IMKONIYaTI ChEKLANGAN, LEKIN INTILIShLARI ChEKSIZ INSONLAR

Atrofimizda shunday insonlar ham borki, ularning harakatlari, intilishlari, nogiron boʻlsalar-da, amalga  oshirayotgan ezgu ishlari va hayotda erishayotgan yutuqlarini koʻrib, beixtiyor ularni toʻrt muchasi sogʻ insonlar bilan solishtiramiz. Axir oʻzlari sogʻlom, bardam-baquvvat boʻlaturib, qaysidir moddiy ehtiyojini qondirish maqsadida davlat va jamoat tashkilotlari idoralariga ijtimoiy yordam soʻrab, tinimsiz murojaat qiluvchilar kammi? Afsuski, shundaylarning koʻpchiligi  ayrim imkoniyati cheklangan insonlarning qalblarida kechadigan hayotga nisbatan joʻshqin tuygʻularni idrok eta olmaydilar.

Taqdirini oʻz qoʻllari, sabr-matonati bilan yaratayotgan, ezgu intilishlari bilan jamiyatda oʻz oʻrnini topayotgan bunday insonlar koʻp.

Ayni paytda Oʻzbekiston Nogironlarlar jamiyati tuman boʻlinmasining 40 nafardan ziyod aʼzolari bor. Jamiyat  aʼzolarining toʻlaqonli shaxs sifatida shakllanishlari, oʻz orzu-intilishlarini qobiliyatlarini namoyon etishlari uchun boʻlinma tomonidan zarur shart-sharoitlar yaratilgan.

– Biz turli loyihalar, grant tanlovlarida faol ishtirok etib kelamiz, – deydi Oʻzbekiston Nogironlar jamiyati tuman boʻlinmasi rahbari Nilufar Xolboyeva. – Bir necha marta Oliy Majlis huzuridagi NNTlar va fuqarolik jamiyatining boshqa institutlarini qoʻllab-quvvatlash jamoat fondining grantlarini yutib oldik. Ana shu grant mablagʻlari asosida jamiyat aʼzolari uchun qulay sharoitlar yaratilishini taʼminladik.

Grant mablagʻlari hisobidan imkoniyati cheklangan, bilim olishga, kasb-hunar oʻrganishga intiluvchan fuqarolar va yoshlar uchun kompyuter, oʻquv jihozlari, zarur uskunalar sotib olinib, N.Xolboyeva rahbarligida “Oʻquv-tikuv va toʻqish markazi” tashkil etildi. Markazda imkoniyati cheklangan fuqarolarni maʼnaviy-maʼrifiy jihatdan qoʻllab-quvvatlash maqsadi-da salkam 1000 ga yaqin kitob jamgʻarmasiga ega maʼnaviyat maskani – kutubxona faoliyati yoʻlga qoʻyildi. Bundan tashqari, qizlarga milliy anʼana va qadriyatlarimizni  oʻzida mujassam etgan koʻrpa-koʻrpacha qavish, bezakli yostiq jildlarini tikish, erkak va ayollar, bolalar ustki kiyim-kechaklarini bichish-tikish sirlari oʻrgatilmoqda. Kutubxonada esa imkoniyati cheklangan bolajonlarga ertaklar, ibratli hikoyalar oʻqib berish yoʻlga qoʻyilgan boʻlib, oʻsmir  yoshdagi bolalar ertak qahramonlarining suratlarini chizishadi, qoʻgʻirchoqlar yasashadi. Ertak qahramonlari ishtirokida sahna koʻrinishlarini namoyish etishadi.

“Oʻquv-tikuv va toʻqish markazi”ning aʼzolari juda faol. Ular bu yerda nafaqat kasb-kor oʻrganishadi, balki oʻz orzularini amalga oshirish maqsadida tinimsiz oʻqib-izlanishadi.

Ayni paytda jamiyat aʼzolaridan R.Gulmirzayev QDUning 3-bosqichida, Yu.Karimova hamda X.Erimmetovalar NDPIning 2-bosqichida tahsil olishmoqda.

2020-2021 oʻquv yilida esa I.Hayitboyeva QDU talabasi boʻldi.

Markazda yaratilgan sharoitlardan unumli foydalanayotgan yoshlar oʻzlarini imkoniyati cheklangan, deb emas, balki jamiyatning ongli, faol aʼzolari deb hisoblashlari uchun har bir kundan, daqiqalardan unumli foydalanishga harakat qilishadi. Turli bayram sanalarida ularning davrasi yanada kengayadi. Har bir qalbda Vatanga daxldorlik tuygʻulari joʻsh uradi, yaratuvchanlik hissi uygʻonadi.

Darvoqe, bugungi kunda tumanimizning ijtimoiy-iqtisodiy, maʼnaviy hamda madaniy hayotida oʻz oʻrnini topib, xalq farovonligi yoʻlidagi islohotlarda faol ishtirok etishga intilayotgan bu insonlarning barchasi bizning eng yaqin hamkorlarimiz, farzandlarimiz, doʻst-u birodarimizdir. Ular hayotga joʻshqin nazar bilan boqib, doimo oldinga intilib yashovchi aziz eldoshlarimiz.

Robiya YOʻLDOShEVA.