобилиятларини намоён этишлари учун бўлинма томонидан зарур шарт-шароитлар яратилган.

– Биз турли лойиҳалар, грант танловларида фаол иштирок этиб келамиз, – дейди Ўзбекистон Ногиронлар жамияти туман бўлинмаси раҳбари Нилуфар Холбоева. – Бир неча марта Олий Мажлис ҳузуридаги ННТлар ва фуқаролик жамиятининг бошқа институтларини қўллаб-қувватлаш жамоат фондининг грантларини ютиб олдик. Ана шу грант маблағлари асосида жамият аъзолари учун қулай шароитлар яратилишини таъминладик.

Грант маблағлари ҳисобидан имконияти чекланган, билим олишга, касб-ҳунар ўрганишга интилувчан фуқаролар ва ёшлар учун компьютер, ўқув жиҳозлари, зарур ускуналар сотиб олиниб, Н.Холбоева раҳбарлигида “Ўқув-тикув ва тўқиш маркази” ташкил этилди. Марказда имконияти чекланган фуқароларни маънавий-маърифий жиҳатдан қўллаб-қувватлаш мақсади-да салкам 1000 га яқин китоб жамғармасига эга маънавият маскани – кутубхона фаолияти йўлга қўйилди. Бундан ташқари, қизларга миллий анъана ва қадриятларимизни  ўзида мужассам этган кўрпа-кўрпача қавиш, безакли ёстиқ жилдларини тикиш, эркак ва аёллар, болалар устки кийим-кечакларини бичиш-тикиш сирлари ўргатилмоқда. Кутубхонада эса имконияти чекланган болажонларга эртаклар, ибратли ҳикоялар ўқиб бериш йўлга қўйилган бўлиб, ўсмир  ёшдаги болалар эртак қаҳрамонларининг суратларини чизишади, қўғирчоқлар ясашади. Эртак қаҳрамонлари иштирокида саҳна кўринишларини намойиш этишади.

“Ўқув-тикув ва тўқиш маркази”нинг аъзолари жуда фаол. Улар бу ерда нафақат касб-кор ўрганишади, балки ўз орзуларини амалга ошириш мақсадида тинимсиз ўқиб-изланишади.

Айни пайтда жамият аъзоларидан Р.Гулмирзаев ҚДУнинг 3-босқичида, Ю.Каримова ҳамда Х.Эримметовалар НДПИнинг 2-босқичида таҳсил олишмоқда.

2020-2021 ўқув йилида эса И.Ҳайитбоева ҚДУ талабаси бўлди.

Марказда яратилган шароитлардан унумли фойдаланаётган ёшлар ўзларини имконияти чекланган, деб эмас, балки жамиятнинг онгли, фаол аъзолари деб ҳисоблашлари учун ҳар бир кундан, дақиқалардан унумли фойдаланишга ҳаракат қилишади. Турли байрам саналарида уларнинг давраси янада кенгаяди. Ҳар бир қалбда Ватанга дахлдорлик туйғулари жўш уради, яратувчанлик ҳисси уйғонади.

Дарвоқе, бугунги кунда туманимизнинг ижтимоий-иқтисодий, маънавий ҳамда маданий ҳаётида ўз ўрнини топиб, халқ фаровонлиги йўлидаги ислоҳотларда фаол иштирок этишга интилаётган бу инсонларнинг барчаси бизнинг энг яқин ҳамкорларимиз, фарзандларимиз, дўст-у биродаримиздир. Улар ҳаётга жўшқин назар билан боқиб, доимо олдинга интилиб яшовчи азиз элдошларимиз.

Робия ЙЎЛДОШЕВА.